ەندى بەتتى تولىق نەمەسە ءىشىنارا جاۋىپ، ونى تانۋعا كەدەرگى كەلتىرەتىن كيىم كيگەنى ءۇشىن اكىمشىلىك جاۋاپكەرشىلىك ەنگىزىلەدى. بۇگىن سەنات قوعامدىق قاۋىپسىزدىكتى كۇشەيتۋگە جانە قۇقىق بۇزۋشىلىقتاردىڭ الدىن الۋعا باعىتتالعان اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن وزگەرىستەر مەن تولىقتىرۋلاردى ماقۇلدادى.

زاڭعا سايكەس، قوعامدىق ورىنداردا ادامنىڭ ءجۇزىن تانۋعا مۇمكىندىك بەرمەيتىن كيىم-كەشەك ەلەمەنتتەرىن كيگەنى ءۇشىن اكىمشىلىك جاۋاپكەرشىلىك كوزدەلەدى. العاش رەت قۇقىق بۇزۋشىلىق جاساعان جاعدايدا ەسكەرتۋ بەرىلەدى، ال قايتالانعان جاعدايدا 10 ايلىق ەسەپتىك كورسەتكىش مولشەرىندە ايىپپۇل سالىنادى.

تىيىم سالۋ ادامنىڭ ءجۇزىن تولىق جاباتىن كەز كەلگەن كيىم تۇرلەرىنە، سونىڭ ىشىندە بالاكلاۆالارعا، ماسكالارعا جانە ت.ب. قاتىستى قولدانىلادى.

زاڭ شىعارۋشىلاردىڭ ايتۋىنشا، مۇنداي شەكتەۋلەر بىرقاتار شەتەل مەملەكەتتەرىندە، اتاپ ايتقاندا وزبەكستان مەن قىرعىزستاندا، سونداي-اق ەۋروپانىڭ كوپتەگەن ەلدەرىندە (فرانتسيا، بەلگيا، نيدەرلاندى، شۆەيتساريا، بولگاريا، اۆستريا، دانيا، گەرمانيا) قولدانىستا بار. بۇل ولاردىڭ قوعامدىق قاۋىپسىزدىكتى قامتاماسىز ەتۋ جونىندەگى حالىقارالىق تاجىريبە اياسىندا قابىلدانعانىن كورسەتەدى.

Abai.kz