قوناەۆ قالاسىندا ۇلى ويشىل، كەمەڭگەر اقىن اباي قۇنانبايۇلىنىڭ رۋحىنا تاعزىم ەتىلىپ، ەسكەرتكىشىنە گۇل شوقتارى قويىلدى.

راسىمگە قوناەۆ قالاسىنىڭ اكىمى اسحات بەردىحانوۆ، اقىن-جازۋشىلار، ارداگەرلەر، زيالى قاۋىم وكىلدەرى مەن قالا تۇرعىندارى قاتىستى. بيىل ابايدىڭ 180 جىلدىعىنا وراي الماتى وبلىسىندا 300-دەن استام مادەني-اعارتۋشىلىق ءىس-شارا جوسپارلانىپ، ونىڭ 47-ءسى وبلىستىق جانە اۋداندىق دەڭگەيدە ۇيىمداستىرىلدى.

اباي كۇنىن اتاپ ءوتۋ اياسىندا قوناەۆ قالاسىنان باستاپ قاراساي، ىلە، تالعار، كەگەن جانە وزگە دە اۋدانداردا ادەبي كەشتەر، كورمەلەر، اباي وقۋلارى، دارىستەر، فيلم كورسەتىلىمدەرى مەن شىعارماشىلىق كەزدەسۋلەر ءوتتى. مەملەكەتتىك ارحيۆتەگى «اباي الەمى» دوڭگەلەك ۇستەلى، وبلىستىق كىتاپحاناداعى «ءسوز بەن سازدىڭ سۇلەيى – اباي» كەشى، كەگەندەگى «اباي اندەرى» ءفيلمىنىڭ كورسەتىلىمى، قاراسايداعى «اباي مۇراسى – ماڭگىلىك قازىنا» شاراسى، جاڭالىق اۋىلىنداعى اقىلبايعا ارنالعان كورمە – سونىڭ ءبىر بولىگى. ىلە، تالعار اۋداندارىندا دا اقىن مۇراسىن دارىپتەگەن ادەبي-تانىمدىق شارالار ۇيىمداستىرىلدى. وسى جۇمىستاردىڭ بارلىعى ابايدى ەسكە الۋمەن عانا شەكتەلمەي، ونىڭ بىلىمگە، ەڭبەككە، ادامگەرشىلىككە ۇندەگەن ويلارىن جاس ۇرپاققا جەتكىزۋگە باعىتتالدى.

اباي مۇراسى – ۋاقىت وتكەن سايىن ءمانى ارتا تۇسەتىن رۋحاني قازىنا. سوندىقتان ونى ۇلىقتاۋ – ءبىر كۇندىك شارا ەمەس، ۇلتتىڭ رۋحاني ساباقتاستىعىن جالعاستىراتىن ورتاق مىندەت. ابايدى وقۋ – ءوزىڭدى تانۋ. ابايدى ارداقتاۋ – ۇلتتى ۇلىقتاۋ.

Abai.kz