الماتىدا ءابۋ ناسىر ءال-ءفارابيدىڭ فيلوسوفيالىق جانە عىلىمي مۇراسىنا ارنالعان «فيلوسوفيا. ەتيكا. بولاشاق» حالىقارالىق سيمپوزيۋمى ءوتتى. جيىندا ۆيتسە-پرەزيدەنت ەرلان قارين مەملەكەت باسشىسى قاسىم-جومارت توقاەۆ وتاندىق عىلىمدى دامىتۋعا ايرىقشا كوڭىل ءبولىپ وتىرعانىن جەتكىزدى.

«قاسىم-جومارت توقاەۆ بيىلعى جولداۋىندا دا كەلەر ۇرپاققا جوعارى تەحنولوگياعا، ءبىلىم مەن عىلىمعا تابان تىرەگەن كۇشتى قازاقستاندى امانات ەتۋ قاجەت ەكەنىن ەرەكشە اتاپ ءوتتى. سول ءۇشىن دە «حالىقتىق قۇرىلىس» باعدارلاماسىن جاريالادى. سونىڭ اياسىندا ەلىمىزدىڭ بارلىق ايماعىندا جۇزدەگەن عىلىم، مادەنيەت، سپورت جانە باسقا دا الەۋمەتتىك، ينفراقۇرىلىمدىق نىساندار بوي كوتەرەتىن بولادى. بۇل نىساندار حالىقتىڭ يگىلىگىنە قىزمەت ەتەدى. سوندىقتان دا، «حالىقتىق قۇرىلىس» دەگەن كەڭ اۋقىمدى مازمۇنعا يە بولدى. پرەزيدەنتتىڭ جولداۋدا ايتقان «قۇرىلىس جانە تاعى دا قۇرىلىس» دەگەن ۇندەۋى – قازاقستاننىڭ ەكونوميكالىق ساياساتى عانا ەمەس، بۇل – بەلگىلى ءبىر دارەجەدە يدەولوگيالىق فورمۋلا. سەبەبى، بۇل – جاسامپازدىققا باعىتتايدى. بۇل بارشامىز جۇمىلا بىرگە ەڭبەك ەتىپ، سالامىز، جاسايمىز، قۇرامىز دەگەندى مەڭزەيدى. سوندىقتان دا، بۇل – قازاقستاننىڭ ەكونوميكالىق ساياساتى عانا ەمەس، ءتىپتى يدەولوگيالىق ۇستىنى دا»، دەدى ەرلان قارين.

ۆيتسە-پرەزيدەنت مۇنىڭ ءبارى – پرەزيدەنتتىڭ ەكونوميكاسى قۋاتتى، تەحنولوگياسى دامىعان، ءبىلىمى مەن عىلىمى وزىق، جاسامپاز ءارى وركەنيەتتى ەل قۇرۋ جولىنداعى تاباندى، جىگەرلى قادامدارى ەكەنىن اتاپ ءوتتى.

Abai.kz