بۇگىن «داۆوس» ەكونوميكالىق فورۋمىندا اقش پرەزيدەنتى دونالد ترامپتىڭ باستاماسىمەن قۇرىلعان «بەيبىتشىلىك كەڭەسىنىڭ» جارعىسى بەكىتىلىپ، قول قويىلدى.

وسىعان دەيىن «Bloomberg» اگەنتتىگى: «گازا سەكتورىنداعى احۋالدى رەتتەۋ ءۇشىن قۇرىلعان ورگاننىڭ وكىلەتتىگى مەن جارعىسىنىڭ تۇپكىلىكتى نۇسقاسى دۇنيەجۇزىلىك ەكونوميكالىق فورۋم اياسىندا بەكىتىلمەك»، - دەپ حابارلاعان.

بۇگىن مەملەكەت باسشىسى قاسىم-جومارت توقاەۆ اقش پرەزيدەنتى دونالد ترامپتىڭ باستاماسىمەن قۇرىلعان «بەيبىتشىلىك كەڭەسىنىڭ» جارعىسىنا قول قويدى.

سونداي-اق، بۇگىن «بەيبىتشىلىك كەڭەسىنىڭ» العاشقى مۇشەلەرى تانىستىرىلدى. ولار: اقش، قازاقستان، ءازىربايجان، ارمەنيا، بولگاريا، باحرەين، ماروككو، ارگەنتينا، ۆەنگريا، يندونەزيا، يوردانيا، كوسوۆو، پاكىستان، پاراگۆاي، كاتار، ساۋد ارابياسى، تۇركيا، ءباا، وزبەكستان، موڭعوليا. الداعى اپتادا اتالمىش كەڭەسكە تاعى ونداعان ەل قوسىلادى دەپ كۇتىلۋدە.

«CNN» دەرەگىنشە، اتالعان كەڭەسكە ازىرگە اقش-تىڭ ءداستۇرلى ەۋروپالىق وداقتاستارى قوسىلعان جوق.

كەڭەس باستاپقىدا گازا سەكتورىنىڭ بولاشاعىن قاراستىراتىن جاڭا حالىقارالىق ورگان رەتىندە قۇرىلعان. دەگەنمەن، ونىڭ جارعىسى وعان شىن مانىندە الدەقايدا كەڭىرەك فۋنكتسيالار بەرىلەتىنىن جانە بۇۇ-عا بالاما بولا الاتىنىن كورسەتىپ وتىر.

«بەيبىتشىلىك كەڭەسىنىڭ» توراعاسى – دونالد ترامپ بولىپ بەكىتىلگەن. اتالعان كەڭەسكە ۇزىن-ىرعاسى 60 ەلدىڭ باسشىلارى شاقىرىلعان. ولاردىڭ قاتارىندا، قازاقستان، ۋكراينا، رەسەي مەن بەلارۋس تە بار.

اق ءۇيدىڭ ءباسپاسوز حاتشىسى كەرالاين لەۆيتت: «بەيبىتشىلىك كەڭەسى» - جاڭا حالىقارالىق ۇيىم»، - دەپ مالىمدەدى.

Abai.kz