جەزقازعان قالاسىنىڭ قابانباي باتىر شاعىناۋدانىندا بوي كوتەرگەن 300 ورىندىق جاڭا مەكتەپ ورتالىقتاندىرىلعان گاز جەلىسىنە قوسىلدى. بۇل باستاما – وڭىردە ەكولوگيالىق قاۋىپسىزدىكتى قامتاماسىز ەتىپ، الەۋمەتتىك نىسانداردى ۇزدىكسىز جىلۋمەن قامتۋعا باعىتتالعان جۇيەلى جۇمىستاردىڭ جالعاسى.

اتالعان شاراعا ۇلىتاۋ وبلىسىنىڭ اكىمى داستان رىسپەكوۆ پەن «Qazaqgaz» ۇك اق باسقارما توراعاسى سانجار جاركەشوۆ ارنايى قاتىستى.

ءوز سوزىندە ءوڭىر باسشىسى گازداندىرۋ ءىسىنىڭ ءوڭىر ەكولوگياسى مەن تۇرعىنداردىڭ تۇرمىس ساپاسىن ارتتىرۋداعى ماڭىزىنا توقتالدى.

— «گازداندىرۋ جوباسى – ەكولوگيالىق تۇرعىدان وتە پايدالى. ول قورشاعان ورتاعا كەلەتىن زياندى قالدىقتاردى ازايتىپ قانا قويماي، جىلۋ تاپشىلىعىن بولدىرماۋعا مۇمكىندىك بەرەدى. وتكەن جىلى ءبىز تالاپ اۋىلىنداعى مەكتەپتى كوگىلدىر وتىنعا قوسىپ، قىس مەزگىلىن ءساتتى وتكەردىك. بۇگىندە وبلىس ورتالىعىنداعى وزگە دە الەۋمەتتىك نىسانداردى كەزەڭ-كەزەڭىمەن گاز جەلىسىنە قوسۋدى قولعا الىپ وتىرمىز. سونىڭ ءبىرى – وسى جاڭا ءبىلىم وشاعى»، – دەدى وبلىس اكىمى داستان رىسپەكوۆ.

سۋرەت: gov.kz سايتىنان الىندى.

ايتا كەتەيىك، قازىرگى تاڭدا جەزقازعان قالاسىندا 4000 ابونەنتكە گاز جەلىسى تارتىلىپ، ونىڭ 2000-ى كوگىلدىر وتىندى تۇتىنىپ وتىر. بۇدان بولەك، كەڭگىر اۋىلىندا، جايرەم كەنتىندە جانە جاڭاارقا اۋدانىندا دا گازداندىرۋ جوبالارى جۇزەگە اسىرىلا باستادى.

الداعى ۋاقىتتا ۇلىتاۋ وبلىسىندا الەۋمەتتىك نىساندارمەن قاتار، جەكە تۇرعىن ۇيلەردى دە كەزەڭ-كەزەڭىمەن گازداندىرۋ جوسپارلانىپ وتىر. وسىعان بايلانىستى وبلىس اكىمى مەن «Qazaqgaz» كومپانياسى وكىلدەرىنىڭ قاتىسۋىمەن ارنايى جيىن ءوتتى. كەڭەستە گازداندىرۋ ءىسىن ودان ءارى جانداندىرۋ، قوسىمشا گاز كولەمىن بەرۋ، سونداي-اق ونىڭ وڭىردەگى شاعىن جانە ورتا بيزنەستى دامىتۋداعى ءرولى تالقىلاندى.

قوس تاراپ ىنتىماقتاستىقتا ارەكەت ەتە وتىرىپ، گازداندىرۋ جوبالارىن تۇراقتى تۇردە جۇزەگە اسىرۋعا جانە حالىققا قولايلى جاعداي جاساۋعا نيەتتى ەكەندىكتەرىن اتاپ وتتى.

Abai.kz