كەلەر جىلى اقش مەملەكەتتىك حاتشىسى ماركو رۋبيو ورتالىق ازيا ەلدەرىنە رەسمي ساپارمەن كەلۋدى جوسپارلاپ وتىر. بۇل تۋرالى Reuters اگەنتتىگى حابارلادى. مەملەكەتتىك دەپارتامەنتتەگى شارا بارىسىندا رۋبيو ايماق ەلدەرىمەن تابيعي رەسۋرستاردى يگەرۋ سالاسىندا ورتاق مۇددە بار ەكەنىن اتاپ ءوتتى.

«سىزدەر قۇداي سىيلاعان رەسۋرستارىڭىزدى ءتيىمدى پايدالانىپ، ونى جاۋاپتى دامۋعا باعىتتاۋعا كۇش سالىپ جاتىرسىزدار. بۇل ءوز كەزەگىندە ەكونوميكانى ارتاراپتاندىرۋعا ۇلكەن مۇمكىندىك بەرەدى»، — دەدى رۋبيو. ونىڭ ايتۋىنشا، جوسپارلانىپ وتىرعان ساپار شامامەن ءبىر اپتاعا سوزىلادى.

سونىمەن قاتار، شارا بارىسىندا رەسپۋبليكاشىل سەناتور دجەيمس ريش اقش كونگرەسى جاقىن كۇندەرى دجەكسون–ۆەنيك تۇزەتۋىن الىپ تاستاۋعا باعىتتالعان زاڭ جوباسىن ۇسىناتىنىن مالىمدەدى. قازاقستان بۇل تىزىمنەن شىعارۋ تۋرالى ءوتىنىشىن بىرنەشە رەت بىلدىرگەن ەدى.

ەسكە سالا كەتەيىك، دجەكسون–ۆەنيك تۇزەتۋى 1974 جىلى اقش-تا قابىلدانعان ساۋدا تۋرالى زاڭعا ەنگىزىلگەن وزگەرىس. ول كوشى-قونعا شەكتەۋ قويعان نەمەسە ادام قۇقىقتارىن بۇزعان مەملەكەتتەرمەن ساۋدا قاتىناستارىن شەكتەۋگە مۇمكىندىك بەرەدى. مۇنداي ەلدەر اقش-پەن ساۋدا جاساعاندا جوعارى باج سالىعىنا جانە ءتۇرلى يمپورت-ەكسپورتتىق شەكتەۋلەرگە تاپ بولادى.

كەڭەس وداعى ىدىراعاننان كەيىن بىرقاتار ەلدەر بۇل تىزىمنەن شىعارىلعان. 2000–2012 جىلدارى قىرعىزستان، گرۋزيا، ۋكراينا، ارمەنيا، مولدوۆا جانە ءتىپتى رەسەيدىڭ ءوزى دە شەكتەۋدەن بوساتىلعان. الايدا ورتالىق ازيانىڭ قالعان ەلدەرى ءالى كۇنگە دەيىن تۇزەتۋدىڭ ىقپالىندا قالىپ وتىر.

Abai.kz