امەريكا قۇراما شتاتتارى يرانعا قارسى اسكەري وپەراتسيا جۇرگىزۋ ءۇشىن تاياۋ شىعىستاعى اۆيابازالار مەن ەۋروپاعا 150 اكەري ۇشاق جىبەردى.

بۇل تۋرالى اۆياتسيالىق رەسۋرستار مەن سپۋتنيكتىك تۇسىرىلىمدەرگە سىلتەمە جاساپ، The Washington Post جازعان.

باسىلىمنىڭ جازۋىنشا، اقش اسكەرى 2003 جىلعى يراكتاعى سوعىستان كەيىنگى وڭىرگە وسىنشاما اۋقىمدا اسكەر جىبەرگەن ەمەس. اسكەري بەلسەندىلىك اقش پرەزيدەنتى دونالد ترامپتىڭ يرانمەن يادرولىق باعدارلامانى شەكتەۋ جونىندە كەلىسىمگە قول جەتكىزىلمەگەن جاعدايدا، سوققى جاساۋ مۇمكىندىگىن مەڭزەگەن مالىمدەمەسىنەن كەيىن كۇشەيگەن. تەگەران وكىلدەرى كەلىسىمگە كەلۋ ىقتيمال ەكەنىن ايتقانىمەن، بۇل ءۇشىن ۋاقىت قاجەت ەكەنىن جەتكىزدى.

ساراپشىلاردىڭ پىكىرىنشە، قازىرگى كۇشتەر اۋقىمى 2025 جىلدىڭ ماۋسىمىندا يراننىڭ يادرولىق نىساندارىنا جاسالعان امەريكالىق سوققىلار الدىنداعى دايىندىقتان دا اۋقىمدى. بۇل بىرنەشە كۇنگە سوزىلۋى مۇمكىن اسكەري ناۋقاننىڭ ستسەناريى قاراستىرىلىپ وتىرعانىن اڭعارتادى.

باسىلىم سونىمەن قاتار ونداعان قوسىمشا ۇشاق USS Gerald R. Ford ۇشاق تاسىمالداۋشى كەمەسىنىڭ بورتىندا ەكەنىن جازادى. كەمە 23 اقپاندا كريت ارالىنداعى بازاعا كىرگەن. بۇل تاياۋ شىعىسقا جىبەرىلگەن ەكىنشى امەريكالىق ۇشاق تاسۋشى كەمە. وسىلايشا قازىر اقش-تىڭ قولدانىستاعى اسكەري-تەڭىز كەمەلەرىنىڭ شامامەن ۇشتەن ءبىرى وسى وڭىرگە شوعىرلانىپ وتىر.

باسىلىمعا پىكىر بىلدىرگەن، اقش قورعانىس ءمينيسترىنىڭ تاياۋ شىعىس جونىندەگى بۇرىنعى ورىنباسارى، قازىرگى ۆاشينگتون ينستيتۋتى زەرتتەۋ ديرەكتورى دانا ستروۋلدىڭ ايتۋىنشا، شوعىرلانعان اسكەري كۇشتىڭ اۋقىمى اسكەريلەردىڭ ترامپتىڭ كەز كەلگەن شەشىمىن جۇزەگە اسىرۋعا دايىن ەكەنىن كورسەتەدى.

Abai.kz