الماتىدا ءال-فارابي داڭعىلى بويىنداعى اكادەميالىق قالاشىق تۇرعىندارى ۇيلەرىنىڭ ىرگەسىندە جوسپارلانعان قۇرىلىسقا قارسى شىعىپ، بيلىكتەن كومەك سۇراعان ەدى. الەۋمەتتىك جەلىدە تاراعان بەينەۇندەۋدە ولار جاڭا نىساننىڭ قالا قۇرىلىسى نورمالارىنا قايشى كەلەتىنىن ايتقان. وسىعان بايلانىستى Saba Group كومپانياسىنىڭ پرەزيدەنتى ءىلياس قاربوزوۆ تۇسىنىكتەمە بەردى.

(سۋرەت:https://dalanews.kz/)

كومپانيا توراعاسىنىڭ سوزىنشە، جەر تەلىمى نۇكتەلى قۇرىلىسقا جاتپايدى. بۇل جەرگىلىكتى جانە شەتەلدىك ينۆەستورلاردىڭ قاتىسۋىمەن جۇزەگە اسىرىلىپ جاتقان ينۆەستيتسيالىق جوبا. ونىڭ اياسىندا كوپدەڭگەيلى اۆتوتۇراق، جاسىل ايماقتار مەن دەمالىس الاڭدارى، كولىك جانە جاياۋ جۇرگىنشى جولدارى قاراستىرىلعان.

“جوبا ماقساتى: قالانىڭ ينفراقۇرىلىمىن دامىتۋ، جاڭا جۇمىس ورىندارىن اشۋ جانە سالىق تۇسىمدەرىن ارتتىرۋ. الماتىدا تۋريزم قارقىندى دامىپ كەلەدى، ءارى كەلۋشىلەر سانى دا جىل سايىن ءوسىپ جاتىر. وكىنىشكە قاراي،  قوناقۇيلەردىڭ كوبى توزعان، قازىرگى نومىرلەر زامان تالابىنا ساي ەمەس. سوندىقتان جاڭا نىسان تۋريستەرگە قولايلى جاعداي جاساۋعا باعىتتالعان”، – دەيدى كاربوزوۆ

ايتۋىنشا، قۇرىلىس جوباسى الماتى قالاسىنىڭ جاڭا قۇرىلىس ەرەجەلەرىنە ساي دايىندالعان جانە قالا قۇرىلىسى كەڭەسىنىڭ وڭ قورىتىندىسىن العان.

سونىمەن قاتار ول جوبا تۇرعىنداردىڭ پىكىرىنەن كەيىن قايتا قارالىپ، بىرقاتار تۇزەتۋ ەنگىزىلگەن اتاپ ءوتتى.

“باستاپقىدا توعىز قاباتتى عيماراتتار سالۋ كوزدەلگەن ەدى. بىراق تۇرعىنداردىڭ وتىنىشىنەن كەيىن ءبىز جوبانى وزگەرتىپ، بيزنەس ورتالىقتىڭ بيىكتىگىن بەس قاباتقا دەيىن تومەندەتتىك. سونىمەن قاتار قوناقۇيدىڭ ورنالاسۋ باعىتى دا وزگەرتىلدى”، – دەدى كومپانيا باسشىسى.

ءتىپتى كومپانيا وكىلدەرى تۇرعىندارمەن بىرنەشە رەت كەزدەسىپ، ولاردىڭ وتىنىشتەرىن ەسكەرگەن.

“جەرگىلىكتى تۇرعىندار “جول مەن وتكەل جابىلىپ قالادى” دەپ ۋايىمدادى. قازىر ءبىز سول وتكەل مەن جولدى قالپىنا كەلتىردىك، ءتىپتى جاڭا جاياۋ جۇرگىنشىلەر جولىن جاسادىق. باس جوسپاردا ءبارى ناقتى كورسەتىلگەن: تۇرعىندار ءوز ۇيلەرىنە ەركىن قاتىناي الادى، كولىكتەر ءۇشىن دە بولەك اينالما جول قاراستىرىلعان”، – دەدى ول.

تەكتونيكالىق جارىلىم جانە قاۋىپسىزدىك

كومپانيا جەر ۋچاسكەسىنىڭ تەكتونيكالىق تۇرعىدان قاۋىپسىز ەكەنىن دە اتاپ ءوتتى.

“كەيبىر تۇرعىندار بۇل اۋماق تەكتونيكالىق جارىلىم ايماعىندا ورنالاسقان دەپ ايتىپتى. بىراق بۇل اقپارات شىندىققا جاناسپايدى. رەسمي كارتا بويىنشا جارىلىم جولدىڭ ارعى بەتىمەن وتەدى، ءبىزدىڭ جەرگە قاتىسى جوق”، – دەدى كاربوزوۆ.

(سۋرەت:https://dalanews.kz/)

ينجەنەرلىك جەلىلەر مەن قۇجاتتار

Saba group توراعاسىنىڭ ايتۋىنشا، قۇرىلىسقا دەيىنگى بارلىق ينجەنەرلىك جەلىلەر مەن قۇجاتتار مۇقيات زەرتتەلگەن.

“جەردى ساتىپ الماس بۇرىن ءبىز بارلىق تەحنيكالىق جانە زاڭدى قۇجاتتاردى تەكسەردىك. ۋچاسكەنىڭ ماقساتتى نىسانالى پايدالانۋى مەن جوسپارلاۋ جوباسى قالانىڭ باس جوسپارىنا تولىق ساي. ينجەنەرلىك جەلىلەردىڭ ءبارى بولەك ورنالاسقان، تۇرعىن ۇيلەردىڭ جۇيەلەرىنە ەشقانداي جۇكتەمە تۇسپەيدى”، – دەپ ءتۇسىندىردى ول.

