قازاقستاننىڭ عىلىم جانە جوعارى ءبىلىم مينيسترلىگى 2026–2027 وقۋ جىلىنا ارنالعان مەملەكەتتىك ءبىلىم بەرۋ گرانتتارى يەگەرلەرىنىڭ ءتىزىمىن جاريالادى، دەپ حابارلايدى ۆەدومستۆونىڭ ءباسپاسوز قىزمەتى.

«بيىل 75 مىڭنان استام تالاپكەر گرانت يەگەرى اتاندى. بۇل رەتتە كونكۋرس ەرەجەلەرى وزگەرىسسىز قالدى، بۇل ونىڭ اشىقتىعى مەن ادىلدىگىن قامتاماسىز ەتتى»، – دەلىنگەن حابارلامادا.

مينيسترلىكتىڭ مالىمەتىنشە، 2026 جىلى كونكۋرسقا 127 مىڭعا جۋىق ءوتىنىم بەرىلگەن، بۇل وتكەن جىلمەن سالىستىرعاندا 14 مىڭعا ارتىق.

مەملەكەتتىك ءبىلىم بەرۋ گرانتتارىنىڭ 60%-ى ينجەنەرلىك جانە تەحنيكالىق ماماندىقتارعا باعىتتالعانى اتاپ وتىلەدى. «سەرپىن» جوباسى اياسىندا 2 مىڭنان استام گرانت يەگەرى سولتۇستىك، شىعىس جانە ورتالىق قازاقستاننىڭ جوعارى وقۋ ورىندارىندا ءبىلىم الادى.

ۆەدومستۆودا گرانتتاردى ءبولۋ كەزىندە زاڭنامادا كوزدەلگەن بارلىق مەملەكەتتىك قولداۋ شارالارى ساقتالعانىن حابارلادى. ونىڭ ىشىندە الەۋمەتتىك وسال ساناتتاعى تالاپكەرلەرگە ارنالعان كۆوتالار، حالىقارالىق وليمپيادالار مەن سپورتتىق جارىستاردىڭ جەڭىمپازدارى ءۇشىن كونكۋرستان تىس گرانتتار، سونداي-اق مەرزىمدى اسكەري قىزمەتىن وتكەرگەن ازاماتتارعا ارنالعان 1816 گرانت بار.

ءبىلىم بەرۋ گرانتىن بەرۋ تۋرالى ەلەكتروندىق كۋالىكتەر ۇلتتىق تەستىلەۋ ورتالىعىنىڭ سايتىندا ءۇش جۇمىس كۇنى ىشىندە قولجەتىمدى بولادى. جوعارى وقۋ ورىندارىنا قابىلداۋ 25 تامىزعا دەيىن (قوسا العاندا) جالعاسادى.

Abai.kz