قازاقستاننىڭ بەلگياداعى ەلشىسى رومان ۆاسيلەنكو بەلگيا سىرتقى ىستەر، سىرتقى ساۋدا جانە دامۋ ىنتىماقتاستىعى فەدەرالدىق قىزمەتىنىڭ ەكىجاقتى قاتىناستار جونىندەگى باس ديرەكتورى بيرگيت ستيۆەنسپەن كەزدەستى. تاراپتار ەكى ەل اراسىنداعى ىنتىماقتاستىقتىڭ جاڭا كەزەڭىن باستاپ، بولاشاق ەكىجاقتى قارىم-قاتىناستاردىڭ نەگىزىن قالادى.

كەزدەسۋ بارىسىندا ۆاسيلەنكو قازاقستاننىڭ تسيفرلاندىرۋعا ارنالعان جوسپارىن تانىستىرىپ، ەلدىڭ جاساندى ينتەللەكت (AI) جول كارتاسىنا ەرەكشە توقتالدى. ول پرەزيدەنت قاسىم-جومارت توقاەۆتىڭ حالىققا جولداۋىنداعى نەگىزگى باستامالاردى اتاپ ءوتىپ، قازاقستاننىڭ تسيفرلىق ترانسفورماتسياعا قادام جاساپ وتىرعانىن جەتكىزدى. ەلشى سونداي-اق جاساندى ينتەللەكت مينيسترلىگىنىڭ قۇرىلاتىنىن جانە تسيفرلىق اكتيۆتەرگە ارنالعان پيلوتتىق ايماق – CryptoCity-ءدىڭ ىسكە قوسىلاتىنىن جاريالادى. ونىڭ ايتۋىنشا، قازاقستاننىڭ تۇپكى ماقساتى – ورتالىق ازياداعى جاڭا تەحنولوگيالار سالاسىندا كوشباسشى اتانىپ، جاھاندىق دەڭگەيدە باسەكەگە قابىلەتتى ەلگە اينالۋ.

ءوز كەزەگىندە بيرگيت ستيۆەنس بەلگيانىڭ قازاقستاننىڭ تسيفرلاندىرۋ باعىتىنداعى جوسپارلارىنا قىزىعۋشىلىق تانىتىپ، ءبىلىم الماسۋ مەن تەحنيكالىق قولداۋ كورسەتۋگە دايىن ەكەنىن ايتتى. سونداي-اق ول بەلگيانىڭ سيرەك جانە ماڭىزدى شيكىزاتتى وڭدەۋگە قولداۋ بىلدىرەتىنىن جەتكىزدى. تابيعي الەۋەتتى باعالاۋ ءۇشىن سپۋتنيكتىك مونيتورينگ جۇرگىزۋ مۇمكىندىگىن اتاپ وتكەن ستيۆەنس بۇل سالادا بەلگيانىڭ عارىش سالاسىنداعى تاجىريبەسىن بولىسۋگە دايىن ەكەنىن مالىمدەدى.

بۇعان قوسا، قازاقستاننىڭ سۋ رەسۋرستارىن باسقارۋ جانە ورتالىق ازياداعى شەكاراارالىق كولىكتى دامىتۋعا باعىتتالعان ورتا ءدالىز جوباسى دا بەلگيالىق تاراپتىڭ نازارىن اۋداردى.

ساۋدا-ەكونوميكالىق بايلانىستار دا قارقىن الۋدا. قازاقستان مەن بەلگيا اراسىنداعى ەكىجاقتى ساۋدا كولەمى بيىل $299 ميلليونعا جەتىپ، جىلدىڭ سوڭىنا دەيىن $500 ميلليوننان اسۋى مۇمكىن. 2005 جىلدان بەرى بەلگيانىڭ قازاقستانعا تىكەلەي ينۆەستيتسياسى $13 ميللياردتان اسىپ وتىر. تاراپتار بۇل كورسەتكىشتى الداعى ۋاقىتتا ۇلعايتۋدى كوزدەيدى.

ىشكى تسيفرلاندىرۋ قادامدارى

قازاقستان تەك حالىقارالىق سەرىكتەستىكتەرگە عانا ەمەس، ىشكى تسيفرلىق رەفورمالارعا دا باسىمدىق بەرىپ وتىر. پرەزيدەنت قاسىم-جومارت توقاەۆ تسيفرلىق اكتيۆتەر قورىن قۇرۋدى ۇسىندى. ول قور ۇلتتىق بانكتىڭ ينۆەستيتسيالىق كورپوراتسياسى نەگىزىندە قۇرىلماق. سونىمەن قاتار مەملەكەت باسشىسى سمارت قالالاردا تسيفرلىق اكتيۆتەر ارقىلى تولەم جۇيەسىن ەنگىزۋدى قولدايتىنىن ايتتى.

«قازىرگى زامان تالابىنا ساي، كريپتواكتيۆتەرگە كوڭىل ءبولۋ قاجەت. ۇلتتىق بانكتىڭ ينۆەستيتسيالىق كورپوراتسياسى نەگىزىندە مەملەكەتتىك تسيفرلىق اكتيۆتەر قورىن قۇرۋ ورىندى»، – دەدى پرەزيدەنت توقاەۆ.

وسىلايشا، قازاقستاننىڭ تسيفرلىق دامۋعا باعىتتالعان قادامدارى مەن بەلگيامەن ورناتقان ىنتىماقتاستىعى ەكىجاقتى بايلانىستاردىڭ جاڭا ارناسىن اشىپ، ەلدىڭ وڭىرلىك جانە جاھاندىق دەڭگەيدەگى باسەكەگە قابىلەتتىلىگىن ارتتىرۋعا جول اشپاق.

Abai.kz