الماتى وبلىسىنىڭ ەگىنشىلەرى مەن فەرمەرلەرى  مەگاپوليس تۇرعىندارىنا 200 توننادان استام جاڭا جانە ەكولوگيالىق تازا اۋىل شارۋاشىلىعى ونىمدەرىن ۇسىنادى. ساۋدا سورەلەرىنە ەت، بالىق، ءسۇت ونىمدەرى، كوكونىس، جەمىس-جيدەك، بال، كۇرىش، جۇمىرتقا جانە ايماقتان وندىرىلگەن وزگە دە تاۋارلار شىعارىلادى.

اۋقىمدى اۋىل شارۋاشىلىعى جارمەڭكەسى قازاننىڭ 18–19 كۇندەرى الماتى قالاسىندا، قازىبەك بي كوشەسىندە (ابىلاي حان داڭعىلىنان پانفيلوۆ كوشەسىنە دەيىن، كبتۋ تومەنگى جاعىندا) وتەدى. بۇل شارا قالا تۇرعىندارى مەن قوناقتارى ءۇشىن ساپالى ءارى تابيعي ونىمدەردى نارىق باعاسىنان 15%-عا ارزان ساتىپ الۋعا تاماشا مۇمكىندىك بولماق.

سۋرەت: الماتى وبلىسى اكىمدىگىنەن الىندى.

جارمەڭكەگە جالپى 16 توننا ەت، 1,6 توننا ءسۇت ونىمدەرى، 18,6 توننا كارتوپ، 19,5 توننا پياز، 36,2 توننا ءتۇرلى كوكونىس، 6 توننا كۇرىش، 3,3 توننا بال، 26 توننا الما مەن جەمىس-جيدەك، سونداي-اق 50,5 توننا باسقا دا ءونىم جەتكىزىلەدى.

شارا الماتى وبلىسى مەن الماتى قالاسى اكىمدىكتەرىنىڭ قولداۋىمەن ۇيىمداستىرىلىپ وتىر. جارمەڭكەنىڭ باستى ماقساتى — وتاندىق وندىرۋشىلەردى قولداۋ، ىشكى نارىقتى دامىتۋ جانە تۇرعىنداردى قولجەتىمدى ءارى ساپالى اۋىل شارۋاشىلىعى ونىمدەرىمەن قامتاماسىز ەتۋ.

Abai.kz