الماتى وبلىسىندا جىر الىبى جامبىل جاباەۆتىڭ 180 جىلدىق مەرەيتويى كوكباستاۋ اتىرابىن دۋمانعا بولەپ، دۇركىرەپ وتۋدە. تاۋ باۋرايىندا 50-گە جۋىق اقشاڭقاي كيىز ءۇي تىگىلىپ، ونەرپازدار ۇلتتىق اسپاپتاردان جىر توگىلتىپ، سالت-ءداستۇردى ايشىقتايتىن كورىنىستەر جينالعان قاۋىمنىڭ رۋحىن وياتتى. كوركەمونەرپازدار مەن قولونەر شەبەرلەرىنىڭ، اسىلتۇقىمدى جىلقى مەن تازىنىڭ كورمەسى ۇيىمداستىرىلىپ، سپورتشىلار ۇلتتىق سپورت تۇرلەرىنەن سىنعا ءتۇسىپ جاتىر. سارقىلماس جىر بۇلاعىنا اينالعان ۇلى تۇلعانىڭ شىعارماشىلىق مۇراسى كەڭىنەن ناسيحاتتالىپ، ايتىس ونەرىنىڭ ءمان-ماڭىزى كەڭىنەن دارىپتەلۋدە. ابدوللا قارساقباەۆتىڭ 100 جىلدىق مەرەيتويى دا نازاردان تىس قالماي، كينورەجيسسەردىڭ تۋىندىلارىنان ۇزىندىلەر قويىلىپ، تەاترلاندىرىلعان كورىنىس كورەرمەن نازارىنا ۇسىنىلدى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

دۋماندى مەرەكەگە مادەنيەت جانە قوعام قايراتكەرلەرى، جىرشى-تەرمەشىلەر، ايتىسكەر اقىندار، وبلىس باسشىلىعى، ەلىمىزدىڭ ءار وڭىرىنەن كەلگەن قوناقتار مەن جەرگىلىكتى تۇرعىندار قاتىستى.

العاش بولىپ ءسوز العان قر پرەزيدەنتىنىڭ كەڭەسشىسى مالىك وتارباەۆ تويعا جينالعان حالىققا مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.

«جامبىل جاباەۆ – ۇلت مادەنيەتىندە ەرەكشە ورنى بار تاريحي تۇلعا، قازاق ادەبيەتىنىڭ اسا كورنەكتى وكىلى. ايگىلى جىرشى شوقتىعى بيىك شىعارمالارى ارقىلى وتانشىلدىق پەن ىنتىماق، ەرلىك پەن ەلدىك، ادالدىق پەن ادىلدىك سەكىلدى مىزعىماس قۇندىلىقتاردى كەڭىنەن دارىپتەدى. حالقىمىزدىڭ ءبىرتۋار پەرزەنتى ايتىس ونەرىنىڭ ءورىسىن كەڭەيتۋگە، ەپيكالىق ءداستۇردى جاڭعىرتۋعا، قازاق-قىرعىز ادەبي بايلانىسىن نىعايتۋعا ولشەۋسىز ۇلەس قوستى. ءوز ءداۋىرىنىڭ تىنىس-تىرشىلىگىن اسقان شەبەرلىكپەن سۋرەتتەپ، جۇرتتىڭ ىستىق ىقىلاسىنا بولەندى. «حح عاسىردىڭ گومەرى» اتانعان ۇلى اقىننىڭ تۋىندىلارى كوپتەگەن شەت تىلىنە اۋدارىلىپ، بارشا ادامزاتقا ورتاق قازىناعا اينالدى. قوس عاسىردىڭ كۋاسى بولعان جىر الىبىنىڭ مول مۇراسى ءالى تالاي ۇرپاققا رۋحاني ازىق بولارى ءسوزسىز»، – دەلىنگەن حاتتا.

الماتى وبلىسىنىڭ اكىمى شىڭعىس ءارىنوۆ ءوز سوزىندە جامبىل جاباەۆتىڭ قازاق رۋحانياتى مەن اقىندىق ونەرىندە الاتىن ورنىنا توقتالدى.

