كومىر گەنەراتسياسىن دامىتۋدىڭ 2026-2030 جىلدارعا ارنالعان بەكىتىلگەن ۇلتتىق جوباسى ەلەكتر ەنەرگياسىنا ءوسىپ كەلە جاتقان سۇرانىستى ستراتەگيالىق تۇرعىدان وتەۋگە، ەلىمىزدىڭ ەنەرگەتيكالىق ينفراقۇرىلىمىن تەرەڭ جاڭعىرتۋعا جانە ءبىرتۇتاس ەلەكتر ەنەرگەتيكالىق جۇيەسىنىڭ تۇراقتىلىعىن قامتاماسىز ەتۋگە باعىتتالعان، – دەپ حابارلايدى Aikyn.kz.

نەگىزگى باسىمدىق بازالىق ەنەرگيا كوزدەرىنىڭ قۇرىلىسىنا بەرىلەدى. 2030 جىلعا دەيىن 7,8 گۆت جاڭا جانە جاڭارتىلعان قۋاتتاردى ىسكە قوسۋ جوسپارلانۋدا، ونىڭ ىشىندە 8 جاڭا ەلەكتر ستانساسىن سالۋ جانە جۇمىس ىستەپ تۇرعان 11 ستانسانى جاڭعىرتۋ كوزدەلگەن.

جالپى قۋاتى 5,3 گۆت بولاتىن جاڭا قۇرىلىس باعدارلاماسى ەلىمىزدىڭ ماڭىزدى توراپتارىن قامتيدى. وعان كۋرچاتوۆتاعى كوندەنساتسيالىق ەلەكتر ستانساسى (700 مۆت), قۋاتتى ەكىباستۇز گرەس-3 (2 640 مۆت), قاراعاندىداعى (350 مۆت) جانە ەكىباستۇزداعى (180 مۆت) جەس، سونداي-اق جەزقازعان (500 مۆت), كوكشەتاۋ (240 مۆت), سەمەي (360 مۆت) جانە وسكەمەن (360 مۆت) قالالارىنداعى جاڭا جەو قۇرىلىسى كىرەدى.

جوبا تەك گەنەراتسيانى ارتتىرۋدى عانا ەمەس، سونىمەن قاتار جۇمىس ىستەپ تۇرعان ستانسالاردىڭ تيىمدىلىگىن كوتەرۋدى دە ماقسات ەتەدى. جاڭعىرتۋ ناتيجەسىندە جابدىقتاردىڭ توزۋ دەڭگەيىن 13%-عا تومەندەتۋ جوسپارلانىپ وتىر.

ۇلتتىق جوبانى ىسكە اسىرۋ ودان ارعى ونەركاسىپتىك ءوسۋ، تسيفرلىق ەكونوميكانى دامىتۋ جانە جاساندى ينتەللەكت تەحنولوگيالارىن ەندىرۋ ءۇشىن سەنىمدى ەنەرگەتيكالىق نەگىز جاساۋعا مۇمكىندىك بەرەدى.

كومىر گەنەراتسياسى تەحنولوگيالىق جاڭعىرتۋ جانە ەكولوگيالىق ستاندارتتاردى ساقتاۋ شارتىمەن ەلىمىزدىڭ ەنەرگەتيكالىق قاۋىپسىزدىگىن جانە ۇزاق مەرزىمدى پەرسپەكتيۆادا ەنەرگيا جۇيەسىنىڭ تۇراقتىلىعىن قامتاماسىز ەتۋدە شەشۋشى ءرولىن ساقتاپ قالادى.

Abai.kz