ەلىمىزدە جەدەل جاردەم قىزمەتكەرلەرىنىڭ جالاقىسى وسەدى.

بۇل تۋرالى دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ سەناتتىڭ كۋلۋارىندا بەرگەن سۇحباتىندا مالىمدەدى.

ول بۇل ماسەلەلەردى كوتەرىپ جۇرگەن مەديتسينا قىزمەتكەرلەرىنە قانداي دا ءبىر قىسىم جاساۋعا جول بەرىلمەيتىنىن ەرەكشە اتاپ ءوتتى.

ۆيتسە-ءمينيستردىڭ مالىمەتىنشە، دەنساۋلىق ساقتاۋ مينيسترلىگى ۇكىمەتپەن بىرگە جالاقىنى تاعى دا كوتەرۋ ماسەلەسىن قاراستىرىپ جاتىر. ول 2020-2023 جىلدارى دارىگەرلەردىڭ ەڭبەكاقىسى 30%-عا، ورتا بۋىن مەديتسينا قىزمەتكەرلەرىنىڭ جالاقىسى 20%-عا ارتقانىن ەسكە سالدى. ال 2024 جىلعا قاراي جەدەل جاردەم جۇرگىزۋشىلەرىن قوسقاندا، مەديتسينالىق ەمەس قىزمەتكەرلەردىڭ جالاقىسى 18%-عا وسكەن.

قولدانىستاعى ۇكىمەت قاۋلىسىنا سايكەس، فەلدشەرلەردىڭ ەڭ تومەنگى ايلىعى شامامەن 180-190 مىڭ تەڭگەنى قۇرايدى، ال ەڭبەك وتىلىنە قاراي 260 مىڭ تەڭگەگە دەيىن جەتۋى مۇمكىن. جەدەل جاردەم جۇرگىزۋشىلەرى قازىر 160-180 مىڭ تەڭگە كولەمىندە جالاقى الادى، - دەدى ول.

تيمۋر سۇلتانعازيەۆ جاڭا جالاقى وسىمىنە قاتىستى ەسەپتەر دايىن دەپ وتىر. الايدا ناقتى ساندار ازىرشە ايتىلمايدى، سەبەبى بۇل ماسەلە قازىر ۇكىمەتتىڭ قاراۋىندا.

ەگەر ۇكىمەت بۇل ۇسىنىستاردى قولداسا، كەلەسى جىلدان باستاپ جالاقىنى كوتەرۋدى كوزدەپ وتىرمىز. بىراق مولشەرىن ايتۋعا ەرتە، قازىر بيۋدجەت مۇمكىندىكتەرى تالقىلانىپ جاتىر، - دەپ قورىتىندىلادى ءبىرىنشى ۆيتسە-مينيستر.

Abai.kz