ەلوردادا «تازا قازاقستان» اكتسياسى اياسىندا Cominvest Group زاۋىتىنىڭ اۋماعىندا كەزەكتى تازالىق جۇمىسى ءوتتى. ءىس-شارا بارىسىندا ءوندىرىس ورنى ماڭىندا سانيتارلىق تازالاۋ جۇرگىزىلىپ، اۋماعى رەتكە كەلتىرىلدى، دەپ حابارلايدى ەلوردا اكىمدىگىنىڭ رەسمي سايتى.

تازالىق جۇمىسى كەزىندە زاۋىت اۋلاسى تولىقتاي اباتتاندىرىلىپ، شاشىلعان قوقىستار جينالدى. قاتتى تۇرمىستىق قالدىقتار ارنايى ورىندارعا شىعارىلىپ، اۋماق تازارتىلدى. سونىمەن قاتار، ءوندىرىس ورنىنىڭ اينالاسىندا جاتقان قالدىقتار الىنىپ، جۇمىس اۋماعى جيناقى كۇيگە كەلتىرىلدى.

تازالىق اكتسياسىنا قاتىسقان قىزمەتكەرلەر ۇجىم بولىپ ەڭبەك ەتىپ، بىرلەسە اتقاردى. مۇنداي جۇمىس كوكتەم جانە كۇز مەزگىلدەرىندە تۇراقتى تۇردە وتكىزىلىپ تۇرادى.

«وسى زاۋىتتا ەڭبەك ەتىپ جۇرگەنىمە ەكى جىلعا جۋىق ۋاقىت بولدى. 2024 جىلدان بەرى جۇزەگە اسىپ كەلە جاتقان «تازا قازاقستان» اكتسياسىنان ءبىزدىڭ ۇجىم بىردە-ءبىر رەت قالىس قالعان ەمەس. كوكتەم جانە كۇز مەزگىلدەرىندە مۇنداي تازالىق شارالارىن تۇراقتى تۇردە ۇيىمداستىرىپ تۇرامىز. سونىمەن قاتار، ءاربىر قىزمەتكەر جۇمىس كۇنى اياقتالعان سوڭ ءوز جۇمىس ورنىن تازا قالدىرۋدى ادەتكە اينالدىرعان»، – دەدى زاۋىت قىزمەتكەرى بولىسبەك ەركىنبەك.

ءوندىرىس اۋماعىنداعى قۋراعان ءشوپ پەن جاپىراقتان تازارتىلدى، تال، تەرەكتىڭ ءتۇبى اكتەلىپ، توپىراعى قوپسىتىلدى.

Abai.kz