جامبىل اۋدانىنداعى تەمىرجول اۋىلدىق وكرۋگىندە «قازىبەك بەك» يندۋستريالىق ايماعىنىڭ اشىلۋى ءوتتى.

سالتاناتتى ءىس-شاراعا ىسكەرلىك ورتا وكىلدەرى، ينۆەستورلار، جەرگىلىكتى اتقارۋشى ورگاندار مەن ءوڭىر تۇرعىندارى قاتىستى. يندۋستريالىق ايماقتىڭ جالپى اۋماعى 900 گەكتاردى قۇرايدى. نەگىزگى باعىتتارى – مەتاللۋرگيا جانە مەتالل وڭدەۋ، قۇرىلىس ماتەريالدارىن شىعارۋ، ماشينا جاساۋ جانە ونەركاسىپتىك جابدىق ءوندىرىسى، سونداي-اق جۇك ساقتاۋ قىزمەتتەرى. جوبانى ىسكە اسىرۋ مەرزىمى 2027–2029 جىلدارعا جوسپارلانعان.

اشىلۋ راسىمىندە ءسوز سويلەگەن الماتى وبلىسىنىڭ اكىمى مارات سۇلتانعازيەۆ يندۋستريالىق ايماقتىڭ قۇرىلۋى ءوڭىر مەن تۇتاس ەل ەكونوميكاسىن دامىتۋداعى ماڭىزدى قادام ەكەنىن اتاپ ءوتتى.

«قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ 2025 جىلعى 8 قىركۇيەكتەگى قازاقستان حالقىنا جولداۋىندا: «وڭدەۋشى ونەركاسىپتىڭ دامۋىنا جاڭا سەرپىن بەرەتىن ۋاقىت كەلدى»، – دەپ اتاپ وتكەن بولاتىن. مەملەكەت باسشىسى الماتى، قوستاناي، قاراعاندى جانە اتىراۋ وبلىستارىندا ىسكە قوسىلعان ءىرى ماشينا جاساۋ جانە مەتاللۋرگيا كاسىپورىندارىن مىسالعا كەلتىردى. سونىمەن بىرگە، بۇل جۇمىستار جەتكىلىكسىز ەكەنىن ايتىپ، ەكونوميكانى ءارتاراپتاندىرۋدى جەدەلدەتۋدىڭ ماڭىزدىلىعىن ەرەكشە اتاپ ءوتتى. وسى تۇرعىدا نەگىزگى باسىمدىق – ىشكى جانە سىرتقى نارىقتاردا باسەكەگە قابىلەتتى، تەرەڭ وڭدەلگەن ءونىم ءوندىرۋ. بۇگىن اشىلعان «قازىبەك بەك» يندۋستريالىق ايماعى – وسى مىندەتتەردىڭ ناقتى جۇزەگە اسۋىنىڭ كورىنىسى جانە ءوڭىر ەكونوميكاسىنىڭ جاڭا سەرپىنىنە اينالارىنا سەنىمدىمىن»، – دەدى وبلىس اكىمى.

مارات سۇلتانعازيەۆ، سونداي-اق، اتالعان باستامانى العاشقىلاردىڭ ءبىرى بولىپ قولداعان ينۆەستورلار مەن سەرىكتەستەرگە العىس ءبىلدىرىپ، الداعى ۋاقىتتا وبلىس اكىمدىگى كاسىپكەرلەرگە جان-جاقتى قولداۋ كورسەتىپ، ينفراقۇرىلىمدى دامىتىپ، بيزنەس جۇرگىزۋ ءۇشىن قولايلى جاعداي جاسايتىنىن اتاپ ءوتتى. ونىڭ ايتۋىنشا، زاماناۋي يندۋستريالىق ايماق جاڭا ينۆەستيتسيالار تارتۋعا، وندىرىستىك سەكتوردى كەڭەيتۋگە، جاڭا جۇمىس ورىندارىن اشۋعا، يننوۆاتسيالىق جوبالاردى ەنگىزۋگە، باسەكەگە قابىلەتتى ءونىم شىعارۋعا جانە ەكسپورتتىق الەۋەتتى ارتتىرۋعا جول اشادى.

