ۋكراينا، اقش جانە رەسەي وكىلدەرى اراسىنداعى كەلىسسوزدەر توقتاۋسىز جالعاسۋدا. تالقىداعى باستى تاقىرىپ – ۋكراينانىڭ جەر تاعدىرى! بۇل تۋرالى Mezgil.kz اقپاراتتىق پورتالى جازدى. 

كەلىسسوزدەردىڭ اقىرعى راۋندى ماياميدە ءوتتى. اقش اۋەلى ۋكراينا، سوسىن رەسەي وكىلدەرىمەن جەكە-جەكە جولىقتى. بەيبىت ءبىتىم جوسپارىن تالقىلادى.

اقش پەن ۋكراينا نە شەشتى؟

اقش-تىڭ باس كەلىسسوزشىسى، پرەزيدەنت ترامپتىڭ ارنايى وكىلى ستيۆ ۋيتكوفف ماياميدە وتكەن اقش-ۋكراينا كەلىسسوزدەرىن قورىتىندىلاپ مالىمدەمە جاسادى. بىرنەشە راۋندتان تۇراتىن بۇل كەلىسسوزدەردە ۋكراينا دەلەگاتسياسىن قاۋىپسىزدىك كەڭەسىنىڭ حاتشىسى رۋستەم ۋمەروۆ باسقارعان. بۇل كەلىسسوزدەرگە ەۋروپا وكىلدەرى دە قاتىسقان.

فلوريدا شتاتىنىڭ مايامي شارىندە وتكەن ءۇش كۇندىك كەلىسسوزدەر كەزىندە نەگىزگى 4 قۇجات تالقى بولعان. ولار:

1)20 تاراۋدان تۇراتىن جوسپار.

2)كوپجاقتى قاۋىپسىزدىك كەپىلدىگى.

3)اقش ۋكرايناعا بەرەتىن قاۋىپسىزدىك كەپىلدىگى.

4)ەكونوميكالىق دامۋ جوسپارى.

كەلىسسوزدەر ناتيجەسى تۋرالى ارنايى وكىل ۋيتكوفف: «بۇل كەلىسسوزدەر وتە مازمۇندى، كونسترۋكتيۆتى ءوتتى. كوپتەگەن ماسەلە بويىنشا پىكىر ۇشتاستىرا بىلدىك»، - دەپ مالىمدەدى.

ال ۋمەروۆ: «ۋكراينا ادىلەتتى جانە تۇراقتى بەيبىتشىلىككە قول جەتكىزۋ ماقساتىنان ەش اينىعان جوق. ءبىز اقش-تىڭ باسشىلىعى مەن قولداۋىن جوعارى باعالايمىز. سونداي-اق، وسى ماڭىزدى جۇمىستىڭ كەلەسى كەزەڭدەرىندە سەرىكتەستەرىمىزبەن بىرلەسىپ، تىعىز جۇمىس ىستەۋدى جالعاستىرامىز»، - دەدى.

اقش پەن رەسەي نە شەشتى؟

اقش-تىڭ ارانيى وكىلى ۋيتكوفف رەسەي دەلەگاتسياسىمەن بولعان كەلىسسوزدەردى دە قورىتىندىلاپ، مالىمدەمە جاسادى. كەلىسسوزدەر ەكى كۇن قاتارىنان فلوريدادا وتكەن. رەسەي اتىنان ارنايى وكىل كيريلل دميتريەۆ كەلىسسوزشى اتانسا، اقش دەلەگاتسياسىنا ستيۆ ۋيتكوفف، جەرارد كۋشنەر مەن جوش گريۋنباۋم كىرگەن.

ناتيجە: «رەسەي ۋكراينادا بەيبىتشىلىك ورناتۋ تۋرالى ويىنان باس تارتپايدى. رەسەي جاھاندىق قاۋىپسىزدىكتى ورناتۋ جولىنداعى اقش-تىڭ باستامالارىن جوعارى باعالايدى»، - دەپ قىسقا قايىردى رەسەي تارابى.

پۋتين ەۋروپاداعى بۇرىنعى كسرو ەلدەرىن قايتارۋدى كوزدەيدى!

