دەمالىس كۇندەرى پارتيالار تۇرعىندارمەن جانە ەڭبەك ۇجىمدارىمەن كەزدەسۋلەرىن جالعاستىرىپ، فورۋمدار مەن تاقىرىپتىق ءىس-شارالار وتكىزدى. تالقىلاۋ بارىسىندا اۋىل مەديتسيناسى، اگروسەكتور، ەكولوگيا، بيزنەستى قولداۋ، ينكليۋزيا جانە سالىق ساياساتى ماسەلەلەرى كوتەرىلدى. 8-9 تامىزدا پارتيالار وتكىزگەن ءىس-شارالارعا توقتالا كەتسەك.

شىمكەنتتە «ادىلەت» پارتياسىنىڭ توراعاسى ايبەك دادەباي سايلاۋالدى باعدارلامانىڭ «زاڭ جانە ءتارتىپ» بلوگى تۋرالى ايتىپ بەردى. ول سونداي-اق قازاقستاننىڭ زايىرلى مەملەكەت ەكەنىن جانە جاڭا كونستيتۋتسيانىڭ ەرەجەلەرى ەشكىمدى ءبولىپ-جارماي، بارلىعى ءۇشىن مىندەتتى ەكەنىنە توقتالدى. ونىڭ ايتۋىنشا، قوعامعا ەلدىڭ زاڭناماسى مەن داستۇرلەرىنە قايشى كەلەتىن كوزقاراستاردى تاڭۋعا جاسالعان ارەكەتتەر قۇقىقتىق باعا الۋى ءتيىس. سونداي-اق ءسوز بارىسىندا ءداستۇرلى وتباسىلىق قۇندىلىقتاردى قورعاۋ تاقىرىبى قوزعالدى.

پارتيا سايلاۋشىلاردى قۇرىلتاي دەپۋتاتتىعىنا كانديداتتارمەن تانىستىرۋدى دا جالعاستىردى. دينارا زاكيەۆا بالالار مەن وتباسىلاردىڭ قۇقىقتارىن قورعاۋ سالاسىنداعى جۇمىسى تۋرالى ايتىپ بەردى، ايجان ايماعانوۆا كاسىبي زاڭگەرلىك تاجىريبەسىنە توقتالدى. ۋليانا اشيموۆا ءوز سوزىندە سايلاۋعا قاتىسۋ اياسىنداعى باسىمدىقتارىن تانىستىردى. كانديدات لاۋرا قاراباسوۆا QASQAZHOL YouTube ارناسىنا بەرگەن سۇحباتىندا جاستاردى قوعامدىق پروتسەستەرگە تارتۋ جانە جاس مامانداردىڭ ءوز وڭىرلەرىندە قالىپ، جۇمىس ىستەۋىنە مۇمكىندىك بەرۋ تۋرالى پىكىر ءبىلدىردى.

استانادا كەمال اتاتۇرىك اتىنداعى ساياباقتا جالپىۇلتتىق سوتسيال-دەموكراتيالىق پارتيا Kazakhstan Inclusive Forum 2026 وتباسىلىق فورۋمىن وتكىزدى. پارتيانىڭ مالىمەتىنشە، ءىس-شاراعا جۇزدەگەن ادام – مۇگەدەكتىگى جانە ءاۋتيزمى بار بالالاردى تاربيەلەپ وتىرعان وتباسىلار، ساراپشىلار، پارتيا بەلسەندىلەرى جانە ۇەۇ وكىلدەرى قاتىستى. باياندامالارمەن پارتيا توراعاسى اسحات راحيمجانوۆ، سونداي-اق كانديداتتار نۋريا بالتابايقىزى، اجار ساعاندىقوۆا، تالعات تاتيكوۆ جانە ناۋرىز سايلاۋباي ءسوز سويلەدى. فورۋم قورىتىندىسى بويىنشا پارتيا الەۋمەتتىك قورعاۋ جونىندەگى سايلاۋالدى بلوگىنا ەنگىزۋدى جوسپارلاپ وتىرعان ۇسىنىستار ازىرلەنەتىنىن حابارلادى.

