جالپى پەداگوگ تاپشىلىعىنىڭ جارتىسىنان كوبى اۋىلدارعا تيەسىلى بولىپ وتىر.

بۇل تۋرالى وقۋ-اعارتۋ ءمينيسترى جۇلدىز سۇلەيمەنوۆا "ەگەمەن قازاقستان" گازەتىنە جاريالانعان ماقالاسىندا جازدى.

باس ۇستاز "ساپالى ءبىلىم قوعامدى العا جەتەلەيدى" اتتى ماقالادا ەلىمىزدەگى ءبىلىم سالاسىنىڭ جاي-جاپسارىنا تولىق توقتالعان. ءسوز اراسىندا پەداگوگ تاپشىلىعى تۋرالى دا ايتادى.

سۇلەيمەنوۆانىڭ سوزىنشە، قازاقستاندا 630-دان اسا ورىس ءتىلى جانە ادەبيەتى ءپانى مۇعالىمىنە تاپشىلىق بار.

– بۇگىندە پەداگوگتەرگە جالپى قاجەتتىلىك 5 مىڭ 413-ءتى قۇرايدى، ونىڭ ىشىندە 2506 نەمەسە 54% مۇعالىم اۋىل مەكتەپتەرىنە جەتىسپەيدى. وسى كۇنى ءبىلىم سالاسىندا ماتەماتيكا (1069) باستاۋىش سىنىپتارى (751), ورىس ءتىلى جانە ادەبيەتى (635), فيزيكا (382), حيميا (340) پاندەرىنىڭ مۇعالىمدەرىنە دەگەن قاجەتتىلىك بار. وقۋ-اعارتۋ مينيسترلىگىنىڭ الدىندا تۇرعان رەفورمالاردا ەندى وسى ماسەلەگە ەكپىن سالىناتىن بولادى، – دەيدى مينيستر. 

ايتا كەتەيىك، مۇعالىمدەردىڭ ەڭبەك دەمالىستارى 45 كۇننەن 56 كۇنگە ۇزارتىلعان ەدى. سونداي-اق، پرەزيدەنتتىڭ قولداۋىمەن 5 ۇستاز "قازاقستاننىڭ ەڭبەك ەرى", 95 ۇستاز "قازاقستاننىڭ ەڭبەك سىڭىرگەن ۇستازى" اتاعىنا يە بولدى.

Abai.kz