الماتىدا ءوتىپ جاتقان «ۇلى جىبەك جولىمەن – 2025» XIII حالىقارالىق كىتاپ جانە پوليگرافيا كورمەسى اياسىندا  كىتاپ ىسىندەگى وزەكتى ماسەلەلەر بويىنشا كونفەرەنتسيا ءوتتى.  

ءىس-شارانىڭ  ماقساتى – باسپا يندۋسترياسىن دامىتۋ، تاريحي ەڭبەكتەردەگى وبەكتيۆتىلىك پەن ارحيۆتىك دەرەكتەردى قولدانۋ ساپاسىن كوتەرۋ، سونداي-اق كىتاپ سالاسىنا قاتىستى زاڭنامالىق وزگەرىستەر بويىنشا كاسىبي پىكىر الماسۋ.

جيىنعا قاتىسقان تاريح عىلىمدارىنىڭ دوكتورى، مەملەكەت تاريحى ينستيتۋتى دەرەكتانۋ، وتان تاريحى جانە تاريحناما ءبولىمىنىڭ باسشىسى  عاني قاراساەۆ تاريحي-ادەبي شىعارمالار مەن عىلىمي ەڭبەكتەردە دەرەكتەردى وزگەرتۋ  اسا اۋىر قاتەلىك ەكەنىن اتاپ ءوتتى.

ونىڭ ايتۋىنشا، تاريح عىلىمىنداعى كەز كەلگەن زەرتتەۋ قوسپاسىز، ءدال جانە ارحيۆتىك دەرەكتەرگە نەگىزدەلۋى ءتيىس، ويتكەنى تاريح ماتەماتيكا سياقتى ناقتى دالدىكتى تالاپ ەتەدى.

«تاريحي ءبىلىمى جوق اۋەسقوي اۆتورلاردىڭ اسىرا سىلتەۋى، ءۇستىرت پايىمدارى نەمەسە تەرەڭىنە ۇڭىلمەۋى شىندىقتى بۇرمالاپ، قوعامدى اداستىرۋى مۇمكىن. سوندىقتان تاريحي تاقىرىپقا قالام تارتقان ءار اۆتوردىڭ جانىندا كاسىبي تاريحشى كەڭەسشى بولۋى قاجەت. مەملەكەت باسشىسىنىڭ «تاريحتى تەك تاريحشىلار جازۋى كەرەك» دەگەن پىكىرى دە ۇلكەن جاۋاپكەرشىلىك جۇكتەيدى. سەبەبى عىلىمي دايارلىعى جوق ادامداردىڭ اۆتورلىق ينتەرپرەتاتسيالارى رۋلىق نەمەسە تۋىستىق دەڭگەيدەگى بۇرمالاۋلارعا اپارۋى مۇمكىن»، – دەدى عاني مۇقاشۇلى.

باسقوسۋدا  وتاندىق باسپا ءىسىن دامىتۋ، «كىتاپ ءىسى تۋرالى زاڭنىڭ» ماڭىزدىلىعى، سونداي-اق تاريحي تاقىرىپتاردىڭ بۇرمالانۋى مەن دەرەكتەردىڭ عىلىمي دالدىگىن ساقتاۋ، دەرەكتانۋ مادەنيەتىن ارتتىرۋ ماسەلەلەرى جان-جاقتى ءسوز بولدى.

دوڭگەلەك ۇستەلگە كىتاپ سالاسىنىڭ ماماندارى، باسپا وكىلدەرى، تاريحشىلار مەن ساراپشىلار قاتىستى.

Abai.kz