مەملەكەت باسشىسىنىڭ تاپسىرماسىمەن ءماجىلىس توراعاسى ەرلان قوشانوۆ مىرجاقىپ دۋلاتۇلىنىڭ 140 جىلدىعىنا ارنالعان ەسكەرتكىشتىڭ اشىلۋىنا قاتىستى. كورنەكتى قايراتكەر، الاشتىڭ اياۋلى پەرزەنتىنىڭ ەڭسەلى ەسكەرتكىشى قوستاناي قالاسىندا بوي كوتەردى.

سالتاناتتى ءىس-شارا بارىسىندا ءماجىلىس سپيكەرى پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى.

– ءتول تاريحىمىزدا ازاتتىق ءۇشىن ايانباي كۇرەسكەن، ۇلتتىڭ رۋحىن كوتەرۋگە ولشەۋسىز ۇلەس قوسقان تۇعىرلى تۇلعالار از ەمەس. سونىڭ ءبىرى ءارى بىرەگەيى – مىرجاقىپ دۋلاتۇلى. ول قازاقتىڭ اسقاق ارمانى مەن مۇڭ-مۇقتاجىن تەرەڭ ءتۇسىنىپ، ەل مۇددەسىنە قالتقىسىز قىزمەت ەتتى. جۇرتتىڭ سانا-سەزىمىن جاڭعىرتۋ جولىندا ەڭبەك ەتىپ، جاسامپاز رۋحتىڭ جارشىسى بولدى. ادامزاتقا ورتاق قۇندىلىقتاردى كەڭىنەن دارىپتەپ، جاستاردى ونەر-بىلىمگە ۇندەدى. مىرجاقىپ دۋلاتۇلى ادەبيەتىمىزدى جاڭا دەڭگەيگە كوتەرۋگە زور ەڭبەك ءسىڭىردى. حالقىمىزدىڭ ءبىرتۋار پەرزەنتىنىڭ قايراتكەرلىك قاسيەتى مەن ازاماتتىق ۇستانىمدارى وسكەلەڭ ۇرپاققا ءاردايىم ۇلگى-ونەگە بولارى ءسوزسىز, – دەلىنگەن پرەزيدەنت قۇتتىقتاۋىندا.

سالتاناتتى ءىس-شاراعا قوستاناي وبلىسىنىڭ اكىمى قۇمار اقساقالوۆ، ءماجىلىس دەپۋتاتتارى، زيالى قاۋىم وكىلدەرى مەن جەرگىلىكتى جۇرتشىلىق قاتىستى. قازاقستاننىڭ حالىق جازۋشىسى تولەن ابدىك پەن م.دۋلاتۇلىنىڭ جيەنى ەرلان ساتىبالديەۆ ءسوز سويلەپ، الاش قايراتكەرىنىڭ رۋحىنا تاعزىم ەتتى.

جالپى، مىرجاقىپ دۋلاتۇلىنىڭ 140 جىلدىعى وبلىس، رەسپۋبليكا دەڭگەيىندە كەڭ اۋقىمدا اتاپ وتىلۋدە. بۇگىن تورعاي اۋىلىندا حالىقارالىق ات مارافونى «ۇلى دالا جورىعى» الامان بايگەسى باستالادى. تۇلپارلار توبىل-تورعاي دالاسىن دۇبىرلەتىپ، 500 شاقىرىمدىق مارافوندا باق سىنايدى.

بۇدان بولەك، مىرجاقىپتانۋعا ارنالعان عىلىمي كونفەرەنتسيا مەن ءدۇلدۇل اقىنداردىڭ باسىن قوسقان رەسپۋبليكالىق ايتىس وتەدى.

ءماجىلىس سپيكەرى بۇل ايتۋلى ءىس-شارالار مەملەكەتتىڭ، ۇلتىنىڭ الاش ارىسىنا بەرگەن باعاسى، كورسەتكەن قۇرمەتى ەكەنىن اتاپ ءوتتى.

– ءبىز قازىر دە تاريحي، تاعدىرلى شاقتا ءومىر ءسۇرىپ جاتىرمىز. الاش ارىستارى اڭساعان تاۋەلسىزدىككە قولىمىز جەتتى. ەڭسەلى ەل بولدىق. سوڭعى جىلدارى پرەزيدەنتتىڭ جۇيەلى، كەشەندى رەفورمالارى حالقىمىزدىڭ جان جاقتى قولداۋىن تاۋىپ وتىر. ەلدەگى وڭ وزگەرىستەر قوعامنىڭ بولاشاققا دەگەن سەنىمىن نىعايتىپ كەلەدى. ءبىزدىڭ بۇگىنگى ماقساتىمىز – ادىلەتتى، قۋاتتى، تازا جانە قاۋىپسىز قازاقستاندى قۇرۋ. اينالىپ كەلگەندە، كەشەگى الاش ارىستارىنىڭ دا، بۇگىنگى ءبىزدىڭ دە ارمان-اڭسارىمىز وسى, – دەدى ەرلان قوشانوۆ.

Abai.kz