اراب تەڭىزىنەن ەسكەن جىلىمىق جەلگە بەتىمدى توسىپ پالۋبادا وتىرمىن. كەمەگە ءمىنۋ اقىسىن تولەگەن بارلىق جولاۋشىلار سياقتى مەن دە ءوز ەركىندىگىمدى پايدالانىپ قالماقپىن. پالۋبانىڭ وسى تۇسىندا ىشىمدىك ىشۋگە ارنالعان شاعىن بارى بار. سوندا تۇرىپ، كەلۋشىلەرگە قىزمەت كورسەتەتىن فيليپيندىك ەركەك پەن قىرعىز قىزىن كەمەگە مىنگەن كۇننەن بىلەم. ءيا، قالاعانىڭدى ساتىپ ىشەسىڭ، تەك ەۆرومەن ەسەپ ايىرىسۋعا مىندەتتىسىز. اقشاسىن قيماعاندار شىلىمىن عانا تارتىپ، تەڭىزدى تاماشالايدى.

مەن پالۋبانىڭ جيەگىندەگى ورىندى ادەيى تاڭداپ العام. وقشاۋلاۋ. ەشكىممەن قاتىسپايسىڭ.

ءار الۋان تىلدە سويلەسكەن جولاۋشىلاردىڭ داۋىسى كەمە گۇرىلىمەن ارالاسىپ تۇسىنىكسىز سارىنعا ۇلاسىپ، قۇلاعىما كەلەدى. بار ويىم تەڭىزدى تاماشالاپ، كەمەنىڭ بىرقالىپتى جۇرىسىنەن راحاتتانسام دەيمىن. تولقىنسىز تەڭىزدىڭ سۇلۋلىعىنا كوزىڭ تويىپ، اۋاداعى ىستىق لەپتەن ءتانىڭنىڭ بالبىراي بالقىعانىن سەزىنۋ ءۇشىن دە كوڭىلىڭ تىنىش، الاڭسىز بولۋ كەرەك قوي.

تەڭىزدى، اسىرەسە، ءبىراز تاۋەكەلگە بارىپ ءبىرشاما اقشاعا ساتىپ العان - قازىرگى قيالعا بەرگىسىز ءساتىمدى سەزىنگىم كەلگەن سايىن ءۇپ ەتكەن جەلدەن ۇيپالانا بەرەتىن شاشىم كوزىمە ءتۇسىپ مازامدى كەتىرە باستاعان. تەڭىز بەتىندەگى جىلتىراعان ۇساق ساۋلەلەر كوزىمدى قاراقتىرىپ اكەتىپ بارادى. الگىندە تارتقان ارزانقول اراب شىلىمنىڭ اششى ءدامى اۋزىما كەلىپ جۇرەگىمدى لوبىتىپ جىبەردى. ەرنىم كەبەرسىگەندەي. كوز الدىما مۇز ساۋىتقا سالىنعان سۋىق سىرا ەلەستەيدى. ءوز-وزىمنەن جۇتىنىپ قويام. 10 ەۆرو تولەۋگە ساراڭدىعىم سوندا دا جىبەرمەيدى. نەگىزى، كايۋتامنان ءىشىم پىسقان سوڭ شىققام جوق-تى، ارتتاعى شەشىمىن كۇتكەن كوپ ماسەلەلەر مازالاپ، شىلىم تارتىپ سەرگىگىم كەلگەن.

اقىرى تولقىنمەن شاعىلىسقان جارىق شىداتپادى دا كوزىمدى امالسىز پالۋباعا قاراي تايدىرىپ اكەتتىم. مەنەن ەكى مەتردەي جەردە ءبىر اعىلشىن وتىر ەكەن. وعان بۇلاي ءتۇس توقتاتىپ قاراماس تا ەم، ەگەر ونىڭ قايتا-قايتا اۋزىنا اپارعان قوڭىر قۇتىداعى سىرا ءدال مەنىڭ كومەيىمە قۇيىلىپ جاتقانداي اسەر ەتپەگەندە. قارا دا تۇر، بۇل مىنانى بىتىرەدى دە الشاڭ باسىپ بارداعى قىرعىز قىزعا وزىنە تاعى ءبىر قۇتى سىرا كەرەگىن ايتادى. قىز، ارينە، «قاندايى كەرەك؟» - دەپ سۇرايدى. بۇل بولسا ەش ويلانباستان  10 ەۆروعا تاعى ءبىر قۇتىنى الادى دا ورنىنا كەپ جايعاسادى.

