اقش پرەزيدەنتى دونالد ترامپتىڭ نوبەل بەيبىتشىلىك سىيلىعىن الۋعا دەگەن نيەتى كوپشىلىككە بۇرىننان بەلگىلى. بۇل نيەتتەن الەم كوشباسشىلارى دا حاباردار.

يزرايل پرەمەر-ءمينيسترى بينيامين نەتانياحۋ جۋىردا ترامپتى وسى بەدەلدى ماراپاتقا ۇسىنعانىن ايتىپ، نوبەل كوميتەتىنە جولداعان حاتىنىڭ كوشىرمەسىن پرەزيدەنتكە ءوز قولىمەن تاپسىردى.

BBC-ءدىڭ اق ۇيدەگى ءتىلشىسى بەرند دەبۋسماننىڭ حابارلاۋىنشا، ترامپتىڭ بۇل باعىتتاعى ۇمتىلىسى بيىلعى نوبەل بەيبىتشىلىك سىيلىعىنىڭ يەگەرىن انىقتاۋ الدىنداعى باستى تاقىرىپتاردىڭ بىرىنە اينالدى.

الايدا ساراپشىلاردىڭ پىكىرىنشە، ترامپتىڭ شىن مانىندە بۇل سىيلىققا لايىق بولۋ مۇمكىندىگى وتە تومەن. سەبەبى نورۆەگيانىڭ نوبەل كوميتەتى بەيبىتشىلىكتىڭ تۇراقتىلىعىن، حالىقارالىق ىنتىماقتاستىقتى جانە وسى ماقساتتا ءۇنسىز، بىراق جۇيەلى ەڭبەك ەتىپ جۇرگەن ۇيىمداردىڭ ۇلەسىن جوعارى باعالايدى. ال ترامپتىڭ كوپجاقتى ينستيتۋتتارعا دەگەن سالقىن كوزقاراسى مەن جاھاندىق كليمات وزگەرىسىنە نەمقۇرايدى ۇستانىمى ونىڭ بەدەلىنە كەرى اسەر ەتۋى مۇمكىن.

سوعان قاراماستان، ترامپ بۇل تاقىرىپتى ءجيى قوزعاپ كەلەدى. ول سوڭعى سوزدەرىنىڭ بىرىندە بىرىككەن ۇلتتار ۇيىمى مىنبەرىنەن:
«بارلىعى مەن نوبەل بەيبىتشىلىك سىيلىعىن الۋىم كەرەك دەيدى» – دەپ مالىمدەدى.

ترامپتىڭ كانديداتۋراسىن بۇعان دەيىن اقش كونگرەسىندەگى رەسپۋبليكالىق پارتيا وكىلدەرى مەن بىرنەشە ەۋروپالىق ساياساتكەرلەر دە ۇسىنعان. 2018 جىلى ونى سولتۇستىك كورەيامەن يادرولىق شيەلەنىستى باسەڭدەتۋ ارەكەتتەرى ءۇشىن، ال 2021 جىلى تاياۋ شىعىستاعى باستامالارى ءۇشىن نوميناتسيالاعان.

دەگەنمەن، 2018 جىلى نورۆەگيا نوبەل كوميتەتى ترامپتىڭ اتىنا بەرىلگەن كەي ۇسىنىستاردىڭ جالعان بولعانىن انىقتاعان — بىرەۋ ۇرلانعان جەكە دەرەكتەردى پايدالانىپ، پرەزيدەنتتى ەكى رەت نوميناتسيالاعان ەكەن.

ايتا كەتسەك، نوبەل سىيلىعىنا كانديداتتاردى مەملەكەت باسشىلارى، ۇلتتىق دەڭگەيدەگى ساياساتكەرلەر، ۋنيۆەرسيتەت پروفەسسورلارى، سىرتقى ساياسات ينستيتۋتتارىنىڭ جەتەكشىلەرى مەن بۇرىنعى لاۋرەاتتار ۇسىنا الادى.

قازىر ترامپ وسلونىڭ نازارىن اۋدارۋ ءۇشىن بۇرىنعىدان دا بەلسەندى ارەكەت ەتۋدە. 10 قازاندا جاريالاناتىن نوبەل بەيبىتشىلىك سىيلىعىنىڭ يەگەرىن اسىعا كۇتىپ جۇرگەن ول، ءوز ايتۋىنشا، الەمدەگى ەڭ كۇردەلى قاقتىعىستاردىڭ ءبىرى سانالاتىن جاعدايدى شەشۋگە باعىتتالعان «گازاداعى بەيبىتشىلىك جونىندەگى 20 تارماقتى جوسپارىن» تانىستىردى.

پرەزيدەنتتىڭ سوزىنە سەنسەك، بۇل باستاما تەك قانا تاياۋ شىعىستا بەيبىتشىلىك ورناتۋعا ەمەس، سونىمەن قاتار وعان ساياسي مانسابىنىڭ ەڭ مارتەبەلى ماراپاتى سانالاتىن نوبەل سىيلىعىن اپەرۋگە دە جول اشپاق.

Abai.kz