جەتىسۋ وبلىسىندا جاڭا كونستيتۋتسياعا ارنالعان مۋرال سالىندى. ونىڭ ەسكيزىن دايىنداۋدا جاساندى ينتەللەكت مۇمكىندىكتەرى پايدالانىلدى. «Jetisu jastary» كمم-ءنىڭ ۇسىنىسىمەن سالىنعان «اتا زاڭىم - ايبىنىم» مۋرالى جاستاردىڭ ازاماتتىق مادەنيەتىن قالىپتاستىرۋعا جانە زاماناۋي كوشە ونەرى ارقىلى قوعامداعى ماڭىزدى قۇندىلىقتاردى دارىپتەۋگە باعىتتالعان، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

بۇل ارت-نىسان تالدىقورعان قالاسىنداعى كوپ قوباتتى ۇيلەردىڭ ءبىرىنىڭ قابىرعاسىندا كەسكىندەلگەن. مۋرالدىڭ اشىلۋ سالتاناتى ءوتىپ، وعان ءوڭىر جاستارى، قوعام بەلسەندىلەرى، شىعارماشىلىق ورتا وكىلدەرى جانە قالا تۇرعىندارى قاتىستى.

- ءبىزدىڭ جاڭا مۋرالىمىز اتا زاڭىمىزعا ارنالعان. كەشە مەملەكەت باسشىسى اتاپ وتكەنىندەي، جاڭا كونستيتۋتسيا ەڭ الدىمەن جاستارعا  باعىتتالعان. اتا زاڭىمىزعا ۆولونتەرلىك قىزمەت، عىلىم، ميننوۆاتسيا، جاساندى ينتەللەكت ۇعىمدارى ەنگىزىلگەن. وسىعان بايلانىستى ءبىز مۋرالدى زاماناۋي مۇمكىندىكتەرمەن ۇشتاستىرۋعا تىرىستىق. كوركەم تۋىندىدا بىرلىك، ادىلدىك، جاۋاپكەرشىلىك جانە بولاشاققا دەگەن سەنىم يدەيالارى بەينەلەنىپ، قوعامداعى ءوزارا قۇرمەت پەن ىنتىماقتاستىقتى دارىپتەيتىن مازمۇن كورىنىس تاپتى. ويتكەنى كونستيتۋتسيا – بارلىق وسى يگىلىكتىڭ باستاۋى، - دەدى «Jetisu jastary» كمم-ءنىڭ ديرەكتورى شاميل ۆانكەەۆ.

مۋرال اۆتورى ەرنۇر باقبەرگەننىڭ ايتۋىنشا، بۇل جۇمىس قوعامداعى ماڭىزدى قۇندىلىقتاردى زاماناۋي ونەر ءتىلى ارقىلى جەتكىزۋگە باعىتتالعان.

- مۇنداي شىعارماشىلىقپەن 6 جىلدان بەرى كاسىبي تۇردە اينالىسىپ كەلەمىن. وسى ۋاقىت ارالىعىندا «زاڭ مەن ءتارتىپ»، «تازا قازاقستان» سياقتى يدەولوگيالىق جانە قوعامدىق ماڭىزى بار تاقىرىپتاردا بىرقاتار مۋرالدار سالدىم. ال وسى جوبامنىڭ ەرەكشەلىگى – مۋرالدىڭ ەسكيزى جاساندى ينتەللەكت كومەگىمەن ازىرلەندى. بۇل ءتاسىل شىعارماشىلىق پەن تەحنولوگيانى ۇشتاستىرا وتىرىپ، زاماناۋي ونەردىڭ جاڭا باعىتتارىن كورسەتۋگە، سونىمەن قاتار قىسقا مەرزىم ىشىندە جۇزەگە اسىرۋعا مۇمكىندىك بەرەدى. مىسالى، ءبىزدىڭ شىعارماشىلىق توپ مۋرالدى 3 كۇننىڭ ىشىندە تولىق سالىپ ءبىتتى، - دەدى جاس سۋرەتشى.

ەسكە سالساق، بۇعان دەيىن ءوڭىر جاستارىنىڭ باستاماسىمەن وبلىستىڭ اۋدان ورتالىقتارىندا «تازا قازاقستان»،  «ادال ازامات»، «زاڭ مەن ءتارتىپ» قاعيدالارىنا ارنالعان ءۇش مۋرال كوكسۋ، قاراتال، سارقان اۋداندارىنىڭ ورتالىقتارىندا سالىنعان بولاتىن.

Abai.kz