وقۋشىلار سارايىندا وتكەن سالتاناتتى جيىندا «ەڭبەك ادامى – 2025» جوباسى بويىنشا ءتۇرلى سالادا ابىرويلى ەڭبەك ەتىپ، ءوز كاسىبىندە جوعارى ناتيجەگە قول جەتكىزگەن ازاماتتار ماراپاتتالدى. شاراعا ءوڭىر باسشىلىعى، قوعامدىق ۇيىمدار وكىلدەرى، ەڭبەك ۇجىمدارىنىڭ جەتەكشىلەرى مەن بەلسەندى جاستار قاتىستى.

دوسبول اتاجان

ۇيىمداستىرۋشىلاردىڭ ايتۋىنشا، جوبانىڭ باستى ماقساتى – قاراپايىم ەڭبەك ادامىن ۇلىقتاۋ، قوعام يگىلىگى ءۇشىن ايانباي تەر توگىپ جۇرگەن ازاماتتاردى كوپشىلىككە تانىتۋ جانە جاس ۇرپاققا ۇلگى ەتۋ. سوڭعى جىلدارى ەلىمىزدە ەڭبەك ادامىنىڭ بەدەلىن ارتتىرۋعا ەرەكشە نازار اۋدارىلىپ كەلەدى. بۇل – مەملەكەتتىڭ الەۋمەتتىك ساياساتىنداعى ماڭىزدى باعىتتىڭ ءبىرى.

جيىندا ءسوز سويلەگەن سپيكەرلەر مەملەكەت باسشىسىنىڭ 2025 جىلدى «جۇمىسپەن قامتۋدى كۇشەيتۋ جىلى» دەپ جاريالاۋىنىڭ ءمان-ماڭىزىنا توقتالدى. بۇل باستاما – ءار ازاماتتىڭ ەڭبەك ەتۋىنە مۇمكىندىك جاساپ، حالىقتىڭ ءال-اۋقاتىن ارتتىرۋعا باعىتتالعان قادام ەكەنى ايتىلدى. بۇگىندە ءوڭىردىڭ جاس ماماندارى دا ءتۇرلى الەۋمەتتىك جوبالارعا بەلسەنە قاتىسىپ، قوعام دامۋىنا ءوز ۇلەستەرىن قوسۋدا. ەكولوگيالىق سەنبىلىكتەر، الەۋمەتتىك نىسانداردى اباتتاندىرۋ، كەدەرگىسىز ورتا قالىپتاستىرۋ – وسىنداي جۇمىستاردىڭ ءبىر بولىگى عانا.

– ەڭبەك ەتكەن ادامنىڭ ەڭبەگى ەسكەرۋسىز قالماۋى ءتيىس. ءبىز ءۇشىن ەڭ باستى قۇندىلىق – ادال قىزمەت پەن ناتيجە، – دەدى جيىن بارىسىندا ۇيىمداستىرۋشىلاردىڭ ءبىرى.

سالتاناتتى ماراپاتتاۋ راسىمىندە ۇستازدار، دارىگەرلەر، ءوندىرىس قىزمەتكەرلەرى، الەۋمەتتىك سالا ماماندارى جانە جاستار اراسىنان ەڭ بەلسەندى، ەڭ جاۋاپكەرشىلىگى مول ازاماتتار انىقتالىپ، ارنايى العىس حاتتار مەن باعالى سىيلىقتار تابىستالدى. بارلىعى 20 ەڭبەككەر «ۇزدىك مامان»، «ۇزدىك قىزمەتكەر»، «جىلدىڭ جاس مامانى» سياقتى نوميناتسيالار بويىنشا ماراپاتتالدى.

شارا سوڭىندا قاتىسۋشىلار ەڭبەك ادامىن قولداۋ باعىتىنداعى مۇنداي جوبالاردىڭ ماڭىزىن اتاپ ءوتىپ، الداعى ۋاقىتتا دا جالعاسىن تاباتىنىنا سەنىم ءبىلدىردى. «ەڭبەك – ەلدىڭ تىرەگى» دەگەن قاعيداعا سۇيەنە وتىرىپ، قوعامدا ەڭبەك مادەنيەتىن نىعايتۋعا ارنالعان ءتۇرلى ءىس-شارالار جالعاسا بەرمەك.

Abai.kz