«جامبىل – قازاقتىڭ ءسوز ونەرىندە ايرىقشا ورنى بار دارا تۇلعا. اتاقتى ءسۇيىنباي ارونۇلىنان باتا العان اقىن عاسىرعا جۋىق عۇمىرىندا ەلدىڭ مۇڭىن مۇڭداپ، جوعىن جوقتاپ، ۇلت مۇراتىن جىرىنا ارقاۋ ەتتى. جامبىل بابامىزدىڭ ەسىمى ۋاقىت وتكەن سايىن حالىقپەن بىرگە جاساي بەرەتىن رۋحاني قۇندىلىق. ۋاقىت وتەدى، ۇرپاق الماسادى. بىراق ەلگە قىزمەت ەتكەن، حالىقتىڭ ءسوزىن سويلەگەن تۇلعالاردىڭ ورنى ارقاشان جوعارى. «تاۋ الىستاعان سايىن بيىكتەي تۇسەدى» دەمەكشى، جىلدار وتكەن سايىن جامبىلدىڭ تۇلعاسى دا تەرەڭىرەك تانىلا تۇسەتىنى ءسوزسىز. ال ءسىز بەن ءبىزدىڭ پارىزىمىز – بابادان قالعان اسىل مۇرانى كوزدىڭ قاراشىعىنداي ساقتاپ، كەلەر ۇرپاققا جەتكىزۋ.جامبىل مۇراسى – ۇلت رۋحانياتىنىڭ اسىل قازىناسى. جىر الىبىنىڭ وسيەتى مەن ونەگەسى ۇرپاق ساناسىندا جاڭعىرىپ، ماڭگىلىك جاساي بەرسىن»، – دەدى شىڭعىس سايرانۇلى.

ايتا كەتەيىك، جامبىل جاباەۆتىڭ مەرەيتويىنا ارنالعان شارالار لەگى جىل باسىنان بەرى تولاستاعان جوق. ەلىمىزدىڭ تۇكپىر-تۇكپىرىندەگى، حالىقارالىق دەڭگەيدەگى تاعىلىمدى كەشتەردە اقىننىڭ ءومىرى مەن شىعارماشىلىعى كەڭىنەن ناسيحاتتالدى. ماسەلەن، بەيجىڭدە «جامبىل – عاسىر اقىنى» اتتى تاعىلىمدى شارا وتسە، ءسۇيىنباي اتىنداعى مەملەكەتتىك اكادەميالىق فيلارمونياسىندا «اتا تولعاۋى» اتتى سالتاناتتى كونتسەرت ۇيىمداستىرىلدى. كۇنى كەشە ۇزىناعاش اۋىلىنداعى حالىقارالىق اقىندار ايتىسىندا ءسوز زەرگەرلەرى باسەكەگە ءتۇستى. جۇيرىكتەردىڭ ونەرىن قازاقستاننىڭ حالىق جازۋشىسى، «قۇرمەت»، «پاراسات»، «وتان» وردەندەرىنىڭ يەگەرى ءجۇرسىن ەرمان باستاعان قازىلار القاسى باعامداپ، سۋىرىپسالمالىق شەبەرلىگىنە تورەلىك ەتتى. جارىس قورىتىندىسىندا باس جۇلدەنى قىزىلوردالىق مەيىربەك سۇلتانحان جەڭىپ الىپ، سۋجاڭا اۆتوكولىكتىڭ يەسى اتاندى.  بىرىنشى ورىندى قىرعىز ەلىنەن كەلگەن كۋتمان سادىباكاسوۆ ەنشىلەدى. ەكىنشى ورىن قازىرەت بەردىحان مەن نۇربول جاۋىنباەۆقا بۇيىرسا، ءۇشىنشى ورىندى بولات احمەتوۆ پەن ۇلاربەك ميناتحان ءوزارا ءبولىستى. ال بۇگىن مەرەيتوي جامبىل اۋدانىنداعى كوكباستاۋ اۋىلىندا ەڭ اۋقىمدى شارامەن جالعاسىن تاپتى. ءدۇبىرلى تويعا 25 مىڭعا جۋىق حالىق جينالدى.

Abai.kz