دۇيسەنبى كۇنى فرانتسيا پرەزيدەنتى ەممانيۋەل ماكرون نيۋ-يوركتە ءوتىپ جاتقان بۇۇ باس اسسامبلەياسىنىڭ وتىرىسىندا سويلەپ، ءوز ەلىنىڭ پالەستينا مەملەكەتىن رەسمي تۇردە مويىندايتىنىن جاريالادى.

ءوز سوزىندە ول سوعىستى بىردەن توقتاتىپ، تۇتقىنداردى بوساتۋ قاجەتتىگىن اتاپ ءوتتى.

— تۇتقىنداردى بوساتاتىن، سوعىستى جانە قايعى-قاسىرەتتى توقتاتاتىن كەز كەلدى، — دەدى فرانتسيا پرەزيدەنتى. — ءبىز بەيبىتشىلىككە قول جەتكىزۋدەن ايىرىلىپ قالۋ قاۋپىمەن بەتپە-بەت كەلدىك. سوندىقتان دا بۇگىن وسىندا جينالدىق.

ماكرون ءپاريجدىڭ بۇل شەشىمىن «بارشاعا ارنالعان بەيبىتشىلىك پەن قاۋىپسىزدىك جوسپارى مەن ساياسي ۇدەرىستىڭ باستاۋى» دەپ اتادى. ول فرانتسيانىڭ بۇل باستاماسىن بەلگيا، مالتا جانە ليۋكسەمبۋرگتىڭ قولداعانىن، بىراق G7 ەلدەرىنىڭ ىشىندە يتاليا مەن گەرمانيانىڭ ازىرگە بۇل قادامعا بارماعانىن اتاپ ءوتتى.

— بۇل — ەلىمىزدىڭ ۇلكەن ديپلوماتيالىق جەڭىسى، — دەپ مالىمدەدى فرانتسيانىڭ سىرتقى ىستەر ءمينيسترى جان-نوەل باررو.

ول ءپاريجدىڭ بۇل قادامىن حاماس-تى ءۇزىلدى-كەسىلدى قابىلداماۋ دەپ باعالادى.

الايدا ءپاريجدىڭ بۇل شەشىمى يزرايل تاراپىنان قاتاڭ سىنعا ۇشىرادى. يزرايل پرەمەر-ءمينيسترى بينيامين نەتانياحۋ يوردان وزەنىنىڭ باتىس جاعالاۋىندا پالەستينالىق مەملەكەتتىڭ قۇرىلمايتىنىن مالىمدەدى. پرەزيدەنت يتسحاك گەرتسوگ پالەستينانى مويىنداۋ «قاراڭعى كۇشتەرگە باتىلدىق بەرەدى» دەپ اتاپ ءوتتى. ءيزرايلدىڭ بۇۇ-داعى ەلشىسى بۇل وتىرىستى «تسيرك» دەپ اتادى.

ماكرون سونداي-اق گازا سەكتورىندا وتپەلى اكىمشىلىك قۇرۋدى ۇسىندى. بۇل اكىمشىلىككە پالەستينا اكىمشىلىگى قاتىسىپ، حاماس-تى تاراتۋ پروتسەسىن باقىلاۋ مىندەتى جۇكتەلمەك.

ول فرانتسيانىڭ گازا سەكتورىنداعى «تۇراقتاندىرۋ ميسسياسىنا» ۇلەس قوسۋعا دايىن ەكەنىن مالىمدەپ، بۇل ايماقتا حالىقارالىق قاۋىپسىزدىك كۇشتەرىنىڭ بولۋى مۇمكىن ەكەنىن مەڭزەدى.

سونىمەن قاتار، ماكرون فرانتسيا پالەستينادا ەلشىلىك اشۋعا تەك حاماس تۇتقىنداعى ادامداردى تولىق بوساتقان سوڭ جانە اتىستى توقتاتۋ تۋرالى كەلىسىم جاسالعاننان كەيىن عانا كىرىسەتىنىن ايتتى.

بۇعان دەيىن حابارلانعانداي، 23 قىركۇيەكتە قازاقستان پرەزيدەنتى قاسىم-جومارت توقاەۆ بۇۇ باس اسسامبلەياسىنىڭ 80-جىلدىعىنا ارنالعان جالپى پىكىرسايىستىڭ اشىلۋىنا قاتىسادى دەپ جوسپارلانعان.

Abai.kz