20 اقپان كۇنى جامبىل اتىنداعى قازاق مەملەكەتتىك اكادەميالىق فيلارمونياسىنىڭ ۇلكەن زالىندا فرانتسۋز كومپوزيتورى فرانسيس پۋلەنكتىڭ «ادام داۋىسى» اتتى مونووپەراسى قويىلادى.

جان كوكتونىڭ پەساسى نەگىزىندە جازىلعان بۇل ليريكالىق تۋىندى پسيحولوگيالىق يىرىمدەرگە تولى حح عاسىرداعى وپەرا ونەرىنىڭ جاۋھارى سانالادى. ءبىر عانا كەيىپكەردىڭ تاعدىرى مەن ىشكى ارپالىسىنا قۇرىلعان بۇل قويىلىم كورەرمەنگە جالعىزدىق، ماحاببات جانە قوشتاسۋ سەزىمدەرىن تەرەڭىنەن سەزىنۋگە مۇمكىندىك بەرەدى.

ساحناداعى درامالىق وبرازدى قازاقستاننىڭ ەڭبەك سىڭىرگەن قايراتكەرى ءداريا ءجۇسىپ سومدايدى. قويىلىمدا ول كورەرمەنگە اكتەرلىك ويىنىمەن قاتار ۆوكالدىق شەبەرلىگىن دە پاش ەتەدى. وپەرانى قانات وماروۆتىڭ ديريجەرلىگىمەن ت.ابدىراشەۆ اتىنداعى قر مەملەكەتتىك اكادەميالىق سيمفونيالىق وركەسترى سۇيەمەلدەيدى.

قويىلىمنىڭ قازاق تىلىندە ساحنالانۋى – وتاندىق ونەر ءۇشىن ماڭىزدى قادام. سەبەبى كورەرمەن قاۋىمعا كلاسسيكالىق تۋىندىنى انا تىلىندە تىڭداپ، تۇسىنۋگە مۇمكىندىك بەرەدى.

Abai.kz