كەزىندە تانكتەر مەن اۋىر ارتيللەريا ۇستەمدىك قۇرعان مايداندا قازىر جەڭىل ءارى جىلدام قوزعالىسقا ارنالعان كولىكتەردىڭ ماڭىزى ارتىپ كەلەدى.

اسىرەسە موتوتسيكلدەر مەن ەلەكتروساموكاتتار جاۋىنگەرلەر ءۇشىن تاپتىرماس قۇرالعا اينالعان. ۋكراينا اسكەرى لاتۆيالىق Global Wolf Motors كومپانياسى شىعارعان Mosphera اتتى ەلەكتروساموكاتتار مايدان دالاسىندا سىناقتان وتكىزىپ جاتىر.

بۇل تەحنيكا كادىمگى قالاداعى ساموكاتقا ۇقسامايدى. كولەمى ەكى ەسەگە ۇلكەن، جول تالعامايتىن قۋاتى جوعارى، ءبىر زاريادپەن 300 شاقىرىمعا دەيىن توقتاۋسىز جۇرەدى. جىلدامدىعى ساعاتىنا 100 شاقىرىم. سالماعى نەبارى 70 كەلى، ياعني موتوتسيكلدەن الدەقايدا جەڭىل. اۋىر تەحنيكا جۇرە المايتىن جەرلەردە جاۋىنگەرگە جىلدام قيمىلداۋ مۇمكىندىك بەرۋدە.

اسكەري ساموكاتتار قارۋ-جاراقتى الدىڭعى شەپكە جەتكىزۋگە، قارسىلاس تىلىنىڭ ماڭىندا بارلاۋ جۇرگىزۋگە جانە جارالانعان ساربازداردى شۇعىل ەۆاكۋاتسيالاۋعا كەڭىنەن قولدانىلۋدا. Mosphera ەلەكتروساموكاتتارى اسكەري بازالار مەن شەكارا كۇزەتىندە قولدانۋ ءۇشىن جاسالعان بولاتىن. بىراق ۋكرايناداعى سوعىس جاعدايى بۇل تەحنيكانىڭ ناعىز مايدان دالاسىندا دا اسا قاجەت ەكەنىن دالەلدەپ بەردى.

اسىرەسە ورماندى ايماقتاردا مانەۆر جاساۋعا وتە ىڭعايلى. ۇلكەن كولىك سىيايتىن جەرلەردەن ساموكات ەركىن جۇرەدى. ال سالماعى جەڭىل بولعاندىقتان، باتپاققا باتىپ قالسا دا، ەكى جاۋىنگەر كوتەرىپ الىپ شىعا الادى. جاسىرىنۋعا دا ىڭعايلى – پايدالانىلماي تۇرعان كەزدە ونى بۇتانىڭ اراسىنا نەمەسە اعاشتىڭ استىنا قويا سالۋعا بولادى.

نۇرلان جۇماقانوۆ

Abai.kz