ءماجىلىس دەپۋتاتى ايدوس سارىم ۋكراينالىق "ميروتۆورەتس" سايتىنىڭ دەرەكقورىنا ەنگىزىلدى. سايتتىڭ حابارلاماسىندا سارىمنىڭ "ۋكراينانى قولداعان قازاقستان ازاماتتارىن قىلمىستىق جاۋاپقا تارتۋعا باعىتتالعان ارەكەتتى جاريا تۇردە ناسيحاتتاعانى" جانە "رەسەي پروپاگانداسىنىڭ ءنارراتيۆىن" تاراتقانى  العا تارتىلعان7

وندا سونىمەن بىرگە كاسپي قۇبىر جەلىسى كونسورتسيۋمىنىڭ ينفراقۇرىلىمىنا شابۋىل جاسالعانان كەيىن ايدوس سارىمنىڭ قازاقستان باس پروكۋرورى بەرىك اسىلوۆقا قايىرىلىپ، "وسى شابۋىلدى قولداعان ازاماتتاردىڭ ارەكەتىنە قۇقىقتىق باعا بەرۋدى" تالاپ ەتكەنى جانە مۇنداي ارەكەتتەردى "تەرروريزمدى ناسيحاتتاۋ" جانە "مەملەكەتكە وپاسىزدىق جاساۋ" باپتارىمەن قاراستىرۋدى سۇراعانى جازىلعان.

"شىن مانىندە، بۇل تالاپتار ۋكراينا مەن ونىڭ ازاماتتارىن قولداۋدى تۇنشىقتىرۋ، ۋكراينانىڭ ءوزىن قورعاۋ قۇقىعىن مويىنداعان تۇلعالاردى قۋدالاۋ، رەسەي مۇنايىنىڭ ەكسپورتىمەن بايلانىستى ينفراقۇرىلىم مۇددەسىن قورعاۋعا باعىتتالعان" دەپ باعالاعان.

دەپۋتاتتىڭ ءوزى Ulysmedia بەرگەن تۇسىنىكتەمەسىندە "ەكى تاراپتىڭ دا قارا تىزىمىنە ىلىنگەنىن" ايتقان.

"شىنىمدى ايتسام، ماعان ءبارىبىر. بۇل كۇلكىلى. مەن رەسەي مەن ۋكراينانىڭ "قارا تىزىمىنە" ءبىر مەزەتتە ءىلىنىپ وتىرمىن. سيرەك تالانت. ەگەر قالاسا، ەكى رەت تىزىمگە كىرگىزسىن" دەدى دەپۋتات.

ايدوس سارىم سونىمەن بىرگە ۋكراينا جوعارعى راداسىنداعى ارىپتەستەرىمەن بايلانىسىن ۇزبەيتىنىن دە اتاپ ءوتتى.

"مەن ۋكرايناعا قارسى نارسە ايتىپ وتىرعان جوقپىن عوي. قازاقستاندىق ينفراقۇرىلىمدى بومبالاعانىنا قۋانىپ جاتقان قازاقستاندىقتارعا قاتىستى ايتتىم. وعان قۋانۋعا بولمايدى" دەدى دەپۋتات.

بىلتىر DW باسىلىمى قازاقستان پارلامەنتىنىڭ دەپۋتاتتارى ايدوس سارىم مەن ەرمۇرات باپيگە جانە بىرقاتار وزگە قوعام قايراتكەرىنە رەسەي اۋماعىنا كىرۋگە تىيىم سالىنعانىن  جازعان ەدى. ايدوس سارىمنىڭ سوزىنشە، 2021 جىلى ونى قولىندا ديپلوماتيالىق تولقۇجات بولعانىنا قاراماستان ماسكەۋگە كىرگىزبەي قويعان. رەسمي استانا بۇل جايلى پىكىر بىلدىرمەگەن.

بىلتىر كۇزدە ۋكراينالىق «ميروتۆورەتس» سايتى قازاقستاننىڭ ىقپالدى ساياساتكەرلەرىنىڭ ءبىرى، كەزىندە پرەمەر-مينيستر، بىرنەشە ايماقتا اكىم، ەلشى قىزمەتىن اتقارعان، 2026 جىلعا دەيىن ۇجىمدىق قاۋىپسىزدىك شارتى ۇيىمىندا باس حاتشى بوپ ىستەگەن يمانعالي تاسماعامبەتوۆتى دە رەسەيشىل ادام رەتىندە  تىزىمگە قوسقان ەدى.

«ميروتۆورەتس» – ۋكراينالىق تاۋەلسىز، مەملەكەتتىك ەمەس ۇيىم. سايت 2014 جىلى قۇرىلعان. باستاما اۆتورى – سول كەزدەگى ىشكى ىستەر ءمينيسترىنىڭ شتاتتان تىس كەڭەسشىسى قىزمەتىن اتقارعان انتون گەراششەنكو دەپ ايتىلادى. جوبا اۆتورلارى "ۋكراينانىڭ ۇلتتىق قاۋىپسىزدىگىنە قارسى قىلمىس بەلگىلەرى بار" ارەكەت جاساعان ادامداردىڭ ءتىزىمىن جاريالاپ وتىرمىز دەيدى.

پلاتفورما، نەگىزىنەن، ورىس اسكەرى شەبىندە سوعىسقانداردىڭ، رەسەي باقىلايتىن دونەتسك جانە لۋگانسكىنى قولداعان نەمەسە اننەكسيالانعان قىرىمعا بارعان ازاماتتاردىڭ اتى-ءجونىن جاريالايدى. بۇدان بولەك سايتتا وككۋپاتسيالانعان ۋكراين جەرىندە جۇمىس ىستەپ، اقپارات تاراتاتىن جۋرناليستەر جايلى دا اقپارات ءجيى شىعادى.

Abai.kz