14 قىركۇيەكتە ليۆەرپۋل (ۇلىبريتانيا) قالاسىندا بوكستان الەم چەمپيوناتىنىڭ سوڭعى سايىس كۇنى ءوتتى. فينالدىق كەزەڭگە سەگىز قازاقستاندىق سپورتشى جولداما العان بولاتىن. ليۆەرپۋل – قازاقستان بوكسى ءۇشىن التىن جاۋعان چەمپيوناتتاردىڭ ءبىرى بولدى.

سۋرەت: Qazaqstan Olympic team تەگەرام ارناسىنان الىندى.

نازىم قىزايباي – كۇمىس جۇلدەگەر

قازاقستاندىق بوكسشى نازىم قىزايباي ليۆەرپۋلدە (ۇلىبريتانيا) ءوتىپ جاتقان الەم بىرىنشىلىگىنىڭ كۇمىس جۇلدەگەرى اتاندى. وتانداسىمىز 48 كەلىگە دەيىنگى سالماقتىڭ اقتىق جەكپە-جەگىندە ۇندىستاندىق ميناكشيمەن قولعاپ ءتۇيىستىردى. العاشقى راۋندتا ميناكشي 4:1 ەسەبىمەن باسىم ءتۇستى. ەكىنشى كەزەڭ 3:2 ەسەبىمەن نازىم قىزايبايدىڭ پايداسىنا اياقتالدى. دەگەنمەن تورەشىلەردىڭ شەشىمى بويىنشا ۇندىستاندىق بوكسشى جەڭىسكە جەتتى. وسىلايشا، نازىم قىزايباي (48 كەلىگە دەيىن) قازاقستان قۇراماسىنىڭ قورجىنىنا العاشقى كۇمىس جۇلدەنى سالدى.

سۋرەت: Qazaqstan Olympic team تەگەرام ارناسىنان الىندى.

سانجار تاشكەنباي – الەم چەمپيونى

قازاقستاندىق بىلعارى قولعاپ شەبەرى سانجار تاشكەنباي ليۆەرپۋلدەگى (ۇلىبريتانيا) الەم بىرىنشىلىگىنىڭ چەمپيونى اتاندى. جەرلەسىمىز 50 كەلىگە دەيىنگى سالماقتىڭ فينالىندا الدارقحيشيگ باتتۋلگامەن (موڭعوليا) ءوزارا مىقتىنى انىقتادى. سانجار تاشكەنباي جەكپە-جەكتىڭ ءبىرىنشى كەزەڭىنەن باستاپ تىزگىندى قولىنا الدى. تولىق ءۇش راۋند بويى باسىمدىعىن ساقتاپ قالعان جەرلەسىمىز تورەشىلەردىڭ شەشىمىمەن جەڭىسكە جەتتى. وسىلايشا، سانجار تاشكەنباي (50 كەلىگە دەيىن) الەم چەمپيوناتىندا قازاقستان قۇراماسىنىڭ قورجىنىنا العاشقى التىن مەدالدى سالدى.

سۋرەت: Qazaqstan Olympic team تەگەرام ارناسىنان الىندى.

ماحمۇد سابىرحان – الەم چەمپيونى

ماحمۇد سابىرحان بوكستان ليۆەرپۋلدە (ۇلىبريتانيا) ءوتىپ جاتقان الەم چەمپيوناتىنىڭ فينالىندا جەڭىسكە جەتتى. قازاقستاندىق بوكسشى 55 كەلىگە دەيىنگى سالماقتا ۇزدىك اتاندى. ماحمۇد اقتىق سىندا رافاەل لوسانو سەررانومەن (يسپانيا) التىن جۇلدەنى ساراپقا سالدى. وتانداسىمىز ءۇش راۋند بويى باسىمدىق تانىتتى. ناتيجەسىندە ماحمۇد سابىرحان ەش قيىندىقسىز جەڭىسكە جەتتى.

سۋرەت: Qazaqstan Olympic team تەگەرام ارناسىنان الىندى.

الۋا بالقىبەكوۆا – الەم چەمپيونى

بوكستان قازاقستان ايەلدەر قۇراماسىنىڭ وكىلى الۋا بالقىبەكوۆا ليۆەرپۋلدە (ۇلىبريتانيا) ءوتىپ جاتقان الەم چەمپيوناتىندا التىن مەدالعا قول جەتكىزدى. 51 كەلىگە دەيىنگى سالماقتا الۋا بالقىبەكوۆا قارسىلاس شاق كەلتىرمەدى. وتانداسىمىز اقتىق سىندا تۇركيالىق بۋسە ناز چاكىروگلۋمەن كەزدەستى. تارتىستى جەكپە-جەكتىڭ قورىتىندىسى بويىنشا الۋا بالقىبەكوۆا ەكى دۇركىن الەم چەمپيونى اتاندى.

سۋرەت: Qazaqstan Olympic team تەگەرام ارناسىنان الىندى.

ايدا ابىكەەۆا – الەم چەمپيونى

قازاقستاندىق بوكسشى ايدا ابىكەەۆا ليۆەرپۋلدەگى (ۇلىبريتانيا) الەم چەمپيوناتىنىڭ فينالىندا جەڭىسكە جەتتى. بۇرىمدى بوكسشىمىز 65 كەلىگە دەيىنگى سالماقتىڭ اقتىق جەكپە-جەگىندە وزبەكستاندىق ناۆباحور حاميدوۆانى جەڭدى. العاشقى ەكى راۋند وزبەك قىزىنىڭ پايداسىنا اياقتالدى. دەگەنمەن ايدا ءۇشىنشى راۋندتا جوعارى دەڭگەيدەگى بوكس ۇلگىسىن كورسەتىپ، جەڭىستى سۋىرىپ الدى.

سۋرەت: Qazaqstan Olympic team تەگەرام ارناسىنان الىندى.

تورەحان سابىرحان – الەم چەمپيونى

قازاقستاندىق بىلعارى قولعاپ شەبەرى تورەحان سابىرحان ليۆەرپۋلدە (ۇلىبريتانيا) ءوتىپ جاتقان الەم بىرىنشىلىگىندە التىن مەدالعا يە بولدى. وتانداسىمىز 70 كەلىگە دەيىنگى سالماقتا ۇزدىك اتاندى. تورەحان اقتىق جەكپە-جەگىندە جاپونيالىق سەۆون وكادزاۆامەن قولعاپ ءتۇيىستىردى. جەكپە-جەك تەڭ دارەجەدە ءوتتى. دەگەنمەن تورەحان سابىرحان ءۇشىنشى راۋندتا قارسىلاسىنان ايلاسىن اسىرىپ، جەڭىستى سۋىرىپ الدى. وسىلايشا، 19 جاستاعى تورەحان سابىرحان (70 كەلىگە دەيىن) العاش رەت ەرەسەكتەر اراسىنداعى الەم چەمپيوناتىندا التىن مەدال جەڭىپ الدى.

سۋرەت: Qazaqstan Olympic team تەگەرام ارناسىنان الىندى.

ناتاليا بوگدانوۆا – الەم چەمپيونى

قازاقستاندىق بۇرىمدى بوكسشى ناتاليا بوگدانوۆا ليۆەرپۋلدەگى (ۇلىبريتانيا) الەم چەمپيوناتىنىڭ التىن جۇلدەگەرى اتاندى. 70 كەلىگە دەيىنگى سالماقتا ناتاليا بوگدانوۆا قارسىلاس شاق كەلتىرمەدى. وتانداسىمىز اقتىق سىندا لەكەيشا پەرگوليتيمەن اۋستراليا) ءوزارا مىقتىنى انىقتادى. ناتيجەسىندە ناتاليا بوگدانوۆا ەش قيىندىقسىز قارسىلاسىنان باسىم ءتۇسىپ، جەڭىمپاز اتاندى.

سۋرەت: Qazaqstan Olympic team تەگەرام ارناسىنان الىندى.

ايبەك ورالباي – الەم چەمپيونى

بوكستان قازاقستان ەرلەر قۇراماسىنىڭ كاپيتانى ايبەك ورالباي ليۆەرپۋلدە (ۇلىبريتانيا) ءوتىپ جاتقان الەم چەمپيوناتىندا التىن مەدال الدى. بىلعارى قولعاپ شەبەرى 90 كەلىدەن جوعارى سالماقتىڭ فينالىنا دەيىن جەتتى. ايبەك ورالباي اقتىق سىندا وزبەكستاندىق جاحونگير زوكيروۆپەن قولعاپ ءتۇيىستىردى. ءبىرىنشى جانە ەكىنشى راۋندتا وزبەك بوكسشىسى باسىم ءتۇستى. دەگەنمەن ايبەك ورالباي سوڭعى ءۇشىنشى كەزەڭدە قايسارلىق تانىتىپ، جەڭىستى سۋىرىپ الدى.

قورىتىندى: قازاقستان قۇراماسى الەم چەمپيوناتىندا 7 التىن، 1 كۇمىس جانە 2 قولا مەدالمەن كوماندالىق ەسەپتە توپ جاردى.

Abai.kz