سۋرەت: الماتى وبلىسى اكىمدىگىنىڭ ءباسپاسوز قىزمەتىنەن الىندى.

بۇگىنگى تاڭدا «قازىبەك بەك» يندۋستريالىق ايماعىنا جالپى قۇنى 454 ملرد تەڭگەنى قۇرايتىن 11 قاتىسۋشى تارتىلعان. بۇل جوبالاردى جۇزەگە اسىرۋ ناتيجەسىندە 2495 جاڭا جۇمىس ورنى اشىلادى.

ينۆەستورلاردىڭ ءبىرى – «KAZAKZSTANYULIN IRRIGATION EQUIPMENT» جشس جوباسىنىڭ جەتەكشىسى ءارى باس ديرەكتوردىڭ ورىنباسارى سەرىكجان بولاتۇلى نۇرسەيىتوۆ ءوندىرىس ورنىن اشۋعا قولداۋ كورسەتكەن وبلىس اكىمدىگىنە العىسىن ءبىلدىرىپ، جوبانىڭ بولاشاعىنا سەنىمدى ەكەنىن جەتكىزدى.

«بىزگە جەر تەلىمىن ءبولىپ بەرگەنى ءۇشىن الماتى وبلىسىنىڭ اكىمدىگىنە العىس ايتامىز. ءبىزدىڭ جوبامىز – اۋىل شارۋاشىلىعى تەحنيكاسىنىڭ كەڭ سپەكترىن شىعاراتىن زاماناۋي زاۋىت قۇرۋ. مۇندا وسىمدىك شارۋاشىلىعىنا ارنالعان ماشينالار، جاڭبىرلاتىپ سۋارۋ قوندىرعىلارى، مال شارۋاشىلىعى تەحنيكاسى، سۇيىق جانە قاتتى تىڭايتقىش ەنگىزۋگە ارنالعان جابدىقتار، سونداي-اق جوڭىشقانى ۇنتاقتايتىن ارنايى ماشينالار جانە باسقا دا تەحنيكا وندىرىلەدى. زاۋىت زاماناۋي تەحنولوگيالارمەن جابدىقتالادى، جىلدىق قۋاتتىلىعى – 500 دانا اۋىل شارۋاشىلىعى تەحنيكاسى. ونىمدەردى ەنگىزۋ شارۋالاردىڭ يمپورتقا تاۋەلدىلىگىن ازايتىپ، ونىمدىلىكتى ارتتىرۋعا مۇمكىندىك بەرەدى. بۇل جوبا ءوڭىر يندۋسترياسىنىڭ دامۋىنا سەرپىن بەرىپ، ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋگە زور ۇلەس قوسادى دەپ سەنەمىز»، – دەدى سەرىكجان بولاتۇلى.

سۋرەت: الماتى وبلىسى اكىمدىگىنىڭ ءباسپاسوز قىزمەتىنەن الىندى.

قازىرگى تاڭدا الماتى وبلىسىنىڭ ينۆەستيتسيالىق پورتفەلىندە جالپى قۇنى 6,3 ترلن تەڭگەنى قۇرايتىن 229 جوبا بار. 2025 جىلى 302,7 ملرد تەڭگە كولەمىندەگى 35 جوبانى ىسكە قوسۋ جوسپارلانعان. ولار ونەركاسىپ، اۋىل شارۋاشىلىعى، تۋريزم جانە ينفراقۇرىلىم سالالارىن قامتيدى جانە ءوڭىردىڭ الەۋمەتتىك-ەكونوميكالىق دامۋىنا ايتارلىقتاي ۇلەس قوسۋدا.

ايتا كەتەيىك، الماتى وبلىسى – قازاقستانداعى ەڭ سەرپىندى دامىپ كەلە جاتقان وڭىرلەردىڭ ءبىرى. قىتاي جانە قىرعىزستانمەن شەكتەسەتىن قولايلى گەوگرافيالىق ورنالاسۋى، دامىعان كولىك-لوگيستيكالىق ينفراقۇرىلىمى مەن ينۆەستيتسيالىق احۋالى تۇراقتى وسىمگە مۇمكىندىك بەرىپ وتىر.

Abai.kz