2 قاراشادا نورۆەگيانىڭ فەردە قالاسىندا اۋىر اتلەتيكادان الەم چەمپيوناتى باستالادى. جاڭا سالماق دارەجەلەرىنىڭ ەنگىزىلۋى بيىلعى الەم بىرىنشىلىگىنىڭ باستى ەرەكشەلىگى بولماق. بۇل وزگەرىس ءار سالماقتاعى باسەكەلەستىك دەڭگەيىن ايتارلىقتاي وزگەرتتى. قازاقستان بۇل جولى الەم چەمپيوناتىنا شاعىن قۇراممەن اتتاندى. تولىعىراق Olympic.kz ماتەريالىندا.

2024 جىلعى الەم بىرىنشىلىگىندە ۇلتتىق قۇراما ءۇش جۇلدەگە قول جەتكىزگەن ەدى. نۇرعيسا ادىلەتۇلى (96 كەلىگە دەيىن) مەن ارتەم انتروپوۆ (102 كەلىگە دەيىن) التىننان القا تاقسا، الەكسەي چۋركين (81 كەلىگە دەيىن) كۇمىس جۇلدەگەر اتاندى.

الايدا نورۆەگيادا سول جۇلدەگەرلەردىڭ ەشقايسىسى جارىس تۇعىرىنا شىقپايدى. بۇعان قوسا، قازاقستان ايەلدەر قۇراماسى دا قاتىسپايدى. باپكەرلەر شتابى شاعىن قۇرامدى جىبەرۋگە شەشىم قابىلدادى. سەبەبى باسقا جارىستارعا باسىمدىق بەرىلىپ وتىر. سونىڭ ىشىندە 7-21 قاراشا ارالىعىندا ەر-ريادتا (ساۋد ارابياسى) وتەتىن يسلام ىنتىماقتاستىعى ويىندارى بار.

وسىعان بايلانىستى 2025 جىلعى الەم چەمپيوناتىندا ەل نامىسىن بار بولعانى ءتورت سپورتشى قورعايدى. ولار ءۇش سالماق دارەجەسىندە سىنعا تۇسەدى.

79 كەلىگە دەيىن: ەدىگە ەمبەردى، پەتر حرەبتوۆ

88 كەلىگە دەيىن: الىبەك راحىمبەردى

110 كەلىگە دەيىن: سۇلتان مەيرام

ءبىزدىڭ اۋىر اتلەتتەرگە جۇلدە ءۇشىن تالاس وڭايعا سوقپايدى. ونىڭ ۇستىنە، الەم چەمپيوناتى الدىندا ءار سالماقتاعى جاعداي تۇسىنىكسىز بولىپ تۇر. سەبەبى بيىلدان باستاپ جاڭا سالماق دارەجەلەرى ەنگىزىلگەندىكتەن، ايقىن فاۆوريتتەردى اتاۋ قيىن.

كوپتەگەن اۋىر اتلەت وزدەرىنىڭ بۇرىنعى سالماق دارەجەسىن وزگەرتۋگە ءماجبۇر بولدى. ءبىرى سالماعىن تومەندەتسە، ەندى ءبىرى كەرىسىنشە، جوعارىلاتۋدى تاڭدادى. سونىڭ ناتيجەسىندە ادەتتەگى جارىس ءتىزىمى تۇبەگەيلى وزگەردى. سوندىقتان ساراپشىلار فاۆوريتتەردى نەگىزىنەن ولاردىڭ تاجىريبەسى مەن اتاقتارىنا قاراي باعالاپ وتىر.

قازاقستان قۇراماسىنان ەدىگە ەمبەردىگە ءۇمىت ارتىلۋدا. ول - ا توبىنا ەنگەن ۇلتتىق قۇراماداعى جالعىز سپورتشى. وتكەن جىلى جاستار اراسىندا وتكەن الەم چەمپيوناتىندا (89 كەلىگە دەيىن) توپ جارسا، بيىل جازدا ازيا رەكوردىن جاڭارتىپ، سارى قۇرلىق بىرىنشىلىگىندە جەڭىمپاز اتاندى. ەندى العاش رەت ەرەسەكتەر اراسىندا وتەتىن الەمدىك دودادا باق سىنايدى.

