جەتىسۋ وبلىسىندا «تازا قازاقستان» ەكولوگيالىق باعدارلاماسى اياسىندا ۇلى وتان سوعىسىنداعى جەڭىستىڭ 80 جىلدىعىنا ارنالعان «ارداگەرلەرگە تاعزىم» اتتى اعاش وتىرعىزۋ شاراسى ءوتتى.

اكتسيا تۋرالى «TAZA ECO» كلۋبىنىڭ ەرىكتىسى ەركەناز كەنجەبەكوۆا ءوز ويىمەن ءبولىستى:

- بۇل جاي عانا سەنبىلىك ەمەس. شارانىڭ باستى ماقساتى – ۇلى وتان سوعىسى ارداگەرلەرىنىڭ رۋحىنا تاعزىم ەتۋ، ەرلىگىنە قۇرمەت ءبىلدىرۋ جانە جاس ۇرپاقتىڭ بويىندا تۋعان جەرگە دەگەن سۇيىسپەنشىلىكتى قالىپتاستىرۋ. ءاربىر وتىرعىزىلعان اعاش باتىرلارىمىزدىڭ ەرلىگىن ۇمىتتىرمايتىن ءتىرى ەسكەرتكىش رەتىندە كورۋگە بولادى. وسى شارا ارقىلى تۇرعىنداردىڭ تابيعاتقا دەگەن جاناشىرلىق سەزىمى ارتىپ، ءوڭىردىڭ ەكولوگيالىق احۋالى جاقسارىپ، قوعامدى ەكولوگيالىق مادەنيەتكە تاربيەلەۋ جولىندا تاعى ءبىر قادام جاسالدى دەپ بىلەمىز. بۇگىن وتىرعىزعان تالدار جىل وتكەن سايىن ءوسىپ، تامىرىن جايىپ، بەيبىت كۇننىڭ قۇنىن ۇعىنۋعا، تاريحتى ەستەن شىعارماۋعا ۇندەيتىن بولادى، - دەدى ول.

ۇيىمداستىرۋشىلاردىڭ ايتۋىنشا، «تازا قازاقستان» ەكولوگيالىق باعدارلاماسى بۇگىندە ەل ىشىندە تابيعاتتى قورعاۋ ءداستۇرىن قالىپتاستىرىپ، حالىقتىڭ ەكولوگيالىق جاۋاپكەرشىلىگىن ارتتىرىپ كەلەدى.

Abai.kz