گەرمانيا قورعانىس جۇيەسىن جاڭارتۋدا ناقتى قادامعا بارىپ وتىر. ەل بيلىگى ۋكرايناداعى سوعىسقا قاتىسقان تاجىريبەلى ارداگەرلەردى ءوز اسكەري اكادەميالارىنا ينسترۋكتور رەتىندە شاقىرماقشى.

وسىلايشا ولار ۋكرايناداعى قازىرگى سوعىستا جيناقتالعان ناقتى تاجىريبەنى نەمىس ارمياسىنىڭ دايىندىعىنا پايدالانۋدى كوزدەپ وتىر. قاعازداعى دوكترينا مەن جاتتىعۋ پوليگوندارىنداعى ستسەناريدەن بولەك، ءتىرى مايدان كورگەن، سونىڭ بارلىق قيىندىعىن وتكەرگەن ادامداردىڭ ايتقانىنا قۇلاق اسۋدىڭ ماڭىزى زور.

ۋكراين ارداگەرلەرى گەرمانيادا كۋرسانتتار مەن وفيتسەرلەرگە قازىرگى سوعىستىڭ شىنايى سيپاتى تۋرالى تۇسىنىك بەرەتىن بولادى. اسىرەسە قالاداعى ۇرىس تاكتيكاسى، ۇشقىشسىز جۇيەلەردىڭ ءرولى، دروندارعا قارسى ارەكەت ەتۋ، شاعىن ءموبيلدى بولىمشەلەرمەن جۇمىس ىستەۋ، بارلاۋ مەن بايلانىسقا جۇكتەمەنىڭ كۇشەيۋى سياقتى ماسەلەلەرگە باسىمدىق بەرىلەدى.

سوعىس قازىر وتە جىلدام ءجۇرىپ جاتىر، فرونتتىڭ ءار ۋچاسكەسىندە جاعداي تەز وزگەرەدى. وسىنداي ورتادا شەشىم قابىلداۋدى ۇيرەتۋ گەرمانيا ءۇشىن دە، ناتو ءۇشىن دە ماڭىزدى تاجىريبە بولماق.

باعدارلاما گەرمانيا مەن ۋكراينانىڭ قورعانىس سالاسىنداعى بايلانىسى تەرەڭدەپ كەلە جاتقانىن كورسەتەدى. بۇعان دەيىن بەرلين كيەۆكە قارۋ-جاراق، تەحنيكا، قارجىلاي كومەك بەرىپ كەلسە، ەندى كادر دايارلاۋ باعىتىنا دا كوڭىل بولە باستادى.

گەرمانيا ءۇشىن ۋكراين نۇسقاۋشىلارىن تارتۋ ارميانى جاڭا تالاپتارعا بەيىمدەۋدە جولىندا ماڭىزدى قادام بولماق. سوڭعى ونجىلدىقتا بۋندەسۆەر كوبىنە ميسسيالارعا قاتىسۋ، بەيبىتشىلىكتى قولداۋ وپەراتسيالارىنا ۇيرەنىپ كەلگەن-ءدى.

ال ۋكرايناداعى سوعىس ەۋروپاعا ۇلكەن كولەمدەگى، جوعارى قارقىنمەن جۇرەتىن قاقتىعىستىڭ قانداي بولاتىنىن كورسەتتى. ارتيللەريا، درون، راديوەلەكتروندىق كۇرەس، لوگيستيكا، جەكە قۇرامنىڭ مورالدىق توزىمدىلىگى ءبارى قاتار سىنالادى. سوندىقتان نەمىس اسكەريلەرى ءۇشىن مايداننان كەلگەن ناقتى مىسالدى تىڭداۋ، سوعان سۇيەنىپ دايىندىقتى قايتا قاراۋدىڭ ماڭىزى ارتىپ تۇر.

بۇل باستاما ناتو-نىڭ جالپى قورعانىس قابىلەتىن كۇشەيتۋگە باعىتتالعان ۇلكەن جۇمىستىڭ ءبىر بولىگى سانالادى. ۋكراينا مايدانىنداعى جاعدايدى ءار ەل ءوز قىرىنان زەردەلۋگە كۇش سالۋدا.

گەرمانيا ۋكراين ارداگەرلەرىن وقىتۋ پروتسەسىنە قوسۋ ارقىلى ناتو ىشىندەگى تاجىريبە الماسۋدى جەدەلدەتپەك. وقىعان، دايىندالعان نەمىس وفيتسەرلەرى كەيىن باسقا وداقتاس قۇرىلىمداردا دا جۇمىس ىستەي الادى، ياعني تاجىريبە تەك ءبىر ەلدىڭ ىشىندە قالمايدى.

نۇرلان جۇماقانوۆ

Abai.kz