شىنىمەن دە «اقاۋ» ما، الدە ۇلى كوشكە ادەيى جاسالعان كەزەكتى كەدەرگى مە؟! 

قازاقستان رەسپۋبليكاسىنىڭ ىشكى ىستەر ءمينيسترى

ە.س. سادەنوۆ مىرزاعا!

قۇرمەتتى ەرجان ساپاربەكۇلى!

كوشى-قون ساياساتىمەن ۇزاق جىلداردان بەرى تىنباي اينالىسىپ كەلە جاتقان تاجىريبەلى مامان ءارى بەلسەندى ازامات رەتىندە ماعان الىس-جاقىن شەتەلدەردەن ورالعان اعايىندار تەلەفون شالىپ، كومەك سۇراپ جاتادى.

مەن ولاردىڭ ءسوزىن جەرگە تاستاماي، زاڭ اياسىندا كومەك بەرىپ كەلەمىن. ۇلى كوشكە قاتىستى كۇردەلى ماسەلەلەردى مينيسترلىكتەردىڭ، ۇكىمەتتى، ءتىپتى پرەزيدەنتتىڭ دەڭگەيىندە شەشكەن كەزدەرىم از بولعان جوق.

سوڭعى كەزدە سول اعايىندار ساۋساق ءىزىن الاتىن اپپاراتتىڭ با، الدە بازانىڭ با ىستەمەي جاتقانىن ايتىپ، تەلەفون سوعاتىنداردىڭ قاتارى كوبەيىپ كەتتى. ءتىپتى، كۇندىز-ءتۇنى حابارلاسىپ، مازا بەرمەيتىن بولدى.

تەلەفون سوققانداردىڭ ايتۋىنا قاراعاندا، سول اقاۋدىڭ كەسىرىنەن اتاجۇرتقا ورالعان اعايىندارىمىز نە تۇراقتى تىركەۋگە تۇرا الماي، نە ازاماتتىققا قۇجات وتكىزە الماي، نە ءبىر ايلىق ۆيزاسىز تارتىپپەن كەلىپ، ۆيزالارىن ءبىر جىلعا كوپ مارتەلى ەتىپ اشتىرا الماي قاتتى قينالىپ جاتقان كورىنەدى.

وسى ماسەلەگە بايلانىستى، كەشە ءسىزدىڭ اتىڭىزعا ۆيديوۇندەۋ جاساپ، ونى TikTok جەلىسىندەگى پاراقشاما جۇكتەي قويىپ ەدىم، ەكى كۇننىڭ ىشىندە جيىرما بەس مىڭعا تاياۋ ادام كورىپتى.

سول ۆيديوۇندەۋدىڭ استىنا جازعان جۇرتتىڭ پىكىرلەرىن وقىپ، مەن كادىمگىدەي ويلانىپ قالدىم.

سونىڭ بەس-التاۋىن ءسىزدىڭ نازارىڭىزعا قاز-قالپىندا ۇسىنۋدى ءجون كوردىم:

– @جۋمابەك جارمۋحامبەت: يا بازا اقشا بەرسەڭ ىستەپ تۇر ادام باسىنا 20000;

– @جورابەك: سوندا قالاي ورىستار كەلسە 2ساعاتتا قينالماي ءالادى ءوز قازاعىمىزعا قيانات جاساپ جاتىر;

– @gulsaraiassaui: سالەم دۇرىس ۆيتاسىز بازا ىستەمەيدى دەپ سوزىپ ارتى تەڭگە الۋعا بارىپ جاتىر دۇرىس اتاسىز .

– @ابدىباقىت باكىر: دەل دالدار كوبەيىپ كەتكەن ءبارى اقشا

جەم قور لىق تىڭ ءبىر ءتۇرى كوشىپ كەلگەن

قانداستاردىڭ ايتۋىنشا كەدەرگى قايتا كوبەيگەن بازا ىستەمەۋ سىلتاۋ

– @Erturk Eltemir: بازا ىستەپ تۇر تەك قارا قىتايلارعا. ۇيىتكەنى ولار قوماقتى اقشا بەرەدى;

– @eldan603: كەشە قاپشاعايدا سۇمدىق جاعدايعا تاپ بولدىم！بازا يستەمەي جاتىر دەپ بىرنەشە رەت بارعان الام قۇجات اراسىنا10مىڭ تەڭگە سالىپ بەرگەندە دەرەۋ قابىلداعان ！بۇل ءبىر ماسقارا جاعداي！جەمقورلىق تاپ تازا...

قۇرمەتتى ەرجان ساپاربەكۇلى!

سوندا، بۇل شىنىمەن دە تەحنيكالىق اقاۋ ما، الدە ۇلى كوشكە جاسالىپ وتىرعان كەزەكتى ءبىر كەدەرگى مە؟!

اقاۋ بولسا، ونى جوندەۋ نەگە سونشا ۇزاققا سوزىلىپ كەتتى؟!

ساۋساق بەدەرىن الۋعا قاتىستى ونداي ساپاسىز اپپاراتتى كىم قايدان الدى نەمەسە جۇمىس ىستەۋگە جارامسىز بازانى كىم جاسادى؟!

جوق، بۇل اقاۋ اقشا تابۋ ءۇشىن جاسالىپ وتىرعان قيتۇرقىلىق پا؟!

ءتىپتى، اپپاراتتان نەمەسە بازادان شىنىمەن  اقاۋ شىققان بولسا، وندا جەرگىلىكتى كوشى-قون قىزمەتى پوليتسيا بولىمدەرى ازاماتتاردىڭ ساۋساق ءىزىن الۋ جۇمىسىن كەيىنگە قالدىرا تۇرىپ، ولاردىڭ قۇجاتتارىن قابىلداي بەرسە بولماي ما؟! كەيىن، اپپارات نەمەسە بازا ىسكە قوسىلعاندا ولاردى شاقىرىپ، ساۋساق ىزدەرىن الىپ، بازاعا ەنگىزىپ قويۋ – قانشالىقتى قيىن شارۋا؟!!

قۇرمەتتى ەرجان ساپاربەكۇلى!

سىزدەن وسى ماسەلەنى ءوزىڭىزدىڭ نازارىڭىزعا الىپ، جوعارىداعى سۇراقتارعا ءبىر-بىردەن ناقتى جاۋاپ بەرۋىڭىزدى، سونداي-اق اتالعان ماسەلەنى تەزدەتىپ شەشۋگە ىقپال ەتۋىڭىزدى سۇرايمىن!

قۇرمەتپەن، اۋىت مۇقيبەك،

«قۇرمەت» وردەنىنىڭ يەگەرى

Abai.kz