"باستى ماقساتىم - بيىل ءىرى حالىقارالىق جارىستاردىڭ بىرىندە جەڭىسكە جەتۋ. بولاشاقتا ودان دا جوعارى جەتىستىكتەرگە ۇمتىلامىن. ەڭ باستىسى - بابىمدى قالپىنا كەلتىرىپ، دايىندىقتى كۇشەيتىپ، 2028 جىلعى وليمپياداعا جولداما الۋ", - دەگەن ەدى ەدىگە سارى قۇرلىق بىرىنشىلىگىنەن كەيىن.

دەگەنمەن، نورۆەگيادا جۇلدە الۋ وڭاي ەمەس. اسىرەسە ەمبەردى مەن حرەبتوۆقا (ۆ توبى) كىل مىقتىلار قارسىلاس بولادى. ولاردىڭ ديۆيزيونى - چەمپيوناتتاعى ەڭ تارتىستى توپتىڭ ءبىرى. قارسىلاستاردىڭ قاتارىندا وليمپيادا-2024 جەڭىمپازى ريزكي دجۋنيانسيان (يندونەزيا), 2024 جىلعى الەم چەمپيونى ري چون سون (كحدر), 2023 جىلعى الەم چەمپيونى، ءۇش دۇركىن ەۋروپا چەمپيونى وسكار مارتينەس (يتاليا), مىسىرلىق جاس دارىن موحاممەد ەلسايەد بار. ساراپشىلار ەمبەردىگە دە باسىمدىق بەرىپ وتىر.

الىبەك راحىمبەردى ۆ توبىندا ونەر كورسەتەدى. ونىڭ سالماعىندا ايقىن فاۆوريت جوق. بىراق قارسىلاستارىنىڭ اراسىندا الەم چەمپيوناتتارىنىڭ جۇلدەگەرلەرى – رەل كۆان رو (كحدر), مارين روبۋ (مولدوۆا), سونداي-اق يراندىق جاس سپورتشى يليا سالەحيپۋر مەن بوسنيا وكىلى ادرانيك كاراپەتيان بار.

سۇلتان مەيرام بولسا، س توبىندا سىنعا تۇسەدى. 110 كەلىگە دەيىنگى سالماقتا مەدال ءۇشىن تالاسقا ءتۇسۋ قيىن بولماق. ادەتتە جۇلدەلەردى ا توبىنىڭ سپورتشىلارى ءوزارا بولىسەدى. بۇل توپتا وزبەكستاندىق وليمپيادا چەمپيوندارى رۋسلان نۋرۋدينوۆ پەن اكبار دجۋراەۆ باستى ۇمىتكەرلەردىڭ قاتارىندا. ايتا كەتسەك، دجۋراەۆ توكيو-2024 وليمپياداسىندا كۇمىس العان، ال نۋرۋدينوۆ الەم چەمپيونى اتانعان. بۇلاردان بولەك، ارمەنيالىق گاريك كاراپەتيان دا حالىقارالىق تۋرنيرلەردى جوعارى ناتيجە كورسەتۋدە.

ايتا كەتەيىك، قىتاي قۇراماسى مەن بىرقاتار الەمدىك كوشباسشى نورۆەگياعا بارمايدى. ءبىرى سپورتتىق مانسابىن اياقتاسا، ەندى ءبىرى قاراشادا وتەتىن قىتاي ۇلتتىق ويىندارىنا دايىندالۋدى ءجون كورگەن. سوندىقتان بۇل چەمپيوناتتا ەكىنشى قۇرامداعى سپورتشىلاردىڭ باسەكەسى تارتىستى بولماق.

العاش بولىپ 6 قازان كۇنى حرەبتوۆ پەن ەمبەردى زىلتەمىر كوتەرۋگە شىعادى. 7 قازاندا - راحىمبەردى، ال 10 قازاندا سۇلتان مەيرام باق سىنايدى.

Abai.kz