قازاقستان رەسپۋبليكاسىنىڭ سىرتقى ىستەر ءمينيسترى ەرمەك كوشەرباەۆ ەۋروپالىق وداقتىڭ ورتالىق ازيا جونىندەگى ارناۋلى وكىلى ەدۋاردس ستيپرايستى قابىلدادى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.

كەزدەسۋ بارىسىندا مينيستر قازاقستان مەن ەۋرووداق اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمنىڭ ون جىل بۇرىن قابىلدانىپ، ۇزاق مەرزىمدى ءوزارا ءىس-قيمىلدىڭ بەرىك نەگىزىنە اينالعانىن جانە ەكىجاقتى ساياسي ديالوگتىڭ قوماقتى تۇردە نىعايىپ كەلە جاتقانىن اتاپ ءوتتى.

تاراپتار ىنتىماقتاستىقتىڭ نەگىزگى باعىتتارى جونىندە پىكىر الماسىپ، «جاسىل» ترانسفورماتسيا مەن كولىك بايلانىستىعىن ىلگەرىلەتۋ جوبالارىنىڭ ماڭىزدىلىعىنا نازار اۋداردى. بۇل تۇرعىدا ترانسكاسپي حالىقارالىق كولىك باعىتىن دامىتۋدىڭ ماڭىزدىلىعى راستالدى.

سىرتقى ساياسي ۆەدومستۆو باسشىسى قازاقستاننىڭ ەۋروپالىق وداق ءۇشىن سەنىمدى ءارى جاۋاپتى سەرىكتەس ەكەنىن جانە ەكىجاقتى ەكونوميكالىق پەن ساياسي ءوزارا ءىس-قيمىلدى كەڭەيتۋگە اشىقتىعىن اتاپ ءوتتى.

«ە.كوشەرباەۆ وڭىرلىك ديالوگتى ىلگەرىلەتۋ جانە پراكتيكالىق باستامالاردى ىسكە اسىرۋ ءۇشىن ءتيىمدى پلاتفورما رەتىندە تانىتقان «ورتالىق ازيا — ەۋروپالىق وداق» فورماتى شەڭبەرىندە كووپەراتسيانى ودان ءارى دامىتۋدىڭ ماڭىزدىلىعىن ايتتى. بىرلەسكەن جوبالارعا ودان ءارى بەلسەندى قاتىسۋعا جانە ەو-مەن ءوزارا ءىس-قيمىلدىڭ نەگىزگى باعىتتارى بويىنشا قاتىناستاردى نىعايتۋعا دايىندىق ءبىلدىرىلدى»، دەلىنگەن مينيسترلىك حابارلاماسىندا.

ءوز كەزەگىندە ە.ستيپرايس قازاقستان مەن ەۋرووداق اراسىنداعى ءوزارا ءىس-قيمىل دەڭگەيىن جوعارى باعالاپ، وڭىرارالىق ىنتىماقتاستىقتى نىعايتۋعا جانە ماڭىزدى ەكونوميكالىق ءارى ينفراقۇرىلىمدىق باستامالاردى دامىتۋعا قوسقان قازاقستاننىڭ ۇلەسىن اتاپ ءوتتى.

كەزدەسۋ قورىتىندىسى بويىنشا سۇحباتتاستار ءوزارا ءتيىمدى سەرىكتەستىكتى ودان ءارى تەرەڭدەتۋگە بەيىلدىلىگىن راستاپ، ەكىجاقتى جانە وڭىرلىك كۇن تارتىبىندەگى نەگىزگى ماسەلەلەر بويىنشا سىندارلى ديالوگتى جالعاستىرۋعا دايىن ەكەنىن ءبىلدىردى.

ەسكە سالا كەتسەك، 2 جەلتوقساندا شۆەيتساريا تاراپىنىڭ شاقىرۋىمەن سىرتقى ىستەر ءمينيسترى ەرمەك كوشەرباەۆ شۆەيتساريا كونفەدەراتسياسىنا رەسمي ساپارمەن بارادى.

سونداي-اق مينيسترلىكتىڭ رەسمي وكىلى ايبەك سمادياروۆ ەۋروپاعا ۆيزا تالابىن جەڭىلدەتۋ جۇمىسى كۇن سايىن ءجۇرىپ جاتقانىن جەتكىزدى.

Abai.kz