رەسەيدە الاپات بەنزين داعدارىسى باستالعانى تۋرالى بۇقارالىق اقپارات قۇرالدارى جارىسا جازىپ جاتىر. كورشى ەلدەگى احۋال قازاقستان نارىعىنا قالاي اسەر ەتەدى؟ بۇل تۋرالى قر ەنەرگەتيكا مينيسترلىگى جاۋاپ بەردى.

مينيسترلىكتىڭ مالىمەتىنشە، قازاقستانداعى جانار-جاعارماي نارىعىنداعى جاعداي تۇراقتى.

«ەلدەگى مۇناي ونىمدەرى نارىعىنداعى جاعداي تۇراقتى. قازاقستان نەگىزگى جانار-جاعارماي تۇرلەرىمەن ءوزىن تولىقتاي وتاندىق ءوندىرىس ەسەبىنەن قامتاماسىز ەتىپ وتىر، ال قولداعى قازىرگى قور ەلدىڭ قاجەتتىلىگىن تولىق وتەۋگە جەتكىلىكتى. جاز مەزگىلىندە جانار-جاعارماي تۇتىنۋى ادەتتەگىدەي ارتا تۇسەتىنى انىق. الايدا تاپشىلىق نەمەسە وعان العىشارتتار جوق. ەنەرگەتيكا مينيسترلىگى وڭىرلەر بويىنشا قالدىقتاردى كۇن سايىن باقىلاپ، قاجەت بولعان جاعدايدا رەسۋرستاردى جەدەل قايتا بولۋگە دايىن», - دەپ جاۋاپ بەردى مينيسترلىك وكىلى.

سونىمەن قاتار رەسەي نارىعىنداعى وزگەرىستەردىڭ بىزگە ەش ىقپالى جوق دەپ وتىر.

رەسەي نارىعىنداعى وزگەرىستەر قازاقستانعا تىكەلەي اسەر ەتپەيدى. باعا ساياساتى ىشكى سۇرانىس پەن ۇسىنىس تەڭگەرىمىنە جانە نارىقتىق تەتىكتەردىڭ جۇمىسىنا سايكەس قالىپتاسادى، - دەدى ۆەدومستۆودان.

بەنزين ماسەلەسىنە قاتىستى ەنەرگەتيكا ءمينيسترى دە ءۇن قاتتى.

«قور بىزدە ۇنەمى قاداعالاۋدا. ديزەلدىك وتىن مەن بەنزين بويىنشا ەشقانداي كۇمان جوق. زاۋىتتار تولىق قۋاتتا جۇمىس ىستەپ تۇر، قور ۇنەمى تولىقتىرىلىپ وتىرادى. باعاعا كەلسەك، وزدەرىڭىز بىلەسىزدەر، بيىل اقپاندا ۇكىمەت مەملەكەتتىك رەتتەۋدەن باس تارتقان بولاتىن. سوندىقتان قازىرگى تاڭدا باعالاردى ىشكى سۇرانىس پەن ىشكى ۇسىنىس ايقىندايدى», - دەدى قازاقستاننىڭ باس ەنەرگەتيگى ەرلان اقكەنجەنوۆ.

Abai.kz