ءماجىلىس سپيكەرى ەرلان قوشانوۆ بەلارۋس رەسپۋبليكاسىنا رەسمي ساپارمەن باردى. ول مينسكىدە ەل پرەزيدەنتى الەكساندر لۋكاشەنكومەن، ۇلتتىق جينالىستىڭ وكىلدەر پالاتاسىنىڭ باسشىسى يگور سەرگەەنكومەن جانە رەسپۋبليكا كەڭەسىنىڭ توراعاسى ناتاليا كوچانوۆامەن كەزدەستى. تاراپتار ەكىجاقتى قارىم-قاتىناستىڭ جوعارى دەڭگەيىن اتاپ ءوتىپ، پارلامەنتارالىق ىنتىماقتاستىقتى كەڭەيتۋ پەرسپەكتيۆالارىن تالقىلادى.

سۋرەت: ت.تانىباەۆ.

بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەسۋدە ەرلان قوشانوۆ قازاقستان پرەزيدەنتى قاسىم-جومارت توقاەۆتىڭ زور ىقىلاسى مەن ىزگى تىلەگىن جەتكىزىپ، حالىقتارىمىزدىڭ اراسىنداعى تەرەڭ تاريحي بايلانىستى اتاپ ءوتتى. ول ەكى ەل پرەزيدەنتتەرىنىڭ سەنىمدى ساياسي قارىم-قاتىناسىنىڭ ارقاسىندا بۇگىندە قازاقستان-بەلارۋس بايلانىسى ستراتەگيالىق ارىپتەستىك دەڭگەيىنە كوتەرىلگەنىنە ەرەكشە توقتالدى. ساۋدا-ەكونوميكا، ءوندىرىس، اۋىل شارۋاشىلىعى، كولىك جانە باسقا دا سالالارداعى ىنتىماقتاستىقتىڭ جوعارى قارقىنى – سونىڭ ناقتى ناتيجەسى.

ەرلان قوشانوۆ بەلارۋس باسشىسىنا بۇگىندە پرەزيدەنت باستاماسىمەن قازاقستاندا جۇرگىزىلىپ جاتقان اۋقىمدى ساياسي وزگەرىستەر تۋرالى ايتىپ بەردى. ەلىمىزدە مەملەكەتتىڭ قوعامدىق-ساياسي جانە قۇقىقتىق ارحيتەكتۋراسىن تۇبەگەيلى جاڭعىرتاتىن جاڭا كونستيتۋتسيانىڭ جوباسى كەڭىنەن تالقىلانۋدا. اتا زاڭنىڭ جاڭا جوباسى بويىنشا تۇپكىلىكتى شەشىمدى بۇكىلحالىقتىق رەفەرەندۋمدا ەل ازاماتتارى قابىلدايدى.

سۋرەت: ت.تانىباەۆ.

الەكساندر لۋكاشەنكو پرەزيدەنت قاسىم-جومارت توقاەۆقا جىلى لەبىزدەرىن جولدادى. ول قازىرگى كۇردەلى كەزەڭدە ەكى ەل اراسىنداعى ىنتىماقتاستىقتى نىعايتۋداعى پارلامەنتاريلەردىڭ ءرولىن ەرەكشە اتاپ ءوتتى. بۇل ورايدا بەلارۋس پەن قازاقستاننىڭ كوپپوليارلىلىق پەن ەگەمەندى مەملەكەتتەردىڭ دامۋىن قولدايتىنىن، حالىقارالىق كۇن تارتىبىندە ورتاق ۇستانىمعا يە ەكەنىن ايتتى. سونداي-اق شانحاي ىنتىماقتاستىق ۇيىمىنا كىرۋ كەزىندە بەلارۋستى قولداعانى ءۇشىن قازاقستانعا العىسىن ءبىلدىردى. 

بەلارۋس باسشىسى قازاقستانمەن اراداعى قازىردىڭ وزىندە 1 ملرد دوللاردان اسقان تاۋار اينالىمىنىڭ جوعارى ءوسۋ قارقىنىنا وڭ باعا بەرىپ،  ماشينا جاساۋ مەن اۋىل شارۋاشىلىعىنداعى كووپەراتسيانى كەڭەيتۋگە شاقىردى. 

ۇلتتىق جينالىستىڭ وكىلدەر پالاتاسىنىڭ باسشىسى يگور سەرگەەنكومەن كەزدەسۋدە پارلامەنتارالىق ديالوگتان باستاپ ەكى ەل اراسىنداعى ەكونوميكالىق، مادەني ىنتىماقتاستىققا دەيىنگى كەڭ اۋقىمداعى ماسەلەلەر تالقىلاندى.

سۋرەت: ت.تانىباەۆ.

– قازاقستان مەن بەلارۋس – سەنىمدى ستراتەگيالىق سەرىكتەس. مەملەكەتتەر باسشىلارى مۇنى ۇنەمى ايتىپ كەلەدى.  ەكى ەل اراسىندا جەمىستى ساياسي ديالوگ جولعا قويىلعان. ونەركاسىپتە، ماشينا جاساۋدا جانە اگرارلىق سالادا كووپەراتسيالىق بايلانىس كەڭەيىپ جاتىر. ەكى مەملەكەتتىڭ پارلامەنتتەرى دە ءوزارا قارىم-قاتىناستىڭ قارقىندى دامۋىنا زور ۇلەس قوسۋدا. زاڭ شىعارۋ ىسىندە تۇراقتى تاجىريبە الماسۋ جولعا قويىلىپ، دوستىق توپتارى بەلسەندى ءارى ناتيجەلى جۇمىس ىستەپ جاتىر، دەپۋتاتتارىمىزدىڭ اراسىندا بەكەم بايلانىس ورناعان، – دەدى ءماجىلىس سپيكەرى.

ءوز كەزەگىندە يگور سەرگەەنكو قازاقستان بەلارۋس ەلى ءۇشىن ءاردايىم ۋاقىت سىنىنان وتكەن دوس، ستراتەگيالىق سەرىكتەس ءارى وداقتاس بولىپ قالا بەرەتىنىن ايتتى. ول استانا سياقتى مينسكى دە سىندارلى، بىرىكتىرەتىن كۇن ءتارتىبىن حالىقارالىق الاڭداردا ىلگەرىلەتۋگە باسىمدىق بەرەتىنىنە ءمان بەردى. 

وكىلدەر پالاتاسىنىڭ توراعاسى قازاقستاندا جۇرگىزىلىپ جاتقان رەفورمالار باعىتىن جوعارى باعالادى. قازاقستاننىڭ ءتۇرلى سالاداعى زاڭ شىعارۋ جۇمىسىنداعى تاجىريبەسىن بەلارۋس دەپۋتاتتارى جان-جاقتى زەردەلەپ وتىرعانىن اتاپ ءوتتى.

سپيكەرلەر تسيفرلاندىرۋ سالاسىنداعى پارلامەنتتەردىڭ قىزمەتىنە دە ەرەكشە نازار اۋداردى. ءماجىلىس توراعاسى مەملەكەت باسشىسىنىڭ ءۇش جىل ىشىندە قازاقستاندى تسيفرلىق مەملەكەتكە اينالدىرۋ مىندەتىن العا قويعانىنا توقتالدى. وسى رەتتە دەپۋتاتتار ازىرلەگەن تسيفرلىق كودەكس پەن جاساندى ينتەللەكت تۋرالى زاڭ كۇشىنە ەندى. استانادا حالىقارالىق جي ورتالىعى، «Astana Hub» تەحنوپاركى قارقىندى جۇمىس ىستەپ تۇر، سونداي-اق ورتالىق ازياداعى ەڭ قۋاتتى سۋپەركومپيۋتەر ىسكە قوسىلدى. 

كەزدەسۋ قورىتىندىسى بويىنشا دەپۋتاتتار زاڭنامالىق جۇمىس بويىنشا ءوزارا تاجىريبە الماسۋدى جالعاستىرۋعا، پارلامەنتارالىق ۇيىمدار اياسىندا، سونىمەن قاتار دوستىق توپتارى، سالالىق كوميتەتتەر مەن پارلامەنتتەر اپپاراتتارى جەلىسى بويىنشا ىقپالداستىقتى نىعايتۋعا ۋاعدالاستى.

سۋرەت: ت.تانىباەۆ.

ەرلان قوشانوۆ ەكى ەلدىڭ زاڭ شىعارۋشى ورگاندارى اراسىنداعى ارىپتەستىكتى دامىتۋ ماسەلەلەرىن رەسپۋبليكا كەڭەسىنىڭ توراعاسى ناتاليا كوچانوۆامەن دە تالقىلادى.

– ءبىزدىڭ پارلامەنتارالىق قارىم-قاتىناسىمىز قارقىندى دامىپ كەلەدى. جەكە بايلانىستىڭ ارقاسىندا ءوزارا سەنىم مەن قۇرمەت نىعايۋدا. پارلامەنتارالىق ۇيىمدار شەڭبەرىندە دە تىعىز بايلانىستامىز. ءبىر-ءبىرىمىزدىڭ باستامالارىمىزعا قولداۋ بىلدىرۋدە دە جاقسى تاجىريبە بار. ءبىز پارلامەنتارالىق وداق، تمد پارلامەنتارالىق اسسامبلەياسى، ۇقشۇ جانە ەقىۇ پارلامەنتتىك اسسامبلەيالارى اياسىنداعى ءوزارا ءداستۇرلى ىقپالداستىقتى ودان ءارى كەڭەيتۋگە نيەتتىمىز، – دەدى ءماجىلىس توراعاسى. 

ەكى ەل اراسىنداعى مادەنيەت جانە ءبىلىم بەرۋ سالالارى بويىنشا پارلامەنتتىك قولداۋدى كەڭەيتۋ، جاستارعا ارنالعان بىرلەسكەن جوبالاردى ىسكە اسىرۋ، تۋريزم مەن يننوۆاتسيا باعىتىندا ونەركاسىپتىك كووپەراتسيانى دامىتۋ بويىنشا ەكىجاقتى ىنتىماقتاستىقتى كۇشەيتۋ ماسەلەلەرى قامتىلعان مازمۇندى اڭگىمە ءوربىدى.

ۇلتتىق جينالىستىڭ وكىلدەر پالاتاسى مەن رەسپۋبليكا كەڭەسىندە وتكەن كەزدەسۋلەردە ەرلان قوشانوۆ بەلارۋس دەپۋتاتتارىنا قازاقستاندا جۇرگىزىلىپ جاتقان كونستيتۋتسيالىق رەفورمالا تۋرالى ايتىپ بەردى. ول جاڭا كونستيتۋتسيانىڭ جوباسى قازاقستان پارلامەنتىنىڭ قۇزىرەتىن ەداۋىر كۇشەيتەتىنىن، قوعامنىڭ ساياساتقا ارالاسۋىن كەڭەيتەتىنىن جانە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن نىعايتاتىنىن ەرەكشە اتاپ ءوتتى.

ساپار اياسىندا ءماجىلىس دەپۋتاتتارى مينسكىدەگى جەڭىس مونۋمەنتىنە گۇل شوعىن قويدى.  «بەلاز» زاۋىتىنا جانە «حاتىن» مەملەكەتتىك مەموريالدىق كەشەنىنە بارىپ، ەكىنشى دۇنيەجۇزىلىك سوعىس قۇرباندارىن ەسكە الدى.

Abai.kz