«Reuters» اگەنتتىگى: «اقش پەن رەسەي دەلەگاتسيالارىنىڭ كەلىسسوزدەرى تۇيىققا تىرەلدى. جەر ماسەلەسى مەن قاۋىپسىزدىك كەپىلدىگى ماسەلەسى ءالى شەشىم تاپقان جوق»، - دەپ جازادى.

ال اقش سىرتقى بارلاۋى: «پۋتين ۋكراينانى تولىق جاۋلاۋ ويىنان ءبىر ساتكە دە باس تارتقان جوق. ونىڭ تۇپكى ويى – ەۋروپانىڭ جارتى بولىگىنە ءوز ىقپالىن قايتارۋ. سونىڭ ىشىندە بۇرىن كسرو قۇرامىندا بولعان، قازىرگى ەرۋوپا ەلدەرىن وزىنە قايتارۋدى كوزدەيدى»، - دەپ مالىمدەدى.

باتىس پەن اقش-تىڭ اقپاراتتىق كەڭىستىگىن رەسەيدىڭ كومپروميسستەن باس تارتۋى مەن بولاشاق اگرەسسياسى تۋرالى اقپاراتتار شارلاپ جۇرگەندە، ناتو باس حاتشىسى مار ريۋتتە رەسەيگە قاراتا قاتال مالىمدەمە جاسادى.

ۋكراينانى قورعاۋدىڭ 3 دەڭگەيلى تۇجىرىمداماسى ءازىر!

«ءپۋتيننىڭ 140 ميلليون ادامى بار. ال ناتو ەلدەرىنىڭ بارلىعىن قوسساق ميللياردقا جۋىق جان سانى ەسەپتەلەدى. بارلىق جاعىنان الىپ قاراساڭىز دا، ءبىز رەسەيدەن الدەقايدا قۋاتتىمىز!»، - دەيدى.

ريۋتتە ءدال قازىرگى كەزەڭدى ەكىنشى دۇنيەجۇزىلىك سوعىستان بەرگى ەڭ قاۋىپتى كەزەڭ دەپ اتادى. ونىڭ ايتۋىنشا، وداقتاستاردىڭ ماقساتى – بەيبىت كەلىسىمنەن كەيىن ۋكرايناعا قايتا اگرەسسيا جاسالمايتىنداي جاعداي جاساۋ. ول ءۇشىن 3 دەڭگەيلى قورعان جۇيەسىن قابىلداۋ كەرەك.

ءبىرىنشى دەڭگەي – ۋكراينا ارمياسىن قۋاتتاندىرۋ!

ريۋتتەنىڭ سوزىنشە، قازىر سوعىسىپ جاتقان ۋكراينا ارمياسى قولدان كەلمەستى جاساپ جاتىر. بۇل ارميا سوعىستان كەيىن دە قۋاتتى كۇشىن ساقتاپ قالۋى كەرەك.

ەكىنشى دەڭگەي – «نيەتتەستەر كواليتسياسى.

ونىڭ باسىندا فرانتسيا، ۇلىبريتانيا مەن گەرمانيا تۇرۋى ءتيىس. بۇل ۇشەۋى باستاعان كواليتسيا كيەۆكە كەرەك-جاراقتى تۇگەل بەرۋى ءتيىس. كرەمل ەندى قايتىپ كيەۆكە شابۋىلداي المايتىن بولۋى كەرەك.

ءۇشىنشى دەڭگەي – اقش كومەگى.

وداقتاستار قازىر وسى ءۇش ەلەمەنتتى ءبىر جۇيەگە بىرىكتىرىپ، ۋكراينانىڭ ەندى وڭاي نىسانا بولمايتىنىن كورسەتۋگە تىرىسۋدا. ريۋتتە سونداي-اق اتىستى توقتاتۋدان كەيىن ەۋروپانىڭ بىتىمگەرشىلىك كۇشتەرىن ۋكراينا جەرىنە ورنالاستىرۋعا رۇقسات بەردى. ونىڭ ايتۋىنشا، كەيبىر ەلدەر جۇمىس كۇشىن جىبەرۋگە دايىن ەكەندىكتەرىن مالىمدەگەن. قازىرگى ۋاقىتتا «نيەتتەستەر كواليتسياسى» تۇجىرىمداماسى ازىرلەنۋدە. بۇل قۇرلىقتاعى، اۋاداعى جانە تەڭىزدەگى ارەكەتتەردى قامتيدى.

Abai.kz