ۇكىمەت وتىرىسىندا «سامۇرىق-ەنەرگو» اق باسقارما توراعاسى قايرات ماقسۇتوۆ كومىر گەنەراتسياسى سالاسىنداعى جوبالاردى جۇزەگە اسىرۋ بارىسى تۋرالى اقپارات بەردى.

مۇنداعى نەگىزگى جوبالاردىڭ ءبىرى - جالپى قۋاتى 1 080 مۆت بولاتىن 3-ءشى جانە 4-ءشى ەنەرگوبلوكتاردى ورناتۋ ارقىلى ەكىباستۇز گرەس-2-ءنى كەڭەيتۋ.

ال كوكشەتاۋ جەو-نىڭ قۇرىلىسىنا قاتىستى جوبالاۋعا، جابدىقتاردى جەتكىزۋگە جانە قۇرىلىس جۇرگىزۋگە كەلىسىمدەر جاسالعان. جىلۋ-ەلەكتر ورتالىعى ورنالاساتىن الاڭدى، جوبالىق-سمەتالىق قۇجاتتامالاردى دايىنداۋ جانە تاعى دا باسقا جۇمىستار جۇرگىزىلۋدە.

سەمەي جانە وسكەمەن جەو بويىنشا دا قۇرىلىس جۇمىستارىنا كەلىسىم جاسالعان. قۋاتى 360 مۆت جانە 1000 گكالل بولاتىن ستانسانى پايدالانۋعا بەرۋ 2029 جىلعا جوسپارلانىپ وتىر.

«كومىر گەنەراتسياسىن كەڭىنەن دامىتۋ قاجەت. كومىر ءبىزدىڭ ەڭ ماڭىزدى اكتيۆىمىز ەكەنىن ۇمىتپاڭىزدار»، — دەپ اتاپ ءوتتى پرەمەر-مينيستر ولجاس بەكتەنوۆ.

Abai.kz