«بايتاق» پارتياسىنىڭ ەكو-كاراۆانى الماتىعا جەتىپ، ونى قالالىق فيليال وكىلدەرى مەن پارتيا توراعاسى ازاماتحان امىرتاەۆ قارسى الدى. ءىس-شارا ەكولوگيالىق كولىك پەن قالانىڭ ەكولوگياسى ماسەلەلەرىنە ارنالدى. اقمولا وبلىسىندا پارتيا كامەلەتكە تولماعاندارعا الەۋمەتتىك-قۇقىقتىق جانە پسيحولوگيالىق قولداۋ كورسەتۋ ورتالىعىندا كەزدەسۋ وتكىزىپ، قيىن ومىرلىك جاعدايعا تاپ بولعان بالالاردى قورعاۋ ماسەلەلەرىن تالقىلادى. جەتىسۋ وبلىسىنىڭ كوكسۋ اۋدانىندا پارتيا وكىلدەرى مۇقىر اۋىلدىق وكرۋگىنىڭ تۇرعىندارىمەن كەزدەسكەننەن كەيىن جەرگىلىكتى قوقىس پوليگونىندا قالدىقتاردى جيناۋ جانە ساقتاۋ جاعدايىمەن تانىستى.

استانادا قازاقستاننىڭ حالىق پارتياسى قالالىق ۆەلوسپورت فەدەراتسياسىنىڭ جاتتىقتىرۋشىلارىنىڭ قاتىسۋىمەن بالالار مەن ەرەسەكتەرگە ارنالعان ۆەلوجاتتىعۋ وتكىزدى. سەمەيدە قۇرىلىسشىلار كۇنىنە وراي كانديداتتار سيليكات كىرپىش وندىرەتىن «سيليكات» جشس كاسىپورنىنا بارىپ، ەڭبەك ۇجىمىمەن كەزدەسۋدە وتاندىق قۇرىلىس ماتەريالدارىن وندىرۋشىلەردى قولداۋ، ەڭبەكاقى تولەۋ جانە وندىرىستەگى قاۋىپسىزدىك ماسەلەلەرىن تالقىلادى. پارتيا پاراسپورت سالاسىنداعى جۇمىستىڭ جالعاسىپ جاتقانىن دا حابارلادى. پارتيانىڭ مالىمەتىنشە، قازاقستاننىڭ پاراترياتلون جانە سۋردوترياتلون بويىنشا ۇلتتىق قۇرامالارىن جاساقتاۋ باستالدى. بۇدان بولەك، الماتىدا «اقىلعا قونىمدى بوگەت» («دامبا زدراۆوگو سمىسلا») اكتسياسى ءوتتى. ونىڭ اياسىندا كانديداتتار، ۆولونتەرلەر مەن سپورتشىلار مەدەۋگە كوتەرىلىپ، سايلاۋالدى باعدارلاما تۋرالى اقپارات بەرىلگەن بريفينگ ۇيىمداستىرىلدى.

«اۋىل» پارتياسى وڭىرلەردە ەڭبەك ۇجىمدارىمەن جانە كاسىبي ۇجىمدارمەن بىرقاتار كەزدەسۋ وتكىزدى. شىعىس قازاقستان وبلىسىندا پارتيا توراعاسى قايرات ايتۋعانوۆ كانديداتتارمەن بىرگە «مايلى داقىلداردىڭ تاجىريبەلىك شارۋاشىلىعى» جشس ۇجىمىمەن كەزدەسىپ، اگرارلىق عىلىم مەن تۇقىم شارۋاشىلىعىن دامىتۋ ماسەلەسىن تالقىلادى. اقمولا وبلىسىندا كانديداتتار قورعالجىن اۋىلىنىڭ اۋرۋحاناسىنداعى مەديتسينا ۇجىمىمەن اۋىل مەديتسيناسىنىڭ ساپاسى تۋرالى سويلەستى. ال اقتوبە وبلىسىندا پارتيا توراعاسىنىڭ ءبىرىنشى ورىنباسارى سەرىك ەگيزباەۆ «جانسايا» شارۋا قوجالىعىنىڭ ۇجىمىمەن وسىمدىك شارۋاشىلىعى مەن مال شارۋاشىلىعى ماسەلەلەرى بويىنشا كەزدەستى.

