«AMANAT» پارتياسى فراكتسياسىنىڭ مۇشەسى جاناربەك ءاشىمجان پرەمەر-مينيستر ولجاس بەكتەنوۆكە الاتاۋ قالاسىن ىسكەرلىك بەلسەندىلىك پەن يننوۆاتسيانىڭ جاڭا ورتالىعى رەتىندە دامىتۋ تۋرالى جولداعان دەپۋتاتتىق ساۋال جولدادى.

«الاتاۋ قالاسى قۇرىلعانىنا 1,5 جىل وتسە دە جوبالىق-سمەتالىق قۇجاتتامالار كەشىگۋدە»، - دەيدى ءماجىلىس دەپۋتاتى.

ءبىز دەپۋتات جاناربەك ءاشىمجاننىڭ اتالعان ساۋالىن وقىرمان تالقىسىنا ۇسىنامىز...

دەپۋتاتتىق ساۋال قر پرەمەر-مينيسترىنە

قۇرمەتتى ولجاس ابايۇلى!

مەملەكەت باسشىسى قاسىم-جومارت كەمەلۇلى توقاەۆ ءوز جولداۋلارىندا وڭىرلىك دامۋ جانە اگلومەراتسيالىق ماسەلەلەرگە ەرەكشە نازار اۋدارىپ كەلەدى. پرەزيدەنتتىڭ ساياسي ەرىك-جىگەرى مەن ناقتى تاپسىرمالارىنىڭ ناتيجەسىندە ەلىمىزدە جاڭا وبلىستار، قالالار مەن اۋداندار قۇرىلىپ، وڭىرلىك باسقارۋدىڭ جاڭا دەڭگەيى قالىپتاسۋدا.

سولاردىڭ ءبىرى – الماتى اگلومەراتسياسىنىڭ وزەكتى ماسەلەلەرىن شەشۋ ماقساتىندا قۇرىلعان الاتاۋ قالاسى. بۇل – ستراتەگيالىق ماڭىزى زور، كەلەشەككە باعىتتالعان ءىرى جوبا.

مەملەكەت باسشىسى ءوزىنىڭ كەزەكتى جولداۋىندا: «بۇل قالا قازاقستاننىڭ كەلەشەكتەگى كەلبەتىن تانىتپاق. وندا تەحنولوگيالىق ورلەۋگە جانە ءومىر سۇرۋگە بارىنشا قولايلى جاعداي ۇيلەسىم تابۋى قاجەت», – دەپ اتاپ ءوتىپ، قالانىڭ ينستيتۋتسيونالدىق نەگىزدەرىن قالىپتاستىرۋدى، سونداي-اق ارنايى مارتەبەسىن ايقىندايتىن زاڭ جوباسىن پارلامەنت قاراۋىنا ەنگىزۋدى تاپسىردى.

پرەزيدەنتتىڭ بۇل باستاماسى – ءوڭىر حالقى مەن الاتاۋ جۇرتشىلىعىنا دەگەن شىنايى جاناشىرلىق پەن ستراتەگيالىق كوزقاراستىڭ ايقىن كورىنىسى.

ۇكىمەت قالانىڭ باس جوسپارى بەكىتتى. جەرگىلىكتى اتقارۋشى ورگاندار تاراپىنان ينفراقۇرىلىمدىق جوبالاردى ىسكە اسىرۋدى جەدەلدەتۋ كەرەكپىز.

سونىمەن قاتار، قالا قۇرىلعانىنا 1,5 جىل وتسە دە، كوپتەگەن جوبالاردىڭ جوبالىق-سمەتالىق قۇجاتتامالارى كەشىگۋدە.

ونىڭ ىشىندە، زارەچنىي مەن جەتىگەن ەلدىمەكەندەرىندەگى اسا ءزارۋ مادەنيەت ۇيلەرى, سپورت كەشەنى مەن اۋىز سۋ جۇيەلەرىنە قاتىستى جوبالاردى تەز ارادا جەرگىلىكتى اكىمدىك دايىنداۋ ءتيىس.

قالانىڭ قاجەتتىلىگى ءۇشىن قايتارىلعان جەر تەلىمدەرىنە قاتىستى شەشىمىن تاپپاعان ماسەلەلەر بار.

باس جوسپارعا سايكەس، الاتاۋ قالاسىندا 168 مەكتەپ, 219 بالاباقشا, 102 مەديتسينالىق مەكەمە سالىنۋى ءتيىس. بۇل — ايماقتاعى جوعارى دەموگرافيالىق وسىمگە جانە الەۋمەتتىك ينفراقۇرىلىمعا قاجەتتى فاكتور.

سوندىقتان، پرەزيدەنتتىڭ تاپسىرماسىنا سايكەس جەرگىلىكتى اكىمدىك ۇكىمەتپەن بىرلەسىپ، بۇل ماسەلەلەردى جۇزەگە اسىرۋى ءتيىس.

وسىدان ەكى اي بۇرىن وڭىرلەردى ارالاعاندا ارنايى بارىپ، ءماسليحات دەپۋتاتتارىمەن، اكىمدىك قىزمەتكەرلەرىمەن، اقساقالدارمەن، تۇرعىندارمەن، قوعام بەلسەندىلەرىمەن كەزدەستىم.

بۇل جاڭاشىل ءارى قاجەتتى پرەزيدەنتتىڭ باستاماسىن قالىڭ قاۋىم زور ىقىلاسپەن كۇتىپ وتىر.

سوندىقتان، مەملەكەت باسشىسى قاسىم-جومارت كەمەلۇلى 2024 جىلعى 9 قاڭتارداعى جارلىعىمەن الماتى وبلىسىندا جاڭا الاتاۋ قالاسىن قۇرۋ تۋرالى پارمەنىن جەدەلدەتىپ ۇيىمداستىرۋىمىز كەرەك.

وعان قوسا، وسى تۇيتكىلدەردى تەز ارادا شەشۋ ءۇشىن مەملەكەت باسشىسى ءوز جولداۋىندا بۇل ماسەلەگە ۇكىمەت پەن مەملەكەتتىك ورگانداردىڭ نازارىن قايتا اۋداردى.

ءتىپتى، ءوز تاراپىنان الەمدىك شەنچجەن جاھاندىق تەحنوپوليسىن سالۋعا قاتىسقان ءىرى كومپانيالاردى Alatau City جوباسىن تىكەلەي جۇزەگە اسىرۋ بويىنشا كەلىسىمگە كەلگەنىن مالىمدەدى.

وسىعان بايلانىستى، ورتالىق مەملەكەتتىك ورگاندار تاراپىنان: Alatau City جوباسىن ىسكە اسىرۋعا ينستيتۋتسيونالدىق قولداۋدى كۇشەيتۋ; ينۆەستورلار ءۇشىن قاجەتتى جاعدايلاردى تولىق قامتاماسىز ەتۋ; جوسپارلاردىڭ ورىندالۋىن ناقتى باقىلاۋعا الۋ قاجەت دەپ سانايمىز.

الاتاۋ قالاسى قازاقستاننىڭ كەلەشەكتەگى زاماناۋي كەلبەتىن تانىتانىن، تەحنولوگيالىق ورلەۋگە جانە ءومىر سۇرۋگە بارىنشا قولايلى جاعدايى جاسالعان الەمدىك دەڭگەيدەگى تەحنوپوليس بولۋى ءتيىس.

بۇل پرەزيدەنتتىمىزدىڭ ىرگەلى باستاماسى.

جاناربەك ءاشىمجان،

«امانات» فراكتسياسىنىڭ مۇشەسى

Abai.kz