الەۋمەتتىك جەلىدە بەلگىلى قوعام قايراتكەرى، «بايتاق» پارتياسىنىڭ جاۋاپتى حاتشىسى بەرىك اعىباەۆ قۋانىشتى حابارىمەن ءبولىستى. ول:  «بۇگىن قۋانىشتى جاڭالىعىممەن بولىسكىم كەلەدى: «مۇحتار شاحانوۆ اتىنداعى قور» قوعامدىق قورى رەسمي تۇردە تىركەلدى! مەنى وسى قوردىڭ توراعاسى ەتىپ سايلادى»، ‑ دەدى.

قازاق حالقىنىڭ تانىمال اقىنى، ولەڭدەرى الەمدە كوپ ەڭ كوپ تىلدە جاريالانعان مۇحتار شاحانوۆ - ءتىرى اڭىز دەسەك بولادى. ونىڭ ءومىربايانىن قايتالاپ ايتۋدىڭ ءوزى ارتىق – اتقارعان ەڭبەگى حالىقتىڭ جادىندا. ەلى ونىڭ ەڭبەگىن ەلەپ، 2022 جىلى «وتان» وردەنىمەن جانە «قازاقستاننىڭ ەڭبەك ەرى» اتاعىمەن ماراپاتتاعان.

سۋرەت: شارا ۇيىمداستىرۋشىلارىنان الىندى.

م.شاحانوۆتىڭ ومىرلىك جولى –كۇرەسكەرلىك جول. دەگەنمەن، وسى جولدا قازاق قوعامىنا جەتىسپەي تۇرعان باستى قۇندىلىق – رۋح دەسە بولادى. مىنە، وسى رۋحتى قايراعان، ونى ۇشتاعان اقىندار اراسىندا مۇحتار اقىننىڭ شوقتىعى بيىك تۇر. سوناۋ «جەلتوقسان‑1986» كوتەرىلىسىنىڭ قۇرباندارىن ىزدەپ، ولاردىڭ وشپەس رۋحىن حالقىنا جەتكىزۋ ءۇشىن دە مۇحتار اعا تىنباي‑تالماي ەڭبەكتەندى.

سۋرەت: شارا ۇيىمداستىرۋشىلارىنان الىندى.

ءوزىنىڭ ولەڭدەرىندە قازىرگى زامان رۋحىنا جات، بىراق، قوعامدا قىلاڭ بەرگەن كەلەڭسىز قىلىقتاردى اياۋسىز سىنادى...

جاستاردى جاعىمپازدىقتان اۋلاق بولۋعا، اسقاق مىنەزدى بولۋعا شاقىردى...

ۇلتتىق رۋحتى تۇلعالىق دەڭگەيدە كورۋ كەرەكتىگىن شارشاماي ايتۋمەن بولدى – زامانا شىندىعىن ىزدەدى...

مىنە، ەندى، مۇحتار اعا سەكسەننەن اسقان شاعىندا ءوز اتىنا اشىلعان قوعامدىق قوردىڭ  رەسمي تىركەلگەنىنە كۋا بولىپ وتىر... بۇل دا كىمگە بولسا دا بۇيىرا بەرمەيتىن قۇرمەت!

بۇل قور بولاشاقتا م.شاحانوۆتىڭ مۇراسى شىندىق پەن ادىلدىك مەكتەبىنە اينالۋىنا ءسوزسىز ىقپال ەتەتىن بولادى!

قوردى باسقارۋدى موينىنا العان جاس ساياساتكەر بەرىك اعىباەۆقا بۇل ۇلكەن جاۋاپكەرشىلىكتى  مىندەتتەيدى. بەرىك تە وسى ۇدەدەن شىعادى دەپ سەنىم بىلدىرە وتىرىپ، قوردى رەسمي تىركەۋدەن ءوتىپ، اشىلۋىمەن قۇتتىقتايمىز!

Abai.kz اقپاراتتىق پورتالى ۇجىمى اتىنان م.شاحانوۆ اتىنداعى قوعامدىق قور ەل يگىلىگىنە، ەل رۋحانياتىنا ولشەۋسىز قىزمەت ەتەدى دەپ سەنىم بىلدىرەمىز!

Abai.kz