«اق جول» پارتياسى وڭىرلەردەگى جۇمىسىن جالعاستىرىپ، ەڭبەك ۇجىمدارىمەن جانە جەرگىلىكتى تۇرعىندارمەن كەزدەستى. «ەۆراز كاسپيان ستال» زاۋىتىندا پارتيا وكىلدەرى ەڭبەك ۇجىمىمەن كەزدەسىپ، سايلاۋ جۇيەسىن دامىتۋ جونىندەگى ۇسىنىستارىن تانىستىردى. ولاردىڭ قاتارىندا سايلاۋ ۋچاسكەلەرىندەگى بەينەباقىلاۋ جانە سايلاۋشىلاردى ەلەكتروندى سايكەستەندىرۋ بار.

پارتيا وكىلدەرى Respublica پارتياسىن دا سىنعا الدى. كانديدات يۋري لي ساۋدا جەلىلەرى ءۇشىن سالىق مولشەرلەمەسىن وتاندىق تاۋارلاردىڭ ۇلەسىنە قاراي بەلگىلەۋ بولشەك ساۋدا كومپانيالارىنىڭ شىعىندارىن ارتتىرىپ، باعاعا اسەر ەتۋى مۇمكىن ەكەنىن ايتتى. ول ساۋدا جەلىلەرى وداعىنىڭ سورەلەردەگى وتاندىق ءونىمنىڭ ۇلەسىنە قاتىستى دەرەكتەرىن كەلتىردى. كانديدات اسىلحان قوجاحمەتوۆ «اق جول» پارتياسىنىڭ سالىق كودەكسىنە اشىق تۇردە قارسى شىققانىن مالىمدەدى.

Respublica پارتياسى وڭتۇستىك وڭىرلەردەگى كەزدەسۋلەر سەرياسىن اياقتاپ، باتىس وبلىستارداعى جۇمىسقا كىرىستى. الماتىدا پارتيا جاقتاستارىنىڭ ونىنشى وڭىرلىك فورۋمى ءوتتى. ناۋقان باستالعالى مۇنداي كەزدەسۋلەر ەلىمىزدىڭ ون وڭىرىندە ۇيىمداستىرىلعان. فورۋمدا پارتيا توراعاسى ايداربەك حودجانازاروۆ، تەڭ توراعالار سىرىمبەك تاۋ، دينارا شۇكىجانوۆا، قۋانىش شونباي، ماكسيم بارىشەۆ جانە بەيبىت الىبەكوۆ ءسوز سويلەدى. ولار پارتيانىڭ ماجىلىستەگى فراكتسياسىنىڭ زاڭنامالىق باستامالارىن ەسكە سالىپ، كاسىپكەرلىكتى قولداۋ جونىندەگى باعدارلامانىڭ باعىتتارىن تانىستىردى.

8-9 تامىزدا پارتيالار سايلاۋالدى كۇن ءتارتىبىنىڭ ءتۇرلى باعىتتارى بويىنشا ءىس-شارالار وتكىزدى. ءبىرى وڭىرلەردەگى كەزدەسۋلەر مەن كاسىبي ۇجىمدارمەن جۇمىسقا باسىمدىق بەرسە، ەندى ءبىرى جاقتاستارىن ءىرى فورۋمدار مەن تاقىرىپتىق ءىس-شارالارعا جينادى. سونىمەن قاتار ناۋقان بىرتىندەپ مازمۇندى سيپات الىپ كەلەدى: پارتيالار ءوز ۇسىنىستارىن تانىستىرىپ قانا قويماي، باسەكەلەستەرىنىڭ باستامالارىنا دا جاريا تۇردە باعا بەرە باستادى.

Abai.kz