ەلدە جۇرگەندە دە ادىلەتسىزدىڭتىڭ نە ەكەنىن ءبىلۋشى ەم. بىراق ونىڭ دۇنيەنىڭ ءبىر بۇرىشىندا، تەڭىزدە جۇرگەن جەرىمنەن مەنى تاۋىپ الادى دەپ ويلاماپپىن. قاراڭىزشى، ەكەۋىمىز دە ءوز ەلىمىزدە تۇراقتى قىزمەتى بار ادامبىز. ول جالاقسىن فۋنت ستەرلينگپەن، مەن تەڭگەمەن الام. ال ەكەۋىمىز وسى كەمەدە كەزدەسىپ بىردەي سىراعا تاپسىرىس بەرسەك ول 10 ەۆرو تۇراتىن سىراعا شامامەن 8,6 فۋنت ستەرلينگ شىعىندايدى. ەندى مەنىڭ جاعدايىمدى ەلەستەتە بەرىڭىز. الگى شىناشاقتاي قۇتىنىڭ ىشىندەگى قۇرىپ كەتكىر پالەنى قۇشىرلانا جۇتۋىم ءۇشىن ماعان باقانداي 5800 تەڭگە تولەۋگە تۋرا كەلمەك. قۇدايشىلىعىن ايتىڭىزشى، قاي كۇنام ءۇشىن وسىنشا شىعىندالۋىم كەرەك؟

ويلاپ وتىرمىن، مەنىمەن سالىستىرعاندا مىنا وزىمسىنگەن اعىلشىننىڭ ارتىقشىلىقتارى، قۇداي بىلەدى، كەشە ءوزىمىز توقتاعان جاعاجايداعى قۇمىنان دا كوپ شىعار. ءتىپتى ول تەڭىزگە قارسا- تەك تەڭىزدىڭ ءوزىن كورەدى. جىبىرلاعان ۇساق تولقىنعا شاعىلعان جارىق كوزىن قارىقتىرسا دا مازاسى قاشپايدى. اۋىز قۋىسىندا ارزانقول شىلىمنىڭ ساسىق ءيىسى جوق. كەرەك دەسەڭ، قالتاسىنىڭ تۇبىندەگى اقشانى ەسەپتەپ جاتقان جوق. كەمەدەن تۇسپەي وسى كۇيى سىرا ءىشىپ ءبىر جىل جۇرسە دە بۇل اقشاسىنىڭ ۇشتەن ءبىرىن دە جۇمساپ بولا المايتىن شىعار. بارلىق شارۋانى قايرىپ قويىپ، رەفەرەندۋم وتكىزۋمەن-اق كەدەيلەنىپ بىتكەن مەنىڭ وكىمەتىمدى ول تۇسىندە دە كورگەن ەمەس. بۇلاردىڭ شارۋاسىن ءتۇپ-تۇقيانىنا دەيىن شەشىپ بەرەتىن پرەمەرى مەن پارلامەنتى بار. قامقورشى اكەسى - كارولى تۇرعاندا شايتاننىڭ ءوزى بۇنىڭ مازاسىن السىن با؟! جالپى ول ءوزى ادام بولىپ ۋايىمداي ما ەكەن؟

بۇدان ارى وتىرا بەرۋدىڭ ءمانى بولمادى. ورنىمنان كوڭىلسىزدەۋ تۇردىم دا سىرانىڭ ءشولىن كابينامداعى جارتىلاي بوساعان قۇتىداعى سۋمەن باسۋدان باسقا امالىم قالماعانىنا كوزىم انىق جەتتى.

ءامىر قابشىقباي

Abai.kz