قازىر جوبا وزگەرگەندىكتەن، كومپانيا ونى قايتادان مەملەكەتتىك ساراپتامادان وتكىزۋدى جوسپارلاپ وتىر.

ء“بىز جوبانى جاڭارتتىق، سوندىقتان قايتا ساراپتاماعا جىبەرەمىز. قۇجاتتار تولىق راسىمدەلگەن سوڭ عانا قۇرىلىس باستالادى”، – دەدى ول.

قۇرىلىس مەرزىمى

كومپانيا قۇرىلىس جۇمىستارىن 2026 جىلدىڭ ەكىنشى توقسانىندا باستاۋدى كوزدەپ وتىر.

ء“بىر جارىم جىلدىڭ ىشىندە نىساندى تولىق اياقتايمىز”، – دەدى كاربوزوۆ.ايتۋىنشا، جەردەگى كوگالدارعا قاتىستى دا تۇرعىنداردىڭ ۋايىمى ەسكەرىلگەن.

ء“يا، بەلگىلى ءبىر بولىگى، شامامەن 400 اعاش پەن بۇتانى الىپ تاستايمىز. بىراق ورنىنا 4 مىڭنان استام اعاش پەن گۇلزارلار وتىرعىزىلادى. بۇل — زاڭعا ساي وتەمدىك كوگالداندىرۋ شاراسى. ءبىزدىڭ ماقسات ايماقتى كوركەيتىپ، دەمالۋعا قولايلى ايماق قالىپتاستىرۋ”، – دەدى ول.

كومپانيانىڭ تۇرعىندارمەن بايلانىسى

كومپانيا تۇرعىندارمەن تىكەلەي بايلانىس ورناتقانىن دا مالىمدەدى.

ء“بىز تۇرعىندارمەن ۇنەمى بايلانىستامىز. ۆاتساپ چات بار، وندا ءبىزدىڭ وكىلدەر بارلىق سۇراققا جاۋاپ بەرەدى. كوپشىلىگى كەزدەسۋگە كەلمەيدى. الايدا ءبىز جۇما كۇنى اكىمدىك وكىلدەرىمەن بىرگە تاعى ءبىر كەزدەسۋ وتكىزۋدى جوسپارلاپ وتىرمىز. ماقساتىمىز ءوزارا تۇسىنىستىككە كەلۋ”، – دەيدى SABA GROUP ديرەكتورى.

الماتى اكىمدىگىنىڭ جاۋابى

ايتا كەتەيىك، كۇنى كەشە بۇل ماسەلەگە قاتىستى الماتى قالاسى اكىمىنىڭ ورىنباسارى بەيبىت شاحانوۆ تۇسىنىكتەمە بەرگەن ەدى.

ونىڭ ايتۋىنشا، اتالعان نىسان قالا قۇرىلىسى قۇجاتتارىنا تولىق سايكەس كەلەدى، جانە ازىرگە زاڭدىلىعىنا قاتىستى كۇمان جوق.

(سۋرەت:https://dalanews.kz/)

“بۇل جوبانى جۇزەگە اسىرۋعا الدىن الا رۇقسات بار، سەبەبى ول قالانىڭ باس جوسپارى مەن دەتالدى جوسپارلاۋ قۇجاتتارىنا ساي كەلەدى. مۇندا كەڭسەلەر مەن قوناقۇي سالىنادى، ال تۇرعىن ءۇي تۇرىندەگى نۇكتەلى قۇرىلىسقا جول بەرىلمەيدى”، – دەدى اكىم ورىنباسارى.

سونىمەن قاتار شاحانوۆتىڭ ايتۋىنشا، قالا اكىمدىگى قۇرىلىس كومپانياسىنان كورشى ۇيلەردىڭ تۇرعىندارىمەن كەلىسىپ، ولاردىڭ قولايلى ءومىر ءسۇرۋ جاعدايىن ساقتاۋدى تالاپ ەتكەن.

بۇعان دەيىن

ەسكە سالايىق، بۇعان دەيىن ءال-فارابي داڭعىلى بويىنداعى اكادەميالىق قالاشىق تۇرعىندارى ۇيلەرىنىڭ ىرگەسىندەگى جاڭا قۇرىلىسقا قارسى شىققان بولاتىن.

ولار پرەزيدەنتكە بەينەۇندەۋ جولداپ، داۋلى اۋماقتاعى نىساننىڭ قالا قۇرىلىسى نورمالارىن بۇزىپ جاتقانىن مالىمدەگەن. تۇرعىندار قۇرىلىس جۇرگىزىلەتىن جەردى مەملەكەت مەنشىگىنە قايتارىپ، ونىڭ ورنىنا دەمالىس ايماعى مەن توتەنشە جاعدايدا جينالاتىن الاڭ سالۋدى ۇسىنعان ەدى.

ايتۋلارىنشا، قۇرىلىس ايماعى سەيسموقاۋىپتى جانە تەكتونيكالىق جارىق ۇستىندە ورنالاسقان، سونداي-اق ول اۋداننىڭ تابيعي جەلدەتىلۋىن شەكتەپ، ينجەنەرلىك ينفراقۇرىلىمعا سالماق ءتۇسىرۋى مۇمكىن.

تۇرعىندار قوعامدىق تىڭداۋلاردىڭ وتكىزىلمەگەنىن ايتىپ، قۇرىلىسقا رەسمي كەلىسىم بەرمەگەندەرىن جەتكىزگەن.

Abai.kz