پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ۇكىمەت وتىرىسىندا مەملەكەت باسشىسىنىڭ ۇلتتىق قۇرىلتايدىڭ V وتىرىسىندا بۇقارالىق اقپارات قۇرالدارى سالاسىنداعى زاڭنامانى جەتىلدىرۋ جونىندەگى تاپسىرمالارى شەڭبەرىندە جۇرگىزىلىپ جاتقان جۇمىستار تۋرالى باياندادى.

اتاپ ايتقاندا، ونىڭ سوزىنشە بالالار مەن جاسوسپىرىمدەردىڭ الەۋمەتتىك جەلىلەرگە قولجەتىمدىلىگىن شەكتەۋ ماسەلەسى قاراستىرىلۋدا. مادەنيەت جانە اقپارات مينيسترلىگى 16 جاسقا تولماعان ازاماتتار ءۇشىن الەۋمەتتىك جەلىلەردە تىركەۋگە تىيىم سالۋدى كوزدەيتىن ونلاين-پلاتفورمالار مەن بۇقارالىق اقپارات قۇرالدارىنىڭ قىزمەتىن رەتتەيتىن زاڭ جوبالارىن ازىرلەدى.

اتالعان وزگەرىستەر ساراپتامادان ءوتىپ، قوعامدىق تالقىلاۋعا شىعارىلدى.

ونى ءتيىمدى ىسكە اسىرۋ ءۇشىن وقۋ-اعارتۋ مينيسترلىگى جانە جاساندى ينتەللەكت جانە تسيفرلىق دامۋ مينيسترلىگىمەن بىرلەسىپ پايدالانۋشىلاردىڭ جاسىن تەكسەرۋ مەحانيزمدەرىن ازىرلەۋ، قاجەت بولسا جاۋاپكەرشىلىك شارالارىن قاراستىرۋ جوسپارلانىپ وتىر.

«حالىقتىڭ مەدياساۋاتتىلىعىن ارتتىرۋعا جانە تاۋەلسىز باق-تى قولداۋعا ەرەكشە نازار اۋدارىلادى. بۇل باعىتتا سالالىق جۋرناليستيكانى دامىتۋ كوميسسياسى جانە باسقا دا تەتىكتەر ارقىلى ءتيىستى جۇمىستار جۇرگىزىلۋدە. سونداي-اق ونلاين-پلاتفورمالار مەن باق اراسىنداعى جارناما ءبولۋ جانە كەيبىر تاۋارلاردى جارنامالاۋعا تىيىمدى ءىشىنارا الىپ تاستاۋ مۇمكىندىكتەرى زاڭنامالىق تۇرعىدان قاراستىرىلادى»، — دەپ تولىقتىردى ايدا بالاەۆا.

Abai.kz