بۇل تۋرالى قارجى ينستيتۋتى LS باسىلىمىنىڭ ساۋالىنا بەرگەن جاۋابىندا حابارلادى.

رەسمي اقپاراتقا ساي، "وتباسى بانك" يسلامدىق يپوتەكانى ىسكە قوسۋ باعىتىندا جۇمىس جۇرگىزۋدە، دەپ جازادى inbusiness.kz سايتى

ەسكە سالايىق، بيىلدان باستاپ كوممەرتسيالىق بانكتەرگە يسلامدىق بانك وپەراتسيالارىن جۇزەگە اسىرۋعا زاڭ جۇزىندە رۇقسات بەرىلگەن ەدى.

قارجى ينستيتۋتىنىڭ حابارلاۋىنشا، حالال قارجىلىق وپەراتسيالاردى ەنگىزۋ ءۇشىن "وتباسى بانكىنە" رۇقسات ەتىلگەن قىزمەت تۇرلەرىنىڭ تىزبەسىن كەڭەيتۋ قاجەت. ول ءۇشىن "تۇرعىن ءۇي قۇرىلىس جيناقتارى تۋرالى" زاڭعا وزگەرىستەر ەنگىزۋ تالاپ ەتىلەدى.

– زاڭعا ەنگىزىلەتىن وزگەرىستەر باستالدى، قازىر بۇل مەملەكەتتىك ورگاندارمەن كەلىسۋ ساتىسىندا تۇر، – دەپ ناقتىلادى "وتباسى بانك" وكىلدەرى.

سونىمەن قاتار، يسلامدىق قارجىلاندىرۋدى ەنگىزۋ اياسىندا بىرقاتار اۋقىمدى تەحنيكالىق جانە ادىسنامالىق وزگەرىس قاجەت. اتاپ ايتقاندا:

• ايىپپۇل سانكتسيالارىنىڭ بولماۋى (تولەم مەرزىمى كەشىككەن جاعدايدا الىناتىن ايىپپۇلدار قايىرىمدىلىققا باعىتتالادى);
• ءداستۇرلى پايىزدىڭ قولدانىلماۋى (جالگەرلىك تولەمدەر مەن بانك مارجاسى بۇكىل جالداۋ مەرزىمىنە بولىنەدى);
• ونىمدەر مەن وپەراتسيالاردىڭ يسلام قارجى قاعيداتتارىنا سايكەستىگىن راستايتىن شاريعات كەڭەسىنىڭ شەشىمىنىڭ بولۋى;
• ءاربىر قارجىلىق وپەراتسيا بويىنشا جەكە كەلىسىمشارتتار جاساسۋ قاجەتتىلىگى (جىلجىمايتىن مۇلىكتى ساتىپ الۋ، جالعا بەرۋ، ساتۋ).

بانك مالىمەتىنشە، قازىر يپوتەكا مەن كەيىن ساتىپ الۋ قۇقىعىمەن جالعا بەرۋ تەتىكتەرىنىڭ بىرنەشە نۇسقاسى قاراستىرىلىپ جاتىر. ولاردىڭ قاتارىندا مۋراباحا، يدجارا، مۋشاراكا بار. سونداي-اق دەپوزيتتىك ونىمدەر رەتىندە مۋدارابا، ۆاكالا، مۋشاراكا مودەلدەرى زەردەلەنۋدە. بۇل ونىمدەردى تولىق ەنگىزۋ مەن ىسكە اسىرۋ زاڭنامالىق تالاپتار مەن ليتسەنزياعا تىكەلەي بايلانىستى بولماق.

اتالعان يپوتەكانىڭ باستى ەرەكشەلىگى مىنادا – وندا ءداستۇرلى پايىز اتىمەن جوق. بانك تابىسىن جالداۋ نەمەسە ۇستەمە اقى ارقىلى عانا الادى. قاراپايىم تىلمەن ايتقاندا، بانك بەرگەن اقشاسىنا پايىز قوسپايدى. ونىڭ ورنىنا ءۇيدى ءوزى ساتىپ الىپ، تۇتىنۋشىعا ۋاقىتشا جالعا بەرەدى. ول اي سايىن سول ۇيدە تۇرعانى ءۇشىن اقىسىن تولەيدى.

قارجى ينستيتۋتىنىڭ دەرەگىنە ساي، قازاقستانداعى مۇسىلمان ەرەسەك حالىقتىڭ 2 ميلليوننان استامى (شامامەن 20%) تۇرعىن ءۇي جاعدايىن جاقسارتۋدى قۇپ كورەدى. دەسە دە، قولدانىستاعى يپوتەكالىق باعدارلامالاردىڭ باسىم بولىگى يسلام قاعيداتتارىنا ساي كەلمەيدى.

مۇنان بولەك، حالىقارالىق ىنتىماقتاستىقتى دامىتۋ اياسىندا، بايتەرەك حولدينگىنىڭ ەنشىلەس ۇيىمى سانالاتىن "وتباسى بانك" پاكىستانداعى يسلام بانكينگى قاعيداتىمەن جۇمىس ىستەيتىن ءىرى قارجى ۇيىمدارىنىڭ ءبىرى – Meezan Bank Limited بانكىمەن ىنتىماقتاستىق تۋرالى مەموراندۋمعا قول قويدى.

Abai.kz