بۇگىن قازاقستان پرەزيدەنتى قاسىم-جومارت توقاەۆ اقش پرەزيدەنتى دونالد ترامپپەن تەلەفون ارقىلى سويلەستى. بۇل تۋرالى اقوردا حابارلادى.

مەملەكەتتەر باسشىلارى ەكىجاقتى كۇن ءتارتىبى مەن حالىقارالىق احۋال، سونىڭ ىشىندە ۋكراينا پروبلەماتيكاسى جونىندە پىكىر الماستى. قاسىم-جومارت توقاەۆ بيىل قاراشا ايىندا ۆاشينگتونعا جاساعان ساپارى كەزىندە قول جەتكىزىلگەن ۋاعدالاستىقتاردى تولىق ىسكە اسىرۋعا نيەتتى ەكەنىن ايتتى.

«قازاقستان پرەزيدەنتى ۋكراينا قاقتىعىسىن رەتتەۋدىڭ كۇردەلى سيپاتىنا نازار اۋداردى. ويتكەنى بۇل شيەلەنىستە تەرريتوريالىق كەلىسپەۋشىلىك باستى ماسەلەگە اينالىپ وتىر. سوندىقتان قازىرگى ناقتى جاعدايدى ەسكەرە وتىرىپ، ەكى جاقتىڭ مامىلەگە كەلۋى ماڭىزدى. ەلىمىز بارلىق تاراپتى توزىمدىلىك، يكەمدىلىك جانە كاسىبيلىك تانىتىپ، بەيبىتشىلىك فورمۋلاسىن ىزدەۋدى جالعاستىرۋعا شاقىرادى. بۇل رەتتە قازاقستان ارااعايىن ەمەس، بىراق قاجەت بولعان جاعدايدا كەلىسسوز الاڭىن ۇسىنۋعا دايىن»، - دەلىنگەن رەسمي اقپاراتتا.

قاسىم-جومارت توقاەۆ دونالد ترامپتىڭ كوشباسشىلىق قاسيەتى ارقاسىندا بىرقاتار حالىقارالىق اسكەري قاقتىعىس توقتاپ، اقش-تىڭ ىشكى الەۋەتىن كۇشەيتۋدە وڭ ناتيجەگە قول جەتكىزىلگەنىن اتاپ ءوتتى.

مەملەكەت باسشىسى امەريكا پرەزيدەنتىن وزىنە قولايلى ۋاقىتتا قازاقستانعا ساپارمەن كەلۋگە شاقىردى. بۇل ەكىجاقتى قارىم-قاتىناستاعى تاريحي ۋاقيعا بولاتىنىنا سەنىم ءبىلدىردى.

Abai.kz