2025 جىلدىڭ 24 قىركۇيەگىندە پاريج قالاسىنداعى يۋنەسكو شتاب-پاتەرىندە قازاقتىڭ كورنەكتى كۇيشى-كومپوزيتورى، ديريجەر نۇرعيسا تىلەنديەۆتىڭ 100 جىلدىعىنا ارنالعان «عاسىر اۋەندەرى: تىلەنديەۆكە تاعزىم» اتتى مەرەكەلىك كونتسەرت ءوتتى.

دارا تۇلعانىڭ عاسىرلىق مەرەيتويى – تەك قازاقستان ءۇشىن ەمەس، بۇكىل الەم ءۇشىن دە ماڭىزدى وقيعا. بۇل داتا يۋنەسكو-نىڭ حالىقارالىق دەڭگەيدە اتالىپ وتەتىن مەرەيتويلار تىزىمىنە ەنگەن.

ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا، ديپلوماتيالىق كورپۋس پەن شىعارماشىلىق زيالى قاۋىم وكىلدەرى قاتىستى.

بۇگىن پاريج تورىندە، يۋنەسكو-نىڭ مارتەبەلى شتاب-پاتەرىندە قازاق حالقىنىڭ ۇلى كومپوزيتورى نۇرعيسا تىلەنديەۆتىڭ 100 جىلدىعى جوعارى دەڭگەيدە تويلانۋدا. قازاق مۋزىكاسى مەن ونەرىنىڭ يۋنەسكو اياسىندا لايىقتى باعالانۋى – مەملەكەتىمىز ءۇشىن ۇلكەن مارتەبە. نۇرعيسا تىلەنديەۆتىڭ شىعارمالارى – قازاق حالقىنىڭ رۋحاني الەمىن پاش ەتۋمەن قاتار، جالپىادامزاتتىق قۇندىلىقتاردى دارىپتەيتىن بيىك ونەر تۋىندىلارى»، – دەدى ايدا بالاەۆا قۇتتىقتاۋ سوزىندە.

ءىس-شارانىڭ باستى ماقساتى – ۇلتتىق مادەني مۇرانىڭ بايلىعىن، كوپعاسىرلىق داستۇرلەر مەن حالقىمىزدىڭ مادەنيەتىن الەمگە ناسيحاتتاۋ.

كونتسەرت باعدارلاماسىندا كومپوزيتوردىڭ تانىمال تۋىندىلارىن «وتىرار سازى» وركەسترى ورىندادى. ۇجىمنىڭ كوركەمدىك جەتەكشىسى ءارى ديريجەرى – قىزى ءدىنزۋحرا تىلەنديەۆا.

سونىمەن قاتار، يۋنەسكو ساحناسىندا قازاقستاننىڭ بەلگىلى ارتىستەرى سۆەتلانا ايتباەۆا، الىشەر كارىموۆ، فارحات كۋبيەۆ، گاۋھار جۇماعۇلوۆا، اسقار مۇقيات، اباي قويشىباەۆ، راسۋل جارمامبەتوۆ، نۇرعالىم امانباي، اياگوز حايرۋللينا، جۇلدىز بايجۇما ونەر كورسەتتى.

نۇرعيسا تىلەنديەۆتىڭ شىعارماشىلىعى قازاقستان مادەني مۇراسىنىڭ اجىراماس بولىگىنە اينالدى. ونىڭ قالامىنان 500-دەن استام مۋزىكالىق شىعارما تۋىپ، 50-دەن استام درامالىق قويىلىم مەن 20 كوركەم فيلمگە مۋزىكا جازدى.

نۇرعيسا تىلەنديەۆ اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ، قۇرمانعازى اتىنداعى حالىق اسپاپتارى اكادەميالىق وركەسترىنىڭ باس ديريجەرى قىزمەتىن اتقاردى، كەيىن ءوزى «وتىرار سازى» فولكلورلىق-ەتنوگرافيالىق وركەسترىن قۇرىپ، ۇجىمنىڭ كوركەمدىك جەتەكشىسى بولدى.

Abai.kz