بۇگىن ماجىلىستە  قازاقستان رەسپۋبليكاسىنىڭ «بانكتەر جانە بانك قىزمەتى تۋرالى» زاڭ جوباسى تۋرالى ءبىرىنشى وقىلىم ءوتتى.

ءماجىلىس دەپۋتاتى تەمىر قىرىقباەۆ قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ابىلقاسىموۆاعا ءوندىرىپ الۋدان قورعالاتىن الەۋمەتتىك شوت ەنگىزۋ باستاماسى مەن شوتى بۇعاتتالعان ازاماتتارعا ارنالعان تاسىلدەر تۋرالى دەپۋتاتتىق ساۋال جولدادى.

– سوڭعى مالىمەتتەرگە سايكەس، ەلىمىزدە شامامەن 38 ميلليوننان استام شوت بۇعاتتالىپ تۇر.

مەن ازاماتتاردىڭ ەڭ تومەنگى تابىسىن قورعاۋ جانە ءوندىرىپ الۋشىلار مەن بورىشكەرلەر قۇقىقتارىنىڭ تەڭگەرىمدى ساقتالۋىن قامتاماسىز ەتۋ ماقساتىندا زاڭ جوباسىنا قورعالعان الەۋمەتتىك شوت نەمەسە ارنايى بانكتىك شوت اشۋ تۋرالى ۇسىنىس بەردىم.

مۇنداي شوتقا ايىنا 300 مىڭ تەڭگەگە دەيىنگى سوماداعى تۇسىمدەرگە ءوندىرىپ الۋ شارالارى قولدانىلمايدى.

ءسىز ازاماتتارعا ايىنا 300 مىڭ تەڭگەگە دەيىنگى سومادا ءوندىرىپ الۋدان قورعالاتىن الەۋمەتتىك شوت ەنگىزۋ باستاماسىنا قالاي قارايسىز جانە شوتى بۇعاتتالعان ازاماتتار ءۇشىن ءسىزدىڭ اگەنتتىك قانداي تاسىلدەر قاراستىرۋدا؟، - دەيدى دەپۋتات قىرىقباەۆ.

ءوز جاۋابىندا قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى وتكەن جىلى وسى زاڭ قابىلدانعان كەزدە تابىسى تومەن ازاماتتاردى قورعاۋعا باعىتتالعان نورمالار كەڭەيتىلگەنىن ايتتى. اتاپ ايتقاندا، قارجى ۇيىمدارىنا بىرقاتار الەۋمەتتىك تولەمدەردى ءوندىرىپ الۋعا تىيىم سالىنعان.

«بلوكتالعان شوتتار بويىنشا ءسىز كەلتىرگەن دەرەكتەرگە قاتىستى ءبىز مۇمكىن بولاتىن شارالاردى قاراستىرۋعا دايىنبىز. الەۋمەتتىك وسال ازاماتتارمەن جۇمىس ىستەۋ كەزىندە بانكتەر ءاربىر شوت بويىنشا جەكە ءتاسىل قولدانادى. ءبىزدىڭ نەگىزگى ماقساتىمىز — ولارعا جان-جاقتى كومەك كورسەتۋ. سونداي-اق قابىلداۋعا بولاتىن قوسىمشا شارالاردى دا قاراستىرۋعا دايىنبىز»، — دەدى اگەنتتىك ءتورايىمى.

سونىمەن قاتار قارجى رەتتەۋشىسىنىڭ باسشىسى بۇل ماسەلەنى زاڭ جوباسىن ءارى قاراي پىسىقتاۋ بارىسىندا قاراستىرۋعا ۋادە بەردى.

Abai.kz