قازاقستان رەسپۋبليكاسى قورعانىس مينيسترلىگىنىڭ دەلەگاتسياسى ينسپەكتسيالىق ساپارمەن گولان جوتالارىنداعى بۇۇ كۇشتەرىنىڭ بولىنگەن ايماقتى باقىلاۋ جونىندەگى ميسسيا ورىندالاتىن وڭىرگە باردى. ساپاردى قر قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكباەۆ باسقاردى.

ساپار بارىسىندا ميسسيا قولباسشىلىعىمەن كەزدەسۋ ءوتىپ، ونىڭ شەڭبەرىندە بىرىككەن ۇلتتار ۇيىمىنىڭ بولىنگەن ايماقتى باقىلاۋ مانداتىن ىسكە اسىرۋ ماسەلەلەرى، وڭىردەگى احۋال مەن قازاقستاندىق كونتينگەنتتىڭ قىزمەتى تالقىلاندى.

ميسسيا باسشىسى جانە بۇۇ بولىنگەن ايماقتى باقىلاۋ جونىندەگى كۇشتەرىنىڭ قولباسشىسى گەنەرال-مايور انيتا اسما قازاقستاندىق بىتىمگەرلەردىڭ قويىلعان مىندەتتەردى ساپالى ورىنداعانى ءۇشىن العىسىن ءبىلدىرىپ، ولاردىڭ ءىس-قيمىلىن، كاسىبيلىگىن، ءتارتىبى مەن ۇيلەسىمدى ارەكەتىن جوعارى باعالادى.

قازاقستاندىق ۇلتتىق كونتينگەنت جەدەل ارەكەت ەتۋ بولىمشەسىنىڭ فۋنكتسيالارىن ورىنداپ، ءموبيلدى پاترۋلدەۋدى جۇزەگە اسىرادى، جەدەل ارەكەت ەتۋ توپتارىنىڭ دايىندىعىن، مەديتسينالىق ەۆاكۋاتسيالاۋدى جانە ينجەنەر-ساپەرلەردىڭ ىلەسىپ ءجۇرۋىن قامتاماسىز ەتەدى. ودان باسقا باقىلاۋ بەكەتتەرىندە دە مىندەتتەر ورىندايدى.

ميسسياعا قاتىسا باستاعاننان بەرى ۇلتتىق كونتينگەنت 675, ونىڭ ىشىندە 500-دەن اسا پاترۋلدەۋدى، جاتتىعۋ ءىس-شارالارىن وتكىزۋدى، جارىلىس قاۋپى بار زاتتاردى زالالسىزداندىرۋ وپەراتسيالارىن، لەكتەردى الىپ ءجۇرۋدى جانە ۋاقىتشا باقىلاۋ بەكەتتەرىن قويۋدى ورىندادى.

قازىرگى ۋاقىتتا گولان جوتالارىندا 139 قازاقستاندىق بىتىمگەر قىزمەت ەتىپ ءجۇر.

Abai.kz