كەشە اقش پرەزيدەنتى ترامپتىڭ ارنايى وكىلى ۋيتكوفف پەن كۇيەۋبالاسى كۋشنەر ماسكەۋگە ۇشىپ باردى. رەسەيباسى پۋتينمەن اقش ازىرلەگەن «بەيبىتشىلىك كەلىسىمىن» تالقىلادى.

بۇل داۋلى كەلىسىم جۇرتقا جاريا بولىسىمەن-اق، الەمنىڭ ەستى جۇرتى سونى: «بۇل كەلىسىم ەمەس، رەسەيدىڭ دەگەنىن ورىنداۋ شارتتارى»، - دەپ قاتال سىنادى. وسىدان سوڭ، اقش پەن ۋكراينا دەلەگاتسيالارى كەزەك-كەزەك كەزدەسىپ، تۇزەتۋلەر جاساستى. كوپ ماسەلە بويىنشا ماقۇلداستى.

كەلىسىلمەگەن، شەشىلمەگەن 2 ماسەلە بار. ول – جەر ماسەلەسى جانە قاۋىپسىزدىك كەپىلدىگى دەگەن ماسەلە. ۋكراينا بۇل ەكى ماسەلەنى ترامپ پەن زەلەنسكي جۇزبە-ءجۇز كەزدەسىپ، شەشۋى كەرەك دەيدى.

جالپى بۇل ءبىتىم جوسپارىنىڭ ايعاي-شۋى كوپ بولدى. ءبىر ارادا ترامپ ۋكرايناعا ۋلتيماتۋم قويدى. ونان سوڭ ۋيتكوففتىڭ اڭگىمەلەرى اشكەرە بولدى. تاراپتار ايتىستى، تارتىستى، اقىرى كوپ ماسەلە بويىنشا ءتىل تابىستى. ءسويتىپ، ۋيتكوففتىڭ اۆتورلىعىنداعى 28 تارماق قازىر جوق. 19-22 تارماققا دەيىن قىسقارتىلعان.

كەشە كرەملدە 5 ساعات تاپجىلماي وتىرىپ كەلىسسوز وتكىزگەن ۋيتكوفف پەن پۋتين كەلىسىمگە كەلە العان جوق. رەسەي پرەزيدەنتىنىڭ كەڭەسشى-كومەكشىسى يۋري ۋشاكوۆتىڭ ايتۋىنشا:

«پۋتين مەن ۋيتكوففتىڭ كەلىسسوزدەرى پايدالى، كونسترۋڭتيۆتى جانە مازمۇندى وتكەن. ازىرگە تاراپتار كەلىسىمگە كەلمەدى، ال پرەزيدەنتتەردىڭ كەزدەسۋى جوسپارلانعان جوق. پۋتين ترامپقا دۇعاي-دۇعاي سالەم جولدادى»، - دەدى.

ونان ءارى:

«اقش ۇسىنعان ءبىتىم جوسپارىمەن رەسەيدىڭ كەلىسەتىن تۇستارى دا بار، مۇلدە كەلىسپەيتىن تۇستارى دا بار. تالقى پايدالى بولدى. كرەملدە ۋكرايناداعى سوعىستى بەيبىت شەشۋدىڭ بىرنەشە نۇسقاسى تالقىلاندى. 5 ساعاتتىڭ ىشىندە ءبىرسىپىرا ماسەلەنى قاراپ ۇلگەردىك. ونىڭ مازمۇنىن جاريالاماۋعا ۋاعدالاستىق»، - دەدى.

قازىر ۋكراينا تارابى كەلىسىمگە كەلۋگە كەتارى ەمەس. ونىسىن ۋاشينگتونعا دا ەستىرتتى. گاپ – رەسەيدە!

رەسەيدىڭ بەيبىتشىلىككە كەلمەۋىنىڭ بىرنەشە سەبەبى بار. ولار:

ءبىرىنشى: ءپۋتيننىڭ پوزيتسياسى وزگەرگەن جوق. پۋتين وسىعان دەيىن ەشقانداي كومپروميسسكە كەلمەيتىنىن اشىق ايتتى. وتكەن اپتادا رەسەي وككۋپاتسيالاپ العان جەرلەردەن ۋكراينانىڭ تولىق شىعۋىن تالاپ ەتتى. زەلەنسكيمەن كەلىسسوز جۇرگىزۋدىڭ ەش ءمانى جوق ەكەنىن، ونىڭ لەگيتيمدىلىگىن مويىندامايتىنىن ايتتى. كرەمل مايدان دالاسىندا رەسەي اسكەرى العا جىلجىپ كەلە جاتقانىن تىلگە تيەك ەتىپ، ماسكەۋدىڭ اۋەلگى تالاپتارى وزگەرمەگەنىن، كيەۆ وعان كەلىسپەسە ءارى قاراي سوعىساتىنىن مالىمدەدى.

ەكىنشى: سوعىسۋ ارقىلى قارجى يگەرۋ. كرەمل بەيبىتشىلىك تۋرالى ويلاماق تۇگىلى، ءتىپتى اگرەسسيۆتى جولعا ءتۇسىپ بارادى. پۋتين قول قويعان جاڭا بيۋدجەت ەلدىڭ قايدا بارا جاتقانىن انىق كورسەتەدى: 2026 جىلى رەسەي شىعىنىنىڭ 38%-ى — ارميا مەن كۇشتىك قۇرىلىمدارعا بولىنگەن. بۇل كورسەتكىش كسرو كەزىنەن بەرگى ەڭ جوعارى كورسەتكىش. 12,93 ترلن رۋبل اسكەري ماقساتقا، 3,91 ترلن – قاۋىپسىزدىك قۇرىلىمدارىنا جۇمسالادى. ال الەۋمەتتىك شىعىندار سوعىسقا دەيىنگى 38%-دان 25%-عا ازايعان. ەكونوميكانى قولداۋعا بولىنەتىن قاراجات 17%-دان 10%-عا دەيىن قىسقاردى. بۇل سوڭعى جيىرما جىلداعى ەڭ تومەنگى دەڭگەي. ءبىر سوزبەن ايتقاندا: ەۋروپا — قارۋلانۋ ارقىلى كۇشەيۋگە، رەسەي — سوعىس ارقىلى السىرەۋگە باعىت العان.

ءۇشىنشى: ەلدى سوعىسپەن باسقارۋ مەحانيزمى. بۇل كرەمل بيلىگىنىڭ كەپىلدىگى بوپ تۇر. پۋتين قاقتىعىس اياقتالعاننان كەيىن ەلگە ورالاتىن ميلليونداعان ساربازدان قاۋىپتەنىپ وتىر. سوعىسقا شامامەن 1,5 ميلليون رەسەيلىك قاتىسقان بولۋى مۇمكىن، ولاردىڭ ىشىندە بۇرىن سوتتالعاندار دا بار. قاقتىعىس بىتكەن سوڭ بۇل اسكەريلەر پسيحولوگيالىق جاراقاتتارىمەن ورىس قوعامىنا قايتا ارالاسادى، ال بۇل كرەمل ءۇشىن ۇلكەن سىناققا اينالۋى ىقتيمال.

ءتورتىنشى: پريگوجين بۇلىگىنىڭ جاڭعىرىعى ءالى كۇنگە ۇمىتىلماعانىن ەسكەرسەك، پۋتين اسكەري توپتاردىڭ ىقپالى ارتىپ كەتۋىنەن قورقادى. سوندىقتان بيلىك سوعىسقا قاتىسۋشىلاردى باقىلاۋدا ۇستاۋدىڭ ءتۇرلى امالدارىن قاراستىرۋدا.

ءتۇيىن: ۋكرايناداعى اۋىر شىعىندارعا قاراماستان، پۋتين «بەيبىت كەزەڭنىڭ پرەزيدەنتى» بولا المايدى. سوندىقتان، رەسەي بەيبىتشىلىكە جوسپارىنا كەلىسپەيدى!

Abai.kz