ءماجىلىس دەپۋتاتى مارات ءباشىموۆ Halyk Bank-ءتىڭ اتاۋىن سىنعا الىپ، تيمۋر قۇلىباەۆتان بانكتىڭ برەندىن تارتىپ الۋدى ۇسىندى، دەپ حابارلايدى Ertenmedia.

جاڭا بانك زاڭىن تالقىلاۋعا ارنالعان جيىندا دەپۋتات قازاقستانداعى قارجى نارىعىنىڭ قازىرگى جاعدايىن سىنعا الىپ، شەتەلدىك تاجىريبەنى مىسال ەتتى. ونىڭ پىكىرىنشە، قارجى سالاسىنداعى مەملەكەتتىك قاتىسۋدان قاشۋدىڭ قاجەتى جوق، سەبەبى الەمنىڭ جەتەكشى ەلدەرىندە جۇيەقۇراۋشى بانكتەر مەملەكەت مەنشىگىندە.

دەپۋتات گەرمانيا مەن فرانتسيانى مىسالعا كەلتىرە وتىرىپ، بانك جۇيەسىندەگى مەملەكەتتىك باقىلاۋ ۇلتتىق قاۋىپسىزدىكتىڭ كەپىلى دەپ سانايدى.

«بىزگە ۇزاق جىلدار بويى بانك سەكتورى تولىقتاي جەكەمەنشىك بولۋى ءتيىس دەگەن ۇعىمدى ءسىڭىردى. ال شىندىعىنا كەلگەندە، گەرمانيا، فرانتسيا جانە ەۋروپانىڭ وزگە دە دامىعان ەلدەرىندە بانك جۇيەسى مەملەكەت قولىندا تۇر. بۇل ۇلتتىق قاۋىپسىزدىكتىڭ باستى كەپىلى»، – دەيدى دەپۋتات.

بۇدان ءارى ءباشىموۆ قازاقستانداعى بانك اتاۋلارىنا توقتالىپ، Halyk Bank برەندىن سىنعا الدى. ونىڭ پىكىرىنشە، قۇلىباەۆتىڭ بانككە «حالىق» دەگەن اتاۋدى بەرۋى دۇرىس ەمەس، ويتكەنى كونستيتۋتسيا بويىنشا حالىق اتىنان تەك رەسمي مەملەكەتتىك ورگاندار عانا ارەكەت ەتە الادى.

«بىزدە ازاماتتىق كودەكس بار. ول بويىنشا ەلدىڭ نەمەسە حالىقتىڭ اتىن جەكەمەنشىك قۇرىلىمداردىڭ پايدالانۋىنا رۇقسات جوق. حالىق اتىنان سويلەۋگە تەك كونستيتۋتسيالىق مارتەبەسى بار ۇيىمدار قۇقىلى.

ال بۇل بانكتىڭ «حالىقتىق» دەپ اتالۋى زاڭ تۇرعىسىنان قانشالىقتى دۇرىس؟ بۇل اتاۋ حالىقتى شاتاستىرىپ وتىرعان جوق پا؟ بۇعان كىم رۇقسات بەرگەن؟

ادىلەت مينيسترلىگى بانك اتاۋلارىن قايتا قاراپ، مۇنداي ماسەلەلەردى زاڭمەن رەتتەۋى ءتيىس»، – دەپ اشۋلاندى دەپۋتات.

مارات ءباشىموۆتىڭ ۇسىنىسىنا جاۋاپ بەرگەن قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا ماسەلەنىڭ زاڭ تۇرعىسىنان تەكسەرىلەتىنىن ايتتى. ول بانكتەردىڭ «حالىقتىق-پاتريوتتىق» اتاۋلارىن قولدانۋ تۋرالى ناقتى قۇقىقتىق ۇستانىم جوق بولسا، ماسەلەنىڭ نازارعا الىناتىنىن جەتكىزدى.

Abai.kz