باتىس قازاقستان وبلىسىندا رەسپۋبليكالىق رەفەرەندۋم كۇنى ەرەكشە كورىنىستەرمەن ەستە قالۋدا. حان ورداسى اۋىلىنداعى №60 سايلاۋ ۋچاسكەسىندە تاريحي كوستيۋم كيگەن جاڭگىر حان بەينەسىندە جەرگىلىكتى تۇرعىن كەلىپ، سايلاۋشىلاردىڭ نازارىن اۋداردى.

تاريحي كەيىپكەر داۋىس بەرۋ راسىمىنە قاتىسىپ، ءوز تاڭداۋىن جاسادى. كورەرمەندەر مەن ۋچاسكەگە كەلگەن تۇرعىندار ءۇشىن بۇل – ەل تاريحىنا قۇرمەت كورسەتۋ مەن ازاماتتىق جاۋاپكەرشىلىكتى ناسيحاتتايتىن ەرەكشە ءسات بولدى.

– قازىرگى تەز وزگەرىپ جاتقان الەمدە ەڭ باستى بايلىق – پايدالى قازبالار ەمەس، ادامدار. سوندىقتان كونستيتۋتسيادا ادامي كاپيتالدى، ياعني ءبىلىمدى، عىلىمدى جانە ادامداردىڭ دامۋىن قولداۋعا باسىمدىق بەرىلۋى وتە ماڭىزدى. عىلىم دامىعان سايىن جاڭا تەحنولوگيالار پايدا بولىپ، جاڭا نارىقتار اشىلادى، ينۆەستيتسيا كەلەدى. بۇل ءوز كەزەگىندە حالىقتىڭ تۇرمىس دەڭگەيىن جاقسارتۋعا مۇمكىندىك بەرەدى. بۇگىن مەن تەك تاريحي تۇلعا رەتىندە عانا ەمەس، ەل بولاشاعىنا بەي-جاي قاراي المايتىن ازامات رەتىندە دە ءوز تاڭداۋىمدى جاساپ وتىرمىن. ەلدىڭ بولاشاعى ارقايسىمىزدىڭ شەشىمىمىزگە بايلانىستى،– دەدى جاڭگىر حان كەيپىندەگى رەكونسترۋكتور.

ايتا كەتەيىك، رەفەرەندۋم كۇنى وبلىستاعى بارلىق سايلاۋ ۋچاسكەلەرىندە 446 مىڭنان استام ازامات ءوز تاڭداۋلارىن جاساۋ مۇمكىندىگىنە يە.

Abai.kz