قازاقستاننىڭ باتىسىندا «ايبالتا-2025» ەكىجاقتى جەدەل-ستراتەگيالىق كوماندالىق-شتابتىق وقۋ-جاتتىعۋىنىڭ العاشقى كەزەڭى باستالدى.

«باتىس» جانە «شىعىس» وڭىرلىك قولباسشىلىقتارى اسكەرلەرىنىڭ قۇرامالارى مەن اسكەري بولىمدەرى دابىل ارقىلى كوتەرىلىپ، تولىق جاۋىنگەرلىك دايىندىققا كەلتىرىلدى.

مانەۆرلەرگە 3 مىڭنىڭ  ۇستىندە اسكەري قىزمەتشى، 1 مىڭنان استام قارۋ-جاراق پەن اسكەري تەحنيكا، ونىڭ ىشىندە ۇشاقتار، تىكۇشاقتار مەن ۇشقىشسىز ۇشۋ اپپاراتتارى جۇمىلدىرىلدى. وقۋ-جاتتىعۋ ءتورت كەزەڭدە وتەدى. ءبىرىنشى كەزەڭدە اسكەري قىزمەتشىلەر دابىل جاريالانعان كەزدەگى ءىس-قيمىلدى پىسىقتاپ، بەلگىلەنگەن اۋدانعا ارالاس تاسىلمەن مارش جاساپ، وقۋ-جاۋىنگەرلىك تاپسىرمالاردى ورىنداۋعا كىرىستى.

پراكتيكالىق ارەكەتتەر كۇندىزگى جانە تۇنگى ۋاقىتتا، قورعانىس جانە شابۋىل وپەراتسيالارىن جۇرگىزۋ جاعدايىندا، ۇشقىشسىز جۇيەلەردى قولدانا وتىرىپ وتكىزىلەدى. وقۋ-جاتتىعۋ بارىسىندا اسكەر تەكتەرىنىڭ ءوزارا ءىس-قيمىلى، كوماندالىق باسقارۋ داعدىلارى جەتىلدىرىلەدى، لوگيستيكا، تاكتيكالىق بايلانىس جانە بولىمشەلەردىڭ كۇردەلى كليماتتىق جاعدايدا مانەۆر جاساۋ قابىلەتى پىسىقتالادى.

وقۋ-جاتتىعۋدىڭ نەگىزگى ماقساتتارى — اسكەري باسقارۋ ورگاندارىنىڭ ۇيلەسىمدىلىگىن ارتتىرۋ، قازىرگى زامانعى ۇرىس جۇرگىزۋ ادىستەمەسىن جەتىلدىرۋ، سونداي-اق جاۋىنگەرلىك جۇمىستى ۇيىمداستىرۋدىڭ جاڭا تاسىلدەرىن سىناقتان وتكىزۋ. «ايبالتا-2025» وقۋ-جاتتىعۋى بيىلعى جىلدىڭ 3 قازانىنا دەيىن جالعاسادى